BWEBWENATO KO AN IJO JOKWE IE
Kōjparok ilo Pā ko Pein
N̄a kab ļeo ippa Eddie ewōr jilu nejimro ajri: Indie-Rose, Rollo, im Kamaukiterangi (Kamau). Ilo Jānode 12 2022, kar kabūrom̧ōj kōm kōn jako eo an ļaddik eo nejim 2-iiō-rūtton, Kamau.
Ilo rālepen eo, ikkure im ettōn̄ ippan ajri ro nejim ilo jikin jokwe eo am, kar jidimkij am kile bwe Kamau ekar jako. Jejjo̧ iien tokālik kōm kar loe Kamau ilo meļan eo am̧ ejjab m̧akūtkūt. Eddie ekar CPR e m̧ae iien eo ekar itok paramedics ro ke baam̧le eo aō ej akweļap n̄an jipan̄ eo an Jemedwōj Ilan̄.
Kar buul kake Kamau n̄an aujpitōļ eo ijo juon kumi in taktō rekar kōttar e. Ke kōmij tōparļo̧k, kar bōkļo̧k komro Eddie n̄an juon ruum̧ em̧ake ijo kōm kar joļo̧k jejjo̧ minit jibwe pein doon, iļļak kar jar. Āliktata juon taktō ej deļōn̄tok, kar jijōt im̧aam̧ro im jino kōnono.
Ikar jab maron̄ ron̄ jabdewōt naan ko ekar ba bwe aolep men ipeļaakū rekar lūr, ejjeļo̧k ainikien, im aenōm̧m̧an—innām, āinwōt alikkar in raan, ikar loe ļaddik eo nejū im̧aō ej ikkure kōn juon waan kein ikkure, kar ettōn̄ dikdik im m̧ōņōņō. Ekar iien eo in ikar jeļā bwe ļaddik eo nejū ekar mej. Ikar barāinwōt jeļā bwe en̄in ej wāween an Jema Ilan̄ kōpooj eō n̄an ta eo ej itok.
Kar m̧ae iien jotenin eo ke ij lukkuun meļeļe aorōkin iien eo.
Jinō ekar atbakwoj eō ke ij jan̄ ilo pein, jab maron̄ ineek an jako ajri eo nejū. Ekar kajjitōk ippa, “Kwollu ke ippān Jemedwōj Ilan̄?” Ikar uwaak, “Jaab, ijjab illu, bōtaab E ekar kejool eō, Mama. Ikar akweļap bwe enjab bōk ļaddik eo nejū. Ikar akweļap n̄an Jemedwōj Ilan̄ n̄an jouj im kōtļo̧k bwe en pād wōt. Bōtaab E ekar kejool eō.”
Jinō ekar jiron̄ eō ilo iakwe, “Jemedwōj Ilan̄ ekar jab kejool eok. E ekar ron̄jake eok. E ekar kōm̧m̧ane juon kabwilōn̄lōn̄ n̄an kōppelļo̧ke rōn̄ōl nuknuk eo n̄an lan̄ im kōtļo̧k bwe kwon loe bwe E ej pād ippān Kamau, im enaaj kōjparok Kamau ilo Pein n̄an indeeo.”
Tokālik ilo iiō eo, ilo kaloojoj eo n̄an Hamilton New Zealand Temple, ikar en̄jake kijerjer im ikūm̧kūm̧. Ikar ba n̄an ļeo ippa, “Ij lōmņak Kamau ej kōttar eō lowaan tampeļ e. Ij ļōmņak enaaj pād ijo ippa.”
Ilowaan tampeļ eo, ruum̧ eo wōt ikar kōņaan loe ej Celestial Room. Ke ikar kōttar n̄an deļon̄, rikaloojoj eo am ekar ba n̄an kumi eo am, “lukkuun joļo̧k aō bwōd ak enaaj ejjeļo̧k ad iien ilo Celestial Room. Bōtaab imaron̄ kallim̧ur n̄an kom, ro jeiū im jatū, bwe mekarta iien eo am ekadu, kōjeraam̧m̧an ko kwonaaj bōki renaaj bwe n̄an kabwe aolepen mour in indeeo. Im men eo eaorōktata kwonaaj en̄jake iakwe eo an ad Rilo̧m̧o̧o̧r Jisōs Kraist.”
Ke kōmij tōn deļon̄ļo̧k, leddik eo nejū Indie-Rose ekar jibwe peiū im m̧ōņōņō ke ej ba n̄an n̄a, “M̧am̧a, ruum̧ eo eaorōk kwaar jiron̄ eō kake in?”
Ikar uwaak, “In̄n̄ā, en̄in.”
Innām ekar kajjitōk ippa, āindein ke naaj iien eo jej loe Kamau?”
Ikar uwaak, “In̄n̄ā, enaaj āindein āinwōt n̄e jenaaj etetal ļo̧k n̄an wetaan ne im e pād.”
Kōmjaļaaļ ekar wōtlo̧k ilo meja ke kallim̧ur eo an rikaloojoj eo ekar m̧oktaļo̧k kūrmool. Ikar en̄jake iakwe eo erreo an ad Rilo̧m̧o̧o̧r Jisōs Kraist ej kaenōm̧m̧an eō. Ikar en̄jake bwe naan ko an rikaloojoj eo rekar ennaan ko n̄an n̄a jān Jemedwōj Ilan̄, jiron̄ eō bwe mekarta iien eo aō ippān ļaddik eo nejū ekar kadu, kōjeraam̧m̧an ko im iakwe eo aō n̄an e enaaj kabwe mour indeeo.
Ilo aolep ruum̧ ilo tampeļ—aolep pija im aolep kōmeļeļe—ikar en̄jake jetōb in ļaddik eo nejū em̧m̧an Kamau. Ekar juon kam̧ool n̄an n̄a bwe ij aikuj in pād ilo tampeļ. Jemedwōj Ilan̄ im Jisōs Kraist rekar kakeememej eō kōn aenōm̧m̧an an lan̄ im kwojarjar in kemour imaron̄ bōk ilowaan kōn wōt kajoor in Pinmuur eo an ad Rilo̧m̧o̧o̧r, Jisōs Kraist.
Tampeļ eo ejamin kar aorōkļo̧k ippa ilo mour eo aō jen kiiō.