Tomani Tikoga na Noqu Kaulotu

Mai vei Christopher Deaver, California, Amerika

Na iotioti ni ivola nei tamaqu ena vukei au vakalevu ena noqu veisiga ni mataka, ka solia vei au na vosa e vakaibalebale vakalevu sara vei au.

Au a marautaka tiko na noqu kaulotu tudei ena veiulunivanua totoka e Cajamarca, Peru, ni a tauvimate vakasauri ko tamaqu. Ni oti vakalailai oya, a mai takali yani.

Niu sota kei noqu peresitedi ni kaulotu, au a tagi niu nanuma ni a vakavulica vei au o tamaqu na kena ibalebale meu dua na daukaulotu ka tagane yalodina. E dau volavola mai vei au e veimacawa, ena nona wasea nona ivakadinadina, ka vakavulici au ena veivakararamataki kaukauwa ni kosipeli, ka vakayaloqaqataki au meu cakava na noqu vinaka duadua.

Ni oti neirau sota, a solia vei au o peresitedi ni kaulotu e dua na ivola—na iotioti ni ivola mai vei tamaqu. Na nona ivola a solia vei au na ivakasala ki na noqu veisiga ni mataka, ka solia vei au eso na vosa e vakaibalebale vakalevu sara vei au:

“E dua tale na nomu [kaulotu] ena yaco mai ena vica na vula mai oqo—e dua ka dredre sara, ka o na namaki mo vakatabuya kina na nomu bula ki na ivakavuvuli o sa vakavulica oti, mo cakava na veika, me yacova na gauna oqo, o se vunautaka walega. E rawa ni nomu kaulotu vuavuai vinaka duadua. O sa vaka na leveni ena loma ni ibuli madrai. …

Keitou lomani iko ka dau masulaki iko e veisiga. Cakacaka vakaukauwa ka cakava na veika dodonu.”

Niu wilika na nona vosa, au a tagi—ena rarawa, niu kila ni sa iotioti ni nona vosa vei au ena bula oqo, ka reki, niu kila na kena kaukauwa kei na kena yaga vei au. Au kila ni noqu kaulotu e tarava—na vo ni noqu bula—e na bibi sara vei au. Ena dua dina na gauna ni vakatovolei, ka na gadrevi kina na veika kece au sa vulica ka sotava oti vakadaukaulotu.

Au kila ni tiko na ituvatuva bibi ni Tamada Vakalomalagi me baleti keda yadua. O Koya e rawa ni vakavinakataka cake na noda bula e vuravura ka solia vei keda na matarai kei na loma e kila-ka me da kila kina na Nona dina. Au sa raica oqo niu solia na noqu bula Vua ka vakila na Nona veivakalougatataki. Kau sa raica oqo ni keirau cakacaka vata kei watiqu totoka me taracake e dua na matavuvale ka vakasinaiti ena inuinui, gonelalai, kei na kosipeli.

Na iVakabula sa vakaukauwataki keirau ni keirau goleva na masu, gole ki na ivolanikalou, gole ki na valetabu, ka gole vei ira tale eso me veiqaravi. Au sa raica na liga ni Turaga ena nona vukei au ena veigauna veivakurabuitaki ena noqu bula niu wasea na kosipeli vei ira na matavuvale kei na itokani.

Na nona cakacaka sai koya “meu vakavuna na tawamate rawa kei na bula tawamudu ni tamata” (Mosese 1:39). Na kaulotu oya a tomani tikoga vakaidina.