“Veisautaki ni Noqu iVakarau meu Rawata kina e dua na iVakadinadina,” Liaona, Jiulai 2023.
iTabagone Qase Cake
Veisautaki ni Noqu iVakarau meu Rawata kina e dua na iVakadinadina
Oqo na imatai ni gauna me qai tiko kina vei au e dua na sorenikau rawarawa ni vakabauta e ka dina.
Au a tubu cake ena loma ni Lotu—au dau lako ki na itaviqaravi, ka vakaitavi ena masu vakamatavuvale kei na vuli ivolanikalou. Ia a sega ni tiko dina vei au e dua na ivakadinadina. Au sega ni kila seu a vakabauta na Kalou se na Luvena. Au sega ni kila se a dina na iVola i Momani.
Au a vinakata e dua na ivakadinadina, ia au a rarawa ni oti na masumasu vakavuqa kau sega ni vakila niu sa ciqoma e dua na kena isau. Au sa tekivu vakataroga, “Kevaka e dina na Kalou, na cava e sega ni vakaraitaka kina vei au o Koya? Na cava na vuna e vakatara kina o Koya meu dabe eke ka lomatarotaro tiko?”
Niu railesu, au rawa ni raica vakamatata na vuna au a sega ni rawata kina edua na isaunitaro: Au a sega ni solia dina tiko na noqu igu. Au na wilika na noqu ivolanikalou me lima na miniti vakadua ena dua na macawa ka namaka me yaco mai eso na ivakatakila baleta ga niu a kerea.
Au a sega ni kila ni vakabauta edua na ivakavuvuli ni cakacaka.
E Dua na Sore ni Vakabauta
Ke dua e rai tiko mai taudaku ena rawa ni kaya niu “bulabula” tiko ena Lotu, ia au se sega tikoga ni kila se dina na Lotu. Ia au a vinakata meu kila.
Au sa mani lewa kina meu veiqaravi vakadaukaulotu. Au a nanuma cala ni me vaka niu daukaulotu, ena rairai yaco ga mai vakataki koya vei au na isaunitaro mai vua na Kalou. Au se sega tikoga ni solia vakalevu na noqu igu ki na masumasu se na vuli, ia sega ni dede sa yaco mai na noqu ilesilesi.
Ena itekivu ni noqu kaulotu, e a dredre vei au meu vakila na Yalo niu vuli tiko ena initaneti ena gauna ni matedewa baleta niu a sega ni sasaga tiko vakaukauwa. Ia au a qai yaco ki na koronivuli ni veituberi vakadaukaulotu. Kei na noqu gauna e kea e a dua na gauna vakayalo dina vei au. Oqo na imatai ni gauna me tiko kina vei au e dua na sorenikau rawarawa ni vakabauta e ka dina.
Vakayacori edua na Veisau
Sa qai yaco me curumi yani na buturara ni kaulotu ka sa dredre dina. Au vakila ni vaka me yali na ivakadinadina lailai ka tiko vei au.
Dua na siga niu a tagi tiko, a qai votu mai vei au e dua na vakanananu. O tamaqu e dau tarogi au se a vakacava na noqu siga e koronivuli, kau na dau kaya tu ga ni sa tawalasa dina. Ka dau kaya o koya, “Ia, oya baleta ga ni o a cakava me tawalasa. Kevaka o vinakata na vuli me lasa, cakava me lasa.” Au qai kila ni rawa meu vakayagataka vakavinaka na noqu gauna ni kaulotu ena vuli kei na tubu se meu rarawa.
Au sa qai yalodina vakalevu cake ena masu meu tukuna vua na Tamada Vakalomalagi niu na tovolea meu veisautaka na noqu ivakarau ni rai. Ni oti oya, au a vakauqeti meu solia edua na igu vou. Au sa tekivu vuli ka masu ka vakasama vakatitobu vakaidina, ka yaco na gauna me lesu tale mai na noqu ivakadinadina lailai—ka yaco me tubu cake tikoga. Au sa sega soti ni rarawa, ka sa tekivu meu kune reki ena kosipeli.
Na Ka Eda Solia Sai Koya Oya Na Ka Eda Na Rawata
Ni ko rarawataka nomu vakila ni vaka e sega ni tubu na nomu vakabauta, o na vakataroga beka se tiko na Kalou ka kevaka e kauwai tiko o Koya. Ia au sa vulica ni sa dau tiko vata kei keda o Koya ka na vukei keda me vaqaqacotaki na noda vakabauta kei na ivakadinadina kevaka eda cakava noda itavi ka solia kina noda igu (raica na Moronai 10:4).
E kaya o Elder Robert D. Hales (1932–2017) ena Kuoramu ni iApositolo Le Tinikarua, “E dina ni vaka e sega ni tiko edua na iwalewale matata e rawa ni da ciqoma yadua kina e dua na ivakadinadina, ia e vaka e tiko edua na ivakarau ka rawa ni muri.”1 Na ivakarau oqori e oka kina na kena gadrevi ena yalodina me da kila na dina, masu, ka lomasoli me da veiqaravi ena vanua eda kacivi kina, segata me da talairawarawa, vulica na ivolanikalou ka bulataka ena noda bula, ka tiko edua na ivakarau ni bula yalomalumalumu.
Au sega ni rawa ni a vaqaqacotaka na noqu vakabauta keu a sega ni veisautaka na noqu ivakarau ni rai, muria na iwalewale oqo, ka solia noqu igu taucoko meu veitaratara kivua na Tamada Vakalomalagi kei Jisu Karisito. Niu vakayacora na veisau oqori, sa tekivu meu ciqoma na isaunitaro ka vakabauta na veika dina.
E kaya wale tikoga oqo o Sisita Rebecca L. Craven, iKarua ni Daunivakasala ena Mataveiliutaki Raraba ni Goneyalewa: “Na bula vakatisaipeli i Jisu Karisito e sega ni oka walega kina na vakanuinui se vakabauta. … E gadrevi me da cakava e dua na ka.”2 Au sa vulica vakataki au ni dina oqo: na ka au solia ki na kosipeli sai koya oqori na ka ena soli mai vei au.
Me baleti ira na rai tiko mai taudaku, na ivakatagedegede ni noqu vakaitavi ena Lotu e rairai tautauvata ga me vaka e liu. Ia au sa veisautaka na noqu yalodina ki na kosipeli mai yaloqu. Ka sa yaco kina edua na veisau levu.
Na dauvolaivola e vakaitikotiko mai Wasigitoni, Amerika.