“Raica na Cakamana ni iVakabula ena Noda Bula,” Liaona, Jiulai 2023.
Na Cakacakamana i Jisu
Raica na Cakamana ni iVakabula ena Noda Bula
E va na lesoni mai na nona vakabula na mataboko na iVakabula.
Tiki ni droini mai na Sa Lumuta o Koya na Mata [He Anointed the Eyes], mai vei Walter Rane
Ena so na gauna ena noda bula eda dau nuitaka ka masuta na cakacakamana. E rawa ni baleta e dua eda dau lomana se me yaga sara ga vei keda. Eda nuitaka me saumi mai na noda vakatakekere, vakavinakataki na ka sa kavoro, vakamalumutaki na yalo ca, ka solia mai na Turaga ni cakamana na iwali eda gadreva. Ni sega ni yaco na veika eda namaka se ena gauna eda vinakata kina, eda dau vakataroga se cava na vuna.
O Moronai e vakatavulica, “Ka’u sa gadreva me’u vakamasuti kemudou na wekaqu lomani, mo dou nanuma ni sai koyakoya tiko ga na Kalou e nanoa, ena siga edaidai, ka sega ni mudu, ia na isolisoli kecega ka’u sa tukuna oqo, ka sa isolisoli vakayalo, era na tudei tu ka sega ni kau tani me vaka sa tudei ko vuravura, ia kevaka era sa mudu, sa vu ga mai na nodra tawa-vakabauta na luve ni tamata” (Moronai 10:19).
Era se tu beka ga ena noda gauna nikua na isolisoli kei na caka mana ka ra volai tiko oqori ena ivolanikalou? Ena rawa vakacava meda rawata na veivakalougatataki oqori? E kila tiko beka na iVakabula na veika e yaco tiko ena noda bula ka lomasoli me vueti keda mai na noda bolebole?
Au vinakata meu vakayagataka na cakamana ni nona vakabula na iVakabula na mataboko me rai rawa me yavu ni nodra saumi na vei taro oqo. (Me kena ivakaraitaki, raica na Maciu 9:27–31; 12:22–23; Marika 8:22–26; 10:46–52; Joni 9:1–11.)
Na Cava Eda Rawa ni Vulica me baleta na iLesilesi ni iVakabula mai na Nona Cakamana?
Me da kila vakavinaka na vakayacoka ni cakamana kivei keda kei na noda bula, meda tekivu ena noda kila nai balebale ni cakamana. Na cakamana “a nakiti me ivakadinadina vei ira na Jiu ni o Jisu na Karisito. … E vuqa vei ira era a ivakatakarakara talega, era vakavulica … na dina vakalou. … Na cakamana era isau ni vakabauta ka dau veivakayaloqaqataki uasivi sara. Era sega ni dau yaco ke sega na masumasu, tiko na gagadre dina, kei na vakabauta.”1
O Elder Ronald A. Rasband ena Kuoramu ni Apositolo Le Tinikarua a cavuta vakarawarawa ka totoka vakaoqo:
“Na cakacaka mana era cakacaka vakalou, na ivakatakilakila ka ivakaraitaki ni Nona kaukauwa tawayalani, kei na veivakadeitaki ni o Koya e “sai koyakoya tikoga na Kalou e nanoa, ena siga edaidai, ka sega ni mudu” [Moronai 10:19]. …
“… Na cakacaka mana era sa ikuri ni ituvatuva tawamudu ni Kalou; na cakacaka mana era sa iyatunibula mai lomalagi ki vuravura.”2
O koya gona, e dua na sala yaga me vulici kina na cakamana ni iVakabula ka vuli mai kina sai koya me nanumi tiko ni cakamana yadua e dusia tiko e dua na ka e levu cake mai na ka a yaco, ka vakasaqarai na veidina matata eso me baleta na Kalou kei na Nona cakacaka.
Me da veivosakitaka mada eso na dina eda rawa ni vulica mai na cakamana ni iVakabula ni vakayacora me rai tale na mataboko. Ena rawa ni wasei ki na va na lesoni me vakaoqo.
