“E Dusimaki Au Vakacava na Kalou meu Cakava na Nona Cakacaka?,” Liaona, Jiulai 2023.
Lako mai, Mo Muri Au
E Dusimaki Au Vakacava na Kalou meu Cakava na Nona Cakacaka?
Ena Gaunisala ki Tamasiko [On the Road to Damascus], Lifeway Collection / laiseni mai Goodsalt.com
Ni da wilika na italanoa ni saumaki nei Saula, eda sa vakauqeti ena nona ivalavala vua na iVakabula: “Turaga, na cava ko ni sa vinakata meu cakava?” (Cakacaka 9:6). Ni da tisaipeli i Jisu Karisito, eda dau taroga wasoma e dua na taro vakaoqori ni da segata me da vakaitavi ena cakacaka ni Turaga.
Ia na cava e qai yaco ni oti noda taroga na taro? Eda ciqoma vakacava na veidusimaki meda kila kina na loma ni Kalou me baleta na noda cakacaka?
Lomasoli me da Cakacaka
Me isau ni taro nei Saula me baleta na ka e dodonu me cakava, a sauma vakatotolo na Turaga enai vakaro me lako o koya ki Tamasiko. Ena so na gauna eda dau nuitaka me solia vei keda na Turaga na veidusimaki matata vaka oqori. Ia e sega ni gadrevi meda waraka na idusidusi ni vei ikalawa yadua ni bera ni da qai vakaitavi ena cakacaka ni Kalou.
E vakatavulica o Elder Dieter F. Uchtdorf ena Kuoramu ni iApositolo Le Tinikarua, “Sa vakavuqa, ni sega ni dau yaco mai na isau ni noda masu ena gauna eda tekiduru tiko kina, ia ena gauna eda tucake tiko kina ka qarava tiko na Turaga ka qaravi ira era tiko wavoliti keda” (“Wawa Toka Ga ena Gaunisala i Tamasiko,” Liaona, Me 2011, 76).
Vakasamataka na sala a liutaki rau ruarua kina na tamata oqo na Turaga ki na madigi me veiqaravi baleta ni rau sa tu vakarau me rau cakacaka:
-
Saula ena Cakacaka 9:20
-
Pita ena Cakacaka 9:32–42