ENNAAN AN RITŌL AN ERIA
Bōk Kam̧ool kōn Kūr eo Aō n̄an Jerbal
Eaar juon ijino ekāāl n̄an n̄a ālkin 30 iiō in jerbal ilo Kabun̄ in, ikar retire, im kar kile bwe kiiō eļap aō iien. Jerbal ilo Kabun̄ eo An Jisōs Kraist im Armij ro Rekwojarjar ilo Raan Ko Āliktata ekar juon kōjeraam̧m̧an me ekar ļap ijo kōn wōn n̄a im ta eo iaar karōke n̄an kōm̧m̧ani ilo iien kakkije ko aō.
Kar kāālet eo aō jinointata n̄an iien kakkije eo aō ej n̄an lo̧ļo̧k ļaddik ro jilu nejū im baam̧le ko aer ilo Utah iumwin jiljilijno allōn̄. Lio pāleō enkar kobatok ippa tokālik bwe ekar jerbal wōt. Ilo Oktoba 2019, ke ij pād Utah, ej kab kein kajuon aō etal n̄an kweilo̧k eo eļap. Ekar juon iien eo em̧m̧an im eaiboojoj ilo jetōb ikar en̄jake ilo kweilok ko an Kabun̄ in. Aolep men ko ikar loi, ron̄, im en̄jake ilo im̧ōn kweilo̧k eo ekar kobrak eō kōn kam̧m̧oolol im iakwe n̄an gospel in im kōn aolep men ikar ekkatak ilo Kabun̄ in jān iien eo ikar peptaij ilo 1977.
Iaar kōmjaļaaļ ke ikar al kōn al in jar ko. Iaar būlōn̄ ke iaar loe 15 rikanaan ro im rijilōk ro remour aolep rej jijōt ippān doon ioļapen ritōl ro reutiej jet im Tabernacle Choir eo ilo Temple Square raiboojoj in enjeļ. Al eo an jarlepju eo ekar kaiookļo̧k lan̄, im ikar kōņan bwe ainikien en eļaaj ilubwilijin ro jet 23,000 rej pād ijo. Ekar juon en̄jake aiboojoj.
Ālkin an lio ippa kobatok ippa ilo Utah, komro kar etal n̄an California n̄an lo̧ļo̧k baam̧le ko an im ekar ijo in me ikar bōk juon kool ikar jab kōtmene jān Būreejtōn Ian Ardern, Pacific Eria Būreejtōn eo. Ekar kajjitōk n̄āāt ij rool n̄an Fiji innām ekar ba emenin kōkairiir an aikuj lo eō. Ikar ba n̄an e bwe inaaj rool n̄an Utah wiik eo tok juon, kiiō Būreejtōn Ardern ekar ba enaaj kōnnaan ippa iien eo.
Ekar jab em̧m̧an aō kiki ālkin kool eo. Kōļmenļo̧kjen eo aō ekar inepata. Aolepen m̧wilū aolepen raan in holiday ko aō rekar oktak.
Kar Elder Carl B Cook jān Būreejtōnji eo an Jiljilimjuonn̄oul eo ekar kōnnaan ippa raan eo juon, im lio pāleō im n̄a kar ettōr n̄an headquarter ko an Kabun̄ in n̄an ioon e. Ekar juon en̄jake ettā n̄an bōk kūr n̄an jerbal āinwōt juon Eria Jiljilimjuonn̄oul. Ijan̄in kar eļļo̧k jān juon kūr ilo 42 iiō in aō uwaan Kabun̄ in, menin ekar oktak. Ikar obrak kōn en̄jake in likjab; ikar en̄jake jab pojak. Ekar waļo̧k aō kōmjaaļaļ im̧aan kōrā eo ippa im Elder Cook. Menin ekar lukkuun waļo̧k ke?
Aolepen mour eo aō iaar reilōn̄ļo̧k n̄an Ritōl ro Reutiej im opija ro reutiej an Kabun̄ in—rekar kāālet in Anij im kar kautiej er ilo aolepen Kabun̄ in. Aolep kūr ko aō m̧ae iien in rekar jen ijo jikū. Ejjan̄in wōr ilo ettōņak ko aō n̄an kabwijer juon kūr an Eria ekkelejiajtik eutiej.
Iaar m̧ōjņō n̄an bōk ta eo kar kajjitōk bwe in kōm̧m̧ane, bōtaab pere ilo maron̄ eo aō n̄an kakūrm̧ool kūr in ekar jakoļo̧k im ijelo̧kin, ikar obrak kōn kam̧m̧olool kōn aō Rilo̧mo̧o̧r, kōn iakwe im tiriam̧o eo An. Ikar en̄jake juon ļōmņak erreo n̄an jerbal n̄an Irooj ilo eddo in. Menin ekar juon iien em̧m̧an n̄an aō kwaļo̧k iakwe eo aō n̄an E im Kabun̄ eo An. Eoon eo me ekar itok ilo ļōmņak eo aō kōn juon im̧we ekajoor ekar Katak im Bujen Ko 82:3, “Bwe jān e eo n̄an e eļap kar leļo̧k eļap aikuji . . .”
Kar rejtak eō ilo Eprōļ 2020 ilo Kweilo̧k eo Eļap, me ej kab kar juon katten an Kabun̄ in kōm̧m̧ane ilo mejatoto. Ekkatak eo aō āinwōt juon Eria Jiljilimjuonn̄oul ekar bar kōm̧m̧an ilo mejatoto āinwōt ke ajedeed in COVID ekar ļap. IIō eo aō kein kajuon ilo kūr in em̧ool ekar kabwilōn̄lōn̄; rejtak eo ikar bōk jān Pacific Eria Būreejtōnji, Eria Jiljilimjuonn̄oul ro jet mōtta, im Ritōl ro Reutiej rej lotok ekar em̧m̧an. Ito-itak n̄an kweilo̧k ko an stake im pād ilo kweilo̧k ko reļļap ilo lukkuun armij rekar men ko raorōk ilo iien in, obrak kōn en̄jake in ekkatak im eddōkļo̧k ko rem̧m̧an.
Ijoke, ilo tum̧wilaļ ikar m̧ōjņo̧ wōt, eļaptata ilo iien emeemļo̧k ko kōn n̄a make. Ikar en̄jake pere im likjab ilo jerbal in jipan̄ eo aō āinwōt juon Eria Jiljilimjon̄oul.
Ekar jab m̧ae m̧wen̄an eo ļo̧k an Ritōl ro Reutiej, Eria Jiljilimjuonn̄oul im Kaminene an Ritōl Opija ro Routiej an Kabun̄ in, ilo Eprōļ 2021 kweilo̧k eo eļap, ke ikar bōk juon kam̧ool ilo jetōb men eo ikar kapukōte jān kūr eo aō. Ijamin meļo̧kļo̧k iien eo.
Laajrak in m̧wen̄an eo ekar n̄an aolep Rijilōk im Rikanaan ro 15 n̄an kwaļo̧k aer naan in kam̧ool im kam̧ool kōn Jisōs Kraist. Aorōk im kwojarjar eo an iien in eaar aiboojoj. Kar naan in kam̧ool eo an Neil L. Andersen eo ekar ukōt aō kalimjōkļo̧k im letok n̄an eō aenōm̧m̧an eo ikar kapukōte.
Elder Andersen ekar kōm̧eļeļe kōn en̄jake eo an ke kar kūr i n̄an Doulul eo an Jon̄oulruo Rijilōk ro. Ekar ba ke ekar jinoin jijōt ilo jea eo me Elder Soares bōk jikin ie kio, ekar kalimjōkļo̧k ro 11 uwaan Rijilōk ro im Būreejtōnji eo Kein Kajuon, im en̄jake ko ke ijjab maron̄ ekar kobrak e. Ke ikar ron̄ an Elder Andersen ba men eo ikar kajim̧we eō ilo jea eo aō kōnke ikar jeļā bwe men eo ekar ba—im ta eo ekar tōn ba tokālik—ekar jejjet n̄an n̄a.
Elder Andersen ekar ba ke ekar m̧ōjņo̧ kōn un in iumin elōn̄ iien innām ekar itok: E ekar ron̄ ainikien an Irooj ba, “Neil, kwaar jab likūt kwe make ijo. N̄a iaar, kōnke Ij iakwe eok, im ijeļā kwomaron̄ oktak, im ijeļā kwomaron̄ jipan̄ ilo jerbal eo aō.”
Ke Elder Andersen ekar kwaļo̧k en̄jake in an ekwojarjar, ekar barāinwōt ekwojarjar n̄an n̄a. Kar kam̧ool eo in ikar aikuji.
Ijeļā bwe Jemedwōj Ilan̄ im Nejin rekar jab kūr eō kōnke kōn jabdewōt men ikar kōm̧m̧ani n̄an jerbal in, bōtaab kōnke rej iakwe eō. Rejeļā imaron̄ oktak, im rejeļā imaron̄ jipan̄ er ilo jerbal in aer eaiboojoj: n̄an boktok mour in jab wabanban im mour indeeo an armej. (Lale Moses 1:39.)