Ko e Hā Nai Te Ke Tukuange ka Ke ʻIloʻi ʻa e ʻOtuá?

ʻĪmisi

tangata ʻoku fononga ʻi ha matātahi

ʻOku faʻa fiemaʻu ʻa e feilaulaú ki hono moʻui ʻaki ʻo e ongoongoleleí. ʻOku kole mai ʻa e Tamai Hēvaní ke tau tukuange ʻetau fakahehema fakakakanó ka tau maʻu ha meʻa ʻoku maʻongoʻonga ange: ko e ʻilo ʻo e ʻOtuá mo e ngaahi tāpuaki taʻe-mafakatataua ʻokú Ne foakí.

Naʻe fakahaaʻi mahino ʻe he tamai ʻa e Tuʻi ko Lamonaí ʻa e loto fiemālie ko ʻeni ke feilaulaú ʻi he taimi naʻá ne lotu aí, “Kapau ʻoku ʻi ai ha ʻOtua, pea kapau ko e ʻOtuá koe, ʻofa muʻa ʻo fakahā mai koe kiate au, pea te u liʻaki kotoa ʻa ʻeku ngaahi angahalá koeʻuhí ke u ʻiloʻi koe, pea ke fokotuʻu hake au mei he maté, pea fakamoʻui au ʻi he ʻaho fakaʻosí” (ʻAlamā 22:18; ko e toki tānaki atu hono fakamamafaʻí).

Naʻe akoʻi ʻe Palesiteni Lāsolo M. Nalesoni ʻoku kau ʻi hono ikunaʻi ʻa e māmaní mo e fakaʻau ke ofi ange ki he Tamai Hēvaní mo Sīsū Kalaisí ʻa hono “fili ke fakaʻehiʻehi mei ha meʻa pē ʻokú ne tuli ʻa e Laumālié” pea mo e “loto fiemālie ke liʻaki ʻo aʻu ki heʻetau ngaahi angahala angamahení.”

Ngaahi Tāpuakí

Makehe mei he ngaahi tāpuaki naