Bwebwenato ko an Ijo Jokwe Ie
Ilo 78 iiō Ļeo ej Kemeram ļo̧k Meram in Gospel eo
Brother John William Orth, 78, ej kemeram ļo̧k meram in gospel eo jekdoon apan̄ ko kōn nan̄inmej in Parkinson. John eaar juon membōr etiljek an Kabun̄ eo Jisōs Kraist im Armej ro Rekwojarjar ilo Raan Ko Āliktata ilo aolepen mour eo an, kar jerbal ilo elōn̄ kūr ko, ekoba āinwōt juon bisop. Aolepen iiō ko ļo̧k ļalem, ālkin kar pād kōn juon apan̄ eo eaitok kitien, eaar menin aikuj n̄an John bwe en jokwe ilo mōn jokwe ko an Lutheran ilo Glynde, South Australia, juon mōn oņaake rūtto ej an Kabun̄ eo an Lutheran.
Jekdoon nan̄inmej ko ippen, John ej em̧m̧an wōt im kajoor ilo ikitōltōl ko an mōn jokwe ko ilo jukjukinpād eo an Lutheran, me ej letok jerbal in jipan̄ an kabun̄ im kilaaj ko rej kōm̧m̧an jān juon pastor eo ej jerbal aolep raan. Ālkin emakūt n̄an m̧weo, John ekar jeļā bwe pastor eo emaron̄ in kar jako ilo juon iien aitok im kar ļōmņak bwe ilo an jako, kilaaj ko remaron̄ in kar tōl jān ro jet rej jokwe ijo—John eaar m̧ōņōņō in make kōmmane juon, n̄e ekar aikuj. Pastor eo ekar bōke kajjitōk eo an im ālkin iien eo John ekar katakin elōn̄ kilaaj ko, ekoba juon kadiwōjļo̧k ilo mejatoto kajjojo wiik (n̄e ej em̧m̧an an mour) ilo juon TV channel eo ej diwojļo̧k n̄an bukwi armej ro rej jokwe ilo mōn oņaake im ipeļaakin bukwōn eo an.
Barāinwōt ke ej apan̄ kōn mōjņo in ānbwin, John ej joļo̧k elōn̄ awa ko juon wiik ilo kepooj katak ko an, kōjerbal pija in alooj ko im kein ekatak ko jet jān Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ilo jinoin, pastor eo ekar bar lale kajjojo katak mokta jen an kwaļo̧k, ijoke ļein kiiō ejjeļo̧k an n̄ūrbōktak kōn katak ko an John. Ilo mool, naan ko an John rej waļo̧k ilo jet kape ko an Bok in Mormon ko kar likūt ippān ro rej jokwe ijo, elōn̄ iaer raar kajjitōk ippān n̄an kōnono elōn̄ kain unin kōnono ko. Ļein ej kōnono ilo an emļo̧ke juon iaan kajitōk ko, eo ekar waļo̧k ilo juon kooj 5 wiik aitokin in ekkatak kōn jouj.
John ekar barāinwōt kōmman oktak ko jet ilo imōn onaake rūtto. Ļein ej kepooj kaat in ekkatak ko im leļo̧k n̄an ro rej jokwe ijo juon laajrakin n̄an jar ko aer. Kiiō rej kōjeram̧m̧an m̧ōn̄ā ko ilo iien m̧ōn̄ā ko im kōmman katak āinwōt m̧ōttan wōt iien ko ekkā aer kōmman ilo iien ko ro rej jokwe rej kweilo̧k. Ļein ej kōjātdikdik bwe menin enaaj rōjan̄ er jar emakijkij im n̄an kōjeparok juon karōk in lo̧mo̧o̧r ilo kōļmānļo̧kjeņ.
John ej itok limoin ilo mijen in an n̄an kwaļo̧k gospel eo ippen ro ritūrin ilo mōn oņaake rūtto, n̄an kepooj er n̄an katak ko imaan im leļo̧k kōjātdikdik ippān ro rej mijak ta eo epād imaan. Ļein ej kōņaan bwe en em̧m̧an aer en̄jake kōn mour eo ālkin rōn̄ōl eo im n̄an jeļā iakwe eo an Jemed Ilan̄. N̄e juon eo ej jokwe ijo ej mij, John ej kepooji bwebwenato in no̧kwe eo aer im jilkinļo̧k etāer n̄an tampeļ eo bwe ren maron̄ dedeļo̧k, jabdewōt jikin eo emaron̄.
Āinwōt kar kōtmene, eoon eo em̧m̧an tata ippān ej Mosaia 2:17: “A lo, ij ba n̄an kom̧ men kein bwe kom̧in maron̄ ekkatak jeļāļo̧kjeņ; bwe eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij”.
Ilo Māe 2023, John ekar bōk juon loļo̧k ejjeļo̧k kar kōtmene jān Elder Paul Whippy jān Pacific Eria Jijlilimjuonn̄oul n̄an Kabun̄ in. Elder Whippy eaar kanooj in m̧ōņōņō ippān John kōn waanjon̄ak in iakwe an ri Kūrijin im jerbal in jipan̄ eo an jon̄an ekar jeere en̄jake in ippān Elder Taniela B. Wakolo, priesthood ritōl eo an ilo Eria Būreejtōnji eo.
Ke John eaar ron̄ ke Elder Wakolo eaar bareinwōt kōņaan ioon e, ekar karōke ippān ro rej lale bwe ren kanooj lale bwe en ruj im kakōm̧anm̧an aer kōm̧m̧an an nuknuk in jar, pojak n̄an loļo̧k eo. Ilo lotok kein jimor, John eaar jeere an naan in kamool ippān elder ro im jet iaan katak ko ekar ekkatak kake elōn̄ iiō ko in tiljek ilo jerbal in jipan̄ an kabun̄ in.
John eļap an jitōnbōro ippān kōrā eo pāleen Diana, im ļaddik ro ļalem nejin: Benjamin, John William Junior, David, Andy, Sam im baamle ko aer. Rej m̧ōņōņō kōn an wōnmanļo̧k wōt im āinwōt Kraist an jerbal in jipan im rej ļoore waanjon̄ak eo an ilo kūr ko aer make ilo ward im stake ko aer.
Ilo 2018 Būreejtōn Russell M. Nelson eaar kean̄, “Irooj ej kōļapļo̧k jerbal eo An n̄an aiintok Israel. Aiintok in ej men eo eorōktata ej bōk jikin ioon laļin rainin. Ejjeļo̧k menin keidi ilo jon̄an, ejjeļo̧k menin keidi jon̄an aorōkin, ejjeļo̧k menin keidi ilo arborol”.1
Brother John Orth ekar nebar kean̄ eo an Būreejtōn Nelson im ej kōmman aolep men emaron̄ e n̄an aiintok Israel ilo jikin ko jimor in rōn̄ōl eo. Ļein ej juon waanjon̄ak eaiboojoj ilo kōmeram ļo̧k am meram im niknik n̄an jemļo̧kin jekdoon apan̄ ko im men ko reppen an mour in.