1. Na Vakalesui Mai ni Rai e a dua na iVakatakilakila ni Mesaia
O ira na parofita ni gauna makawa ka ra a vakadinadinataka na tadu mai ni Mesaia, era a tukuna na cakacaka mana ena mai vakayacora, oka kina na nodra na rai tale na mataboko.
Kivei Tui Penijamini, a kaya e dua na agilosi yalosavasava ni iVakabula ena “lako yani ena kedra maliwa na tamata, ka kitaka na veicakamana lelevu, me vaka na nodra vakabulai na tauvimate, na nodra vakaturi cake tale na mate, na nodra lako rawa tale na lokiloki, na nodra rai rawa tale na mataboko” (Mosaia 3:5; raica talega na Aisea 35:4–5).3
O koya gona, na cakamana ni rai rawa tale na mataboko e vakadeitaka na vei parofisai oqori me baleta na lako mai ni iVakabula kei na Nona veiqaravi vei ira na luve ni Kalou.
2. O Jisu na Rarama kei Vuravura
Na dina oqo a vakamatatataki ena gauna a sotava kina o Jisu e dua na tamata a sucu mataboko (raica na Joni 9:1–11). Ni ratou taroga na tisaipeli se a sucu mataboko na tamata oya ena vuku ni ivalavala ca, a kaya o Jisu sega, “ia me vakatakilai ga na cakacaka ni Kalou ena vukuna” (tikina e 3). Ia ni bera ni vakalesuya mai na nona rai na tamata oya, a kaya na iVakabula, “Niu sa tiko e vuravura, au sa rarama kei vuravura” (tikina e 5).
E vakamacalataka o Elder Bruce R. McConkie (1915–1985) ena Kuoramu ni iApositolo Le Tinikarua: “Ni bera ni dolava na mata ni mataboko, vakayago, o Jisu a vakananumi ira na rogoci Koya e liu ni, ‘Oi au na rarama kei vuravura,’ se vaka ni vakavulica tiko: ‘Ena gauna o nanuma kina niu a dolava na mata ni mataboko, vakayago, nanuma talega niu sa lako mai meu kauta mai na rarama ki na mata, vakayalo.’”4
E dodonu meda nanuma tiko na kena dau vakasamataki na ivalavala ca ena ivolanikalou me mataboko vakayalo kei na sereki mai na ivalavala ca me kena kautani na mataboko oqo. O Koya na “rarama kei vuravura” a vakayagataka tiko na ka a yaco oqo me vakatakarakarataka na cakacaka cecere a lako mai kina o Koya ki vuravura me mai cakava.
3. Ena Liu na Vakabauta qai Muria mai Na Cakamana
Ni lako tani mai Kapenaumi o Jisu, erau a muri Koya e rua na tagane mataboko, rau a kaci ka kaya, “Na Luvei Tevita, lomani keirau mai.” A qai vosa vei rau o Koya, ka taroga, “Drau sa vakadinata niu sa cakava rawa na ka oqo se segai?” Erau kaya, “Io na Turaga.”
Na ivakadinadina ni nodrau vakabauta ni rawa ni vukei rau na Turaga sai koya na nodrau cikeva me rau muri Koya kei na totolo ni nodrau vakatusa na vakabauta oya e matanalevu ni rau tarogi. A tara na matadrau na iVakabula, ka kaya, “Me yaco vei kemudrau me vaka na nomudrau vakabauta.” A totolo sara na kena vakayacoka: “A sa rai na matadrau” (Maciu 9:27–31).
E dikeva o Elder McConkie: “Vakawasoma ni dolavi na matadra na mataboko, o Jisu, me vaka eke, a salavata na ivakaro a cavuta kei na so na ivalavala vakayago. Ena gauna oqo kei na so tale na gauna a tara o koya na mata sega ni rai rawa.”
Na cava a cakava kina vakaoya na iVakabula? “E sega ni dua vei ira na cakacaka matalia oqo a gadrevi ki na cakacakataki ni kaukauwa ni veivakabulai,” a vakamacalataka o Elder McConkie. Ia eda kila ni vakabauta e liu qai tarava mai na cakamana, o koya gona “na inaki matata ni iVakavuvuli sai koya me vaqaqacotaka na nona vakabauta na tamata mataboko se didivara.”5
4. Ena so na Gauna Na Cakamana ena Yaco Mai na Vosa ena Vosa
Mai Pecisaita, era a kauta mai na tamata vei Jisu e dua na tagane mataboko. Ni oti nona tubera ki na ibili ni koro, o Jisu “sa qai kasivita na matana ruarua, ka tabaka e ligana.” A vakalesui mai vakatikina ga na nona rai na tamata oya ena tiki ni gauna oya, na iVakabula sa qai “tabaka tale na matana,” me rai vakavinaka kina. (Raica na Marika 8:22–26.)
E dusia o Elder McConkie na dina eda rawa ni vulica mai na ka a yaco oqo:
“E kena irairai ni veitaravi ni veitaratara vakayago vata kei Jisu e yaco kina na kena vakuri na inuinui, veivakadeitaki, kei na vakabauta vei koya ka sega ni rai rawa.
“Sa dodonu vei ira na tamata me ra vakasaqara na loloma veivakabulai ni Turaga ena nodra igu taucoko kei na vakabauta, kevaka mada ga e veirauti me iwali vakatikina ga. … Era na qai rawa ni rawata na ikuri ni veivakadeitaki kei na vakabauta me vakataucokotaki kina na veitikidra kecega. Era dau vakabulai talega na tamata mai na nodra tauvimate vakayalo vakamalua, dua nai kalawa ki na dua tale ni ra vakadodonutaka na nodra bula me salavata kei na ituvatuva kei na inaki ni Kalou.”6
Ena nona vakayacora na cakamana oqo ena rua na ikalawa duidui, na Turaga a vukea na tamata mataboko me tu vakarau me ciqoma na veivakalougatataki taucoko. Ena rawa beka ni da raica talega na ivakarau oqo ena noda vakasaqara na cakamana—e dua beka na ka e gadrevi meda cakava, se kua ni cakava, ni bera ni da tu vakarau ki na dua na veivuke e cecere cake?
Vakabauta Me Kakua ni Vakabulai
E dina ga ni da rawa ni raica na bibi ni vakabauta me yaco kina na cakamana, e bibi me da raica ni so na gauna o ira sara mada ga na Yalododonu yalodina duadua ena sega ni saumi na nodra gagadre kei na vakatakekere.
A vakatavulica vei keda o Elder David A. Bednar ena Kuoramu ni iApositolo Le Tinikarua:
“Na ivalavala dodonu kei na vakabauta sa yaga sara ena kena tosoi na ulunivanua—kevaka ena rawati kina na inaki ni Kalou ka salavata kei na Nona lewa ena kena tosoi na ulunivanua. Na bula savasava kei na vakabauta sa yaga sara ena nodra vakabulai na tauvimate, na didivara, kei na lokiloki—kevaka ena rawati kina na inaki ni Kalou ka salavata kei na Nona lewa. O koya gona, kevaka mada ga e kaukauwa tu na noda vakabauta, ena sega ni tosoi rawa e vuqa na veiulunivanua. Ka na sega ni vakabulai kece na tauvimate kei na malumalumu. Kevaka e muduki kece na veisaqasaqa, kevaka era kautani kece na veimate ca, sa na qai vakatawayagataki kece na inaki bibi ni ituvatuva nei Tamada.
“E vuqa na lesoni meda na vulica ena bula oqo ena rawa ni ciqomi duadua ga ena veika eda sotava ka so na gauna eda na kunea kina na rarawa. Ka sa namaka ka nuitaki keda na Kalou meda sotava na veika dredre ena bula oqo ena Nona veivuke me rawa ni da vulica na veika e gadrevi meda vulica ka yaco meda vaka na tamata meda vakataka ena tawamudu.”7
Au vinakata meu kuria na noqu ivakadinadina ki na nodra ivakadinadina na parofita ni gauna eliu kei na gauna oqo. Na cakamana era se yaco tikoga ena keda maliwa. Na iVakabula o Jisu Karisito sa ivurevure ni kaukauwa kecega, rarama, kei na veivukei. Au vakadinadinataka ni ena noda vakabauti Koya, eda na rawa ni vakabulai, ia kevaka eda sega ni vakabulai, eda se kune vakacegu tikoga mai vua na Tui ni Sautu, na Rarama kei Vuravura, kei na Dauniveivakabulai Levu Duadua.