Noda Gaunisala Yadua Ki Emeo

Mai vei Elder Patricio M. Giuffra

Ena Vitusagavulu

E lima na itaviqaravi rawarawa ena rawa ni vukei keda meda kila ni sa dau voleka tu ga na iVakabula.

O Jisu kei rau na tisaipeli ena gaunisala ki Emeo

A mate o tamaqu ena kenisa niu yabaki 4. Au a tubu cake ka vakataroga se cava na vuna me mate kina. Au a vakataroga na Kalou ka taroga se cava e sega ni dodonu kina na bula. Ni oti e tini na yabaki, niu sa yabaki 14, au a sotavi rau na daukaulotu. Ni rau a vakavulici keirau, a vakila o tinaqu ni rau a vakavuvulitaka tiko na dina ka dodonu me keirau vakarorogo. Ni keirau sa lewena na Lotu, sa yaco mai ki na noqu bula na kosipeli i Jisu Karisito kei na kena kilai vakavinaka na ituvatuva ni veivakabulai ena dua na gauna au a gadreva dina kina.

E muri, niu sa vauci vei rau na noqu itubutubu ena valetabu, a vakasolokakana vei au o tinaqu, “Au vakila ni tiko voleka o tamamu.” Niu vakasamataka na veivakalougatataki ni vauci, au kila ni turaga e kila tiko na neirau matavuvale ka dau tiko vata kei keirau vakawasoma, ena gauna mada ga keirau sega tu ni kila.

O sa bau lomatarotarotaka beka se kauwaitaki iko tiko na iVakabula? E kila beka o Koya na nomu sasaga kei na kauwai? Na cava ena tukuna vei iko o Koya kevaka e rawa ni o lako vata ka veivosaki vata kei Koya?

A Sala Vata kei Rau

Ni oti e tolu na siga mai na mate i Jisu Karisito, erau a taubale tiko e rua na Nona tisaipeli ena gaunisala ki na koro ko Emeo, ka rauta ni vitu na maile (12 na kilomita) mai Jerusalemi. Ea curuoso tu na lomadrau ena veinanuyaki kei na lomaleqa, ena gauna a tomani rau kina e dua na vulagi.

A taro na vulagi, “Ai tukutuku cava oqo drau sa veivosakitaka, ni drau sa lako tu, ka vakaveveku mata?”

Erau a tukuna na tisaipeli na veika a yaco wale tikoga oqo “me baleti Jisu mai Nasareci.” Era a vakabauta ni a lako mai ko Jisu me sereki Ira na Isireli, ia a beitaki vakatawadodonu ka vakamatei ena kauveilatai. Erau kaya talega ni o ira era kilai Karisito vinaka era kaya ni sa tucake tale mai na mate o Koya.

A tukuna vei rau na vulagi ni “drau sa sesewa, ka sega ni via vakabauta na ka kecega sa tukuna ko ira na parofita.” A railesuva o koya na veika e vakavuvulitaka na ivolanikalou kei na sala sa vakataucokotaka kina na Karisito na parofisai. Na ka oqo a vakasinaiti rau na tisaipeli ena reki.

Ni ratou yaco yani ki Emeo, erau a kerei koya na tisaipeli me “tiko ga kei [rau].” Ena gauna ni vakayakavi a vakalougatataka na madrai na vulagi ka dovia. Vakasauri sara, erau a kila na tisaipeli ni vulagi e sai koya sara ga na iVakabula vakaikoya! (Raica na Luke 24:13–32.)

Ena Tiko Vata Ga kei Keda o Koya

Eda na vakataroga beka se cava erau a sega ni kila kina na tisaipeli e rua ni lako vata tiko kei rau na iVakabula. Ia sa dau vakavuqa na noda sega ni kila ni dau lako vata voli kei keda o Koya? E vakavuqa eda dau vakanamata ki na veibolebole eso, kei na marau sara mada ga, ena noda bula ni veisiga ka da lecava kina ni voleka e yasada na iVakabula.

Eda na sega beka ni raica na Nona dau tiko vata kei keda, sasaga vata kei keda, cakacaka vata kei keda, ka tagi vata kei keda. Ena gauna mada ga ni rarawa, kevaka eda vakaraica, eda na rawa ni vakilai Koya ka rogoca na Nona vosa: “Dou tiko lo, ka mo dou kila niu sa Kalou” (Same 46:10, vakaikuritaki; raica talega na Vunau kei na Veiyalayalati 101:16).

Na Noda Sala Yadua

Sa tiko na noda icavacava meda yacova yani ena bula oqo. Ena so na gauna ena noda ilakolako, eda na sotava beka na tauvimate se da sotava na dredre ena vuku ni noda malumalumu. Ena tu beka na leqa vakailavo se na bolebole eso e yaco mai na rawa-ka, vutuniyau, kei na dokadoka.

Ni da lakova na noda gaunisala yadua ki Emeo, e sega ni dodonu meda lako duadua voli. Eda rawa ni sureta na iVakabula me tiko ga vei keda. Oqo e lima na itaviqaravi rawarawa ena vukei keda meda toro voleka yani Vua.

Droini mai vei Lovetta Reyes-Cairo

1. Masu e Veisiga

Na masu e dodonu me liu taumada ena noda bula e veisiga. E rawa ni vukei keda me da ciqoma na veitokani kei na veidusimaki nei Tamada Vakalomalagi. E rawa ni da kerea na veivakaukauwataki me da muria na Luvena kei na kaukauwa ni Yalo, vakauasivi ena gauna e rawa ni muataki keda kina ki na ivalavala ca na noda vakanananu.

Na gonetagane o Josefa Simici, ni vakatakekere vua na Kalou ena masu me saumi mai, a kunea na vuni ca ni tovolea tiko me tarovi koya (raica na Josefa Simici—Ai Tukutuku 1:16). Me vakataki Josefa, sa dodonu meda gugumatua ena masumasu ka nuitaka tiko ni Tamada Vakalomalagi e sega ni dau oca me rogoci keda. Ena vukei keda o Koya me da kila na Nona gauna kei na Nona isaunitaro.

2. Kana Magiti mai na iVolanikalou

Sa ivakaraitaki vei keda na iVakabula ena nona vulica na ivolanikalou. E dau cavuta wasoma o Koya ena nona veivakavulici. Na vuli ivolanikalou e veigauna ena vukei keda me matata ka tadolavi na noda vakasama, ka na tiko vei keda e dua na yalo dau veiciqomi ka vakamareqeta na vosa ni Kalou, kei na liga e vakarau tu me veiqaravi.

Ni da vulica na ivolanikalou, na Yalo Tabu ena vakasinaiti keda ena gagadre meda caka vinaka. Ena vakamakaretaka na noda raivotu me da raica na veika e sega ni raica na matada vakayago. Ena vukei keda meda rogoca na nodra tagi na vakaleqai. Eda na vakalougatataki ni da muria na nona ivakaraitaki na iVakabula ena nodra vakacegui o ira era gadreva tu na veivakacegui (raica na Mosaia 18:8–9). Ka oti, ni da vakayacora na ilesilesi ni siga oya, eda na sega ni lako duadua. Ena lako vata kei keda na iVakabula dua na ikalawa ena dua na gauna.

3. Muri ira na Parofita Bula

E dodonu meda muria na ivakasala ni noda parofita lomani, o Peresitedi Russell M. Nelson, kei ira na parofita, daurairai, kei na dauvakatakila tale eso. Eda na qai raica ni noda gaunisala ki Emeo ena taqomaki ka matata. Era na dusimaki keda vakavinaka ka vukei keda meda kila ni sa tiko vata kei keda na iVakabula.

4. Sureti Koya me Tiko Ga

Ni da vulica na veika baleti Jisu Karisito kei na noda talairawarawa ki na Nona ivakaro, eda sureta na iVakabula me tiko vata kei keda. Eda vulica meda kidava na Nona veivakayarayarataki ena noda bula.

Oi rau na tisaipeli e rua ena gaunisala ki Emeo erau a lako vata kei na iVakabula, rau veivosaki kei Koya, ka vakila na katakata ni lomadrau (raica na Luke 24:32). Na nodrau vakamamasu Vua, “Ni tiko ga kei keirau” (Luke 24:29), e dodonu talega me noda vakamamasu.

Ni rau qai kila na iVakabula na tisaipeli, a yali vakasauri o Koya mai na matadrau. Erau a lesu kusarawa na tisaipeli ki Jerusalemi ka vakadinadinataka vei iratou na iApositolo ni sa tucaketale na iVakabula. Ni rau vakadinadina tiko, na Turaga a “tu tale ena kedra maliwa” (Luke 24:36). Eda rawa talega ni vakilai Koya ni tiko o Koya ena keda maliwa.

5. Vakavouya e Veigauna na Veiyalayalati

Na cakacaka vakalotu kei na veiyalayalati ni kosipeli i Jisu Karisito e rawa ni veisautaka na noda bula. E kaya o Peresitedi Dallin H. Oaks, iMatai ni Daunivakasala ena Mataveiliutaki Taumada, “Na noda sokalou kei na bulataki ni ivakavuvuli tawamudu ena kauti keda vakavoleka vua na Kalou ka vakalevutaka na noda rawa ni loloma.”¹ Me kena ivakaraitaki, na papitaiso e vakatara vua na Turaga me vakasavasavataki keda. Ka kevaka eda sa yalodina ka talairawarawa, ena vakarautaki keda na veiyalayalati ni valetabu kei na cakacaka vakalotu meda laki bula ena dua na siga ena iserau nei Tamada kei na Luvena.

Na sakaramede e vukei keda meda nanuma ka vakatara meda vakavouya na noda veiyalayalati, meda veivutuni, ka tovolea tale. Ni da taura na sakaramede, eda sa vakaraitaka na noda lomasoli me da taura vei keda na yaca i Jisu Karisito ka yalataka me da dau nanumi Koya ka muria na Nona ivunau. Sa qai yalataki vei keda ni na tiko vata ga kei keda na Yalona. (Raica na Vunau kei na Veiyalayalati 20:77, 79.) E dodonu meda dau nanuma tiko na cakacaka vakalotu kei na veiyalayalati eda sa cakava oti.

Na iVakabula Ena Voleka

Ena noda sala vakaikeda ki Emeo, sa sureti keda tiko ena loloma na iVakabula meda lako mai Vua ka rekitaki Koya. Ni da masu e veisiga, kanamagiti mai na ivolanikalou, muri ira na parofita bula, sureti Koya me tiko ga kei keda, ka vakavouya ka rokova na noda veiyalayalati, ena voleka vei keda o Koya. Ena qai yaco me da kila, me vaka nodrau a qai kila na tisaipeli ena gaunisala ki Emeo, ni sa tucake tale o Jisu Karisito ka sa bula dina tiko o Koya ka lomani keda.

Au vakadinadinataka ni o Jisu Karisito sa noda iVakabula ka noda Dauniveivueti. Sa gadreva tu o Koya me tiko vata kei keda ka dusimaki keda meda taqomaki ena noda ilakolako.