“Ko e ʻAhó ʻEni ke Vahevahe ai ʻa e Ongoongolelei ʻo e Fakamoʻuí,” Liahona, Siulai 2024.
Talitali Lelei Kimoutolu ki he Makasini ko ʻEní
Ko e ʻAhó ʻEni ke Vahevahe ai ʻa e Ongoongolelei ʻo e Fakamoʻuí
Naʻe pehē ʻe Palesiteni Lāsolo M. Nalesoni, “Kuo teʻeki ai ha taimi ʻi he hisitōlia ʻo māmaní ʻe mātuʻaki mahuʻinga fakataautaha mo kaunga lahi ange ai ʻa e ʻilo hotau Fakamoʻuí ʻi he moʻui ʻa e taha kotoa” (“Moʻoni Haohaoa, Tokāteline Haohaoa, mo e Fakahā Haohaoa,” Liahona, Nōvema 2021, 6). Ko e ʻuhinga ʻeni ʻoku tau tali ai ʻa e fakaafe mo e fekau ʻa e Fakamoʻuí ke vahevahe ʻEne ongoongoleleí (vakai, Mātiu 28:19).
ʻOku tau houngaʻia ʻi he talavou mo e finemui kotoa ʻoku hoko ko ha faifekau akoʻi pe faifekau tokoní, kae hangē ko ʻeku fakamatala ʻi he makasini ko ʻení, “ʻOku tau fiemaʻu ke tokolahi ange, mo tokolahi ange fau, ʻi he laine muʻá—ko ha kongakau ʻo e kau faifekau mo e kāingalotu.”
ʻOku ou toe pehē foki, “Ko e ʻahó ʻeni, ke tau fakahaaʻi ai ʻa e ʻulungāngá mo e loto-toʻá pea vahevahe ʻa e ongoongolelei ʻo Sīsū Kalaisí” (peesi 40). ʻI hoʻo ako ʻa e ngāue fakafaifekau ʻa ʻĀmoni, ʻĀpisí, mo e niʻihi kehe ʻi he Tohi ʻa Molomoná ʻi he māhina ní, ʻoku ou fakaafeʻi koe ke ke fakakaukau ki he founga te ke lava ai ʻo vahevahe ʻa e fiefia ʻo e ongoongolelei ʻa e Fakamoʻuí mo kinautolu ʻoku mou feohí.
ʻEletā Eduardo Gavarret
ʻO e Kau Fitungofulú
“ʻOua ʻe lea ʻaki ha meʻa ka ko e fakatomalá pē ki he toʻu tangatá ni. Tauhi ʻeku ngaahi fekaú, pea tokoni ʻi hono ʻomai ʻo ʻeku ngāué ʻo fakatatau ki heʻeku ngaahi fekaú, pea ʻe tāpuakiʻi koe.”
Faitaaʻi ʻe Matthew Reier