Yavu Taumada ni Kosipeli

Na Wasei ni Kosipeli i Jisu Karisito

Ni da vakasamataka na veivakalougatataki eda ciqoma baleta ni da sa lewe Na Lotu i Jisu Karisito ni Yalododonu Edaidai, eda na vinakata me da wasea na kosipeli vei ira eda lomana. E rawa ni da wasea na noda ivakadinadina me baleta na dina, ena noda vosa kei na noda ivakaraitaki. E rawa ni da masuta na veivakauqeti me da kila o cei me da veiwasei kina kei na ka me da tukuna.

Lomani Ira na Tani

E dua na tiki bibi ni wasei ni kosipeli sai koya na nodra lomani ira na tani. Ni da vakaraitaka na noda loloma vei ira na tani ena ivalavala va-Karisito, eda sa wasea tiko na kosipeli i Jisu Karisito—ena so na gauna ena sega ni cavuti e dua na vosa. Ia ni ra kila na tani ni da kauwaitaki ira vakaidina, era na rairai dolavi ira me ra rogoca na noda nanuma me baleta na kosipeli. (Raica na Gary E. Stevenson, “Loloma, Wasea, Sureta,” Liaona, Me 2022, 84–87.)

Veiwasei ena iVakarau Matau dau Caka e Veisiga

E rawa ni da wasea na veika eda taleitaka me baleta na kosipeli. Ni da vakayacora oqo me tiki ni noda bula e veisiga, ena sega ni sakasaka se logaloga ca. Me kena ivakaraitaki, e rawa ni da veitalanoa kei ira na noda matavuvale kei na itokani me baleta na veika eda dau cakava ena Sigatabu. Se e rawa ni da tukuna vei ira me baleta na marau eda vakila ni da veiqaravi vei ira na tani. (Raica na Dieter F. Uchtdorf, “Na Cakacaka ni Kaulotu: Wasea na Veika e Tu e Yalomu,” Liaona, Me 2019, 15–18.)

Sureti Ira na Tani me ra Tomani Keda

Eda rawa ni sureti ira na tani me ra vulica eso tale na ka me baleta na kosipeli. Me ivakaraitaki, e rawa ni da sureti ira me ra lako mai ki na dua na soqoni se itaviqaravi ni Lotu, wilika na iVola i Momani, sarava e dua na vidio ni Lotu, se sota kei ira na daukaulotu. Na veika sotavi oqo e rawa ni vukei ira me ra vakila na Yalo ka vinakata me ra vulica eso tale na ka.

Taroga me baleta na Veika Era Sotava

Ni oti nodra gole mai ki lotu na itokani kei na lewe ni matavuvale se taura e dua na lesoni mai vei ira na daukaulotu, sa rawa ni da tarogi ira me baleta na veika era sotava. Eso na ivakavuvuli ni kosipeli e rawa ni ka vou vei ira, ka rawa meda sauma na nodra taro. E rawa ni da vakaraitaka na noda loloma kei na veitokoni me baleta na nodra sasaga me ra lako mai vei Karisito.

Vakuria na Nodra Vakabauta

Eda vakamareqeta ka rokova na nodra vakabauta na tani, ka da tovolea me da vakuria na vakabauta sa tu rawa vei ira. Me ivakaraitaki, e dua na itokani ka sa kunea na veivakacegui mai na veitikina eso mai na iVola Tabu e na rawa talega ni kunea na veivakacegui mai na ivakavuvuli eda wasea mai na iVola i Momani.

Vukei Ira na Lewe ni Lotu Vou

Ni ra curu mai na tamata ki na Lotu, e rawa ni da vukea na vaqaqacotaki ni nodra vakabauta. E rawa ni da nodra itokani, sauma nodra taro, ka tokoni ira ni ra ciqoma na veikacivi. E rawa ni da vakayaloqaqataki ira me ra muri Jisu Karisito tikoga ka vulica na Nona kosipeli.

Veiqaravi Vakadaukaulotu Tudei

Me ikuri ni noda wasea na kosipeli ena noda bula e veisiga, o ira na lewe ni Lotu e rawa ni ra kacivi me ra veiqaravi vakadaukaulotu tudei. Kevaka era sa vakarau tu, e rawa ni ra veiqaravi na cauravou ni ra se qai yabaki 18. E rawa talega ni ra veiqaravi na goneyalewa kei ira na qase cake. E rawa ni o kunea eso tale na ivakamacala ena ChurchofJesusChrist.org/callings/missionary.

Mai na iVolanikalou

A vakaroti ira na Nona tisaipeli o Jisu Karisito me ra wasea na kosipeli vei ira na tamata kecega (raica na Marika 16:15).

O ira era sa kacivi me ra veiqaravi e dodonu me ra vakayacora ena “yalomudou taucoko, igu, vakasama, kei na kaukauwa” (raica na Vunau kei na Veiyalayalati 4).

Eda na reki vakalevu ni da veivuke ena nodra kau mai na tani ki na kosipeli (raica na Vunau kei na Veiyalayalati 18:15–16).

iVurevure eso ena Initaneti

“Meu na wasea vakacava na iVola i Momani vua e dua na itokani?” “Meu na veikilaitaka vakacava na noqu itokani vei rau na daukaulotu?” Ena saumi na veika oqo kei na taro tale eso ena ChurchofJesusChrist.org/share.

Na Gospel Library (ena ChurchofJesusChrist.org se na app veikauyaki) e tiko talega kina eso na ivurevure, oka kina na veika eso eda vakabauta. Digitaka na “Sharing the Gospel” mo vulica eso tale na ka me wasei kei na sala me wasei kina.

Me vulici e levu tale na ka me baleta na nodra vaqaqacotaki na lewenilotu vou, raica na Valenivola Vakosipeli ena ruku ni “iVoladusidusi kei na Veikacivi” oti qai “Veikacivi ena Tabanalevu se Tabana.”

Vakaraica Eso Tale

Kevaka e tiko na nomu taro me baleta na wasei ni kosipeli, e rawa ni o veitalanoa kei ira na nomu turaga se marama dauveiqaravi, o ira na nomuni iliuliu ni tabanalevu se tabana, se o ira na daukaulotu.