Domodra na Yalododonu Edaidai

O Vakabauta Li na Kalou?

Mai vei Shirl Brown Jr., Nevada, Amerika

Ni wasea na o noqui tokani yalewa na nona kauwai, a lako vakasauri mai vei au e dua na kusai ni kila ka.

Droini mai vei Katy Dockrill

Niu tubu cake tiko, au sega vakadua ni vakatitiqataka na dina ni kosipeli. Ia, niu yacova yani na yabaki tinivakacaca, au a vakataroga se tiko dina e dua na noqu ivakadinadina seu a ciqoma ga na ka erau vakabauta na noqu itubutubu kei ira na itokani. Au a masuta meu rawa ni kila ni kosipeli e dina.

Dina niu sotava na dredre, au a sotava e dua na goneyalewa ena koronivuli e na noqu itikotiko ka tukuna vei au ni vakila niu kila vinaka na inaki kei na vanua e mua tiko kina na noqu bula.

“O vakabauta li na Kalou?” a tarogi au o koya.

Au tukuna vua io baleta na noqu lotu e vakavulica na noda veiwekani kei na Kalou kei na inaki ni bula. Au a tukuna talega vua me baleta na Parofita o Josefa Simici kei na Veivakalesuimai. A vakarorogo matua sara o koya.

Ena Sigatabu ka tarava e valenilotu, au a tomika eso na tikidua baleti Josefa Simici kei na ituvatuva ni veivakabulai me nei noqu itokani. Ni wiliki ira oti ka vakatekivu me wilika na iVola i Momani, au a kauti koya ki lotu.

E muri a qai tukuna vei au o koya ni rau dau veivolekati sara kei tuakana tagane. Ea dua o koya na pailate ka dau vakaraitaki ivukivuki e macawa ena soqo ka dau caka ena vanua e tiko kina. E ka ni rarawa, ni ena vulaikatakata ni bera na neirau sota, e a mate kina o koya ni a vakaitavi voli ena dua na soqo vaka oya. A rarawa sara vakalevu o koya ena nona mate, ka leqataki koya baleta ni o koya e vakatusa ni sega ni tiko edua na kalou. A masulaka tiko me kila na ituvaki kei na itutu ni nona bula ena mata ni Kalou.

Ni wasea na nona kauwai, a lako vakasauri mai vei au e dua na kusai ni kila ka. Sai koya na vakilai ni dina savasava kei na rarama. Au kila ni a sega ni yaco vakacalaka na neirau sota. Ia, na Kalou e a rogoca ka sauma na nona masu ena yalodina na goneyalewa yalokavoro oqo.

Au a vakayalomalumalumutaki niu kila ni kauwaitaki au tiko na Tamada Vakalomalagi ka nanuma niu sa kilikili meu iyaya ni cakacaka e Ligana ena saumi ni nona masu. Sa qai matata vei au na cecere ni nona vuku, ni vakayagata na veika au sotava oqo me sauma talega kina na noqu masu, meu kila ni kosipeli e dina.

Ni oti na noqu vakavakarau, au a vakatawana na noqu kato ki na rua na yabaki vinaka duadua ni noqu bula. Ena gauna vata oya, o noqu itokani kei tacina yalewa erau a tauri lesoni tiko mai vei rau na daukaulotu. Erau a lewena ruarua na Lotu ka rau a qai veiqaravi talega vakadaukaulotu. Ni oti na noqu kaulotu, a kerei au na noqu itokani meu cakava na cakacaka vakalotu ni valetabu baleti tuakana tagane.

Au kila ni Kalou e dau rogoca ka sauma na masu ena yalodina, ka dina ga ena so na gauna ena ivakarau se gauna eda sega ni namaka.