Ennaan an Ritōl an Eria
Gospel eo im Pinmuur an Jisōs Kraist Rej N̄an Aolep Armej
Rainin, kōj wōj ej mour ilo juon laļ eo elōn̄ iaan kōkkaļļe ko an emōj aer jako. Jeje ko rekwojarjar rej lukkuun kakememej kōj innām kalikkar bwe:
“Raan eo ej itok n̄e ro reban ron̄ ainikien Irooj, ak ainikien ro rikarejeran, im jab eo̧ron̄ naan ko an rikanaan ro im rijjilōk ro, naaj bukweļo̧k er jān ilubwiljin armej ro; Bwe rekar jebwābweļo̧k jān kain̄i ko Aō, im kar rupe bujen eo ejjeļo̧k jem̧ļo̧kin Aō; Rej jab pukot Irooj n̄an kajutak an wānōk, ak armej otemjej ej etetal ilo iaļ eo an make, im ilo̧kan nememen anij eo an make, nememe eo ej āinwōt eo an laļ” (Katak im Bujen Ko 1:14–16).
Gospel eo ej tōl kōj n̄an mool eo indeeo, aenōm̧m̧an, im lan̄lōn̄. Gospel eo ej katakin kōj bwe jej aolep ajiri jitōnbōro nejin Jemed Ilan̄, kar kōm̧anm̧an ilo nememe eo An. N̄e jej meļeļe kōn kadkad eo ad ekwojarjar, jej loe juon iakwe em̧ool ej eļļā ļo̧k jen bōd ko ad im mōjņo ko.
Āinwōt ro uwaan Kabun̄ eo an Jisōs im Armej ro Rekwojarjar ilo Raan Ko Āliktata, kōj wōj jeramman kōn jeļāļo̧kjeņ eo an tarlepen gospel eo im Pinmuur eo an adwōj Rilo̧mo̧o̧r Jisōs Kraist, eo im ej un eo n̄an laļ in ad. En̄in wūnin an Irooj kōketak kōj wōj kajjojo—ro raar errā n̄an bōk ioon Etan ilo peptaij—n̄an kwaļo̧k gospel eo An. Kōj wōj aikuj in jet ro rej jutak kōn gospel eo An n̄an laļ in, im en̄in wūnin ad aikuj in mour jān gospel eo An. Gospel eo an Jisōs Kraist ej juon ennaan kōn iakwe im lo̧mo̧o̧r n̄an aolep armej.
Adwōj wujlepļo̧k n̄an jerbal in an mijenede ej kwaļo̧k ad tōmak ilo “aorōkin gospel eo ilo aolepen peļaakin laļ in.” Mijenede ro ad rej ānbwinin ekoba jitōbin jerbal in kwaļo̧k eo an Kraist, jipadōk jemdoon im karuwainene ro otemjej rej pojak in ron̄jake. Rej bōk til eo an naan in gospel peļaakin laļ in, kam̧ool bwe iakwe eo an Anij im Pinmuur eo an Jisōs Kraist ej n̄an ro otemjej.
2 Nipai 26:33 ej kwaļo̧k m̧ool in an aiboojoj:
“. . . E [Irooj] ej kūrtok er aolep n̄an itok n̄an Ippān im bōk leen em̧m̧an eo An; im E ejjeļo̧k Ej kabbōjrak e jān an itok Ippān, kilmeej im mouj, rilokjak im rianemkwōj, m̧aan im kōrā; im E ej ememej ro rejjan̄in ron̄ kōn E; im aolep rej āinwōt juon n̄an Anij, riJu im riAelōn̄ ko jim̧or.”
Kōj wōj aikuj kemeemej bwe aolep armej jej ion er ej juon ajri nejin Anij, ej telo̧kin iakwe, kautiej, im juon iien emman n̄an ron̄jake naan eo an gospel. Ilo Alma 16:16, ekakemeemej kōj wōj bwe Irooj enaaj “lutōkleplep jetōb eo an ioon aolepān mejān āneo n̄an kōpooj ļōmņak ko an ro nejin armej, ak n̄an kōpooj burueer n̄an bōk naan eo eo naaj kar katakin ilubwiljier ilo iien itok eo An.”
Bar juon kōmeļeļe eaorōk kōn katak eo ad ej kōn tōmak ilo paotok indeeo an baam̧le ko im juon jeraam̧m̧an n̄an lo̧mo̧o̧r n̄an aolep epeepen ko. Ilo tampeļ ko ad, jej kōmmani kain̄i ko ilo etan rūtto ro ad remij. Iminene in ekwojarjar ej kapen tōmak eo ad bwe lo̧mo̧o̧r ej peļļok n̄an aolep, barāinwōt n̄an ro raar jab ron̄jake gospel eo ilo iien mour ko aer.
Kōttōpar eo ad n̄an jerbal in tampeļ ej kwaļo̧ke tōmak eo bwe iakwe an Anij eļap jen mour in. Meļeļein bwe kōj wōj meļeļe bwe Pinmuur eo an Jisōs Kraist ej letok kōjātdikdik im lo̧mo̧o̧r jab wōt n̄an ro remour, ak barāinwōt n̄an ro iturājet in rōn̄ōl eo.
Pinmuur eo an Jisōs Kraist ej pedped eo an tōmak eo ad. Kōn katok in Pinmuur eo An, E eaar bōk ioon make jerawiwi ko ad, metak ko, im mōjno ko, aeet letok n̄an kōj juon jeram̧m̧an n̄an ukweļo̧k im bōk jeorļo̧kin bōd ekwojarjar. Menin ej juon menin letok n̄an aolep, eppeļo̧k n̄an ro otemjej rej kōttāik er im bōk Irooj ilo mour ko aer.
Kōj wōj jen jutak pen ilo mool bwe gospel eo im Pinmuur eo an Jisōs Kraist re mool im rej n̄an ro otemjej. Ej juon naan in kōjātdikdik, lo̧mo̧o̧r im kōjeraam̧m̧an ko indeeo, kar letok ilo ejeļo̧k wōnen n̄an aolep jetōb ro rekijerjer in ekkatak eļapļo̧k. Jen erļo̧ke peid kōn iakwe, tūriam̧okake, im kaenōmman n̄an aolep ro jeid im jatid, jeļā bwe jej kein jerbal ko ilo karōk eo An ekwojarjar, n̄an leļo̧k lo̧mo̧o̧r n̄an kajojo armej.
Āliktata, Ij kamool kōn tarlepen mool eo an gospel eo an Jisōs Kraist im kajoor in Pinmuur eo An. Kōj wōj en jar n̄an maron̄ ippen doon ilo ad kallim̧ur n̄an ļoore Kraist im tilmaake naan ko remman n̄an ajiri ro nejin Anij, jekdoon wōn ak jekjek rōt. Laļ in ej lukkuun aikuji gospel eo im Pinmuur eo an Jisōs Kraist ilo mour ko aer. Jen ippān doon im jipan̄ er. Ilo āt eo ekwojarjar etan Jisōs Kraist, amen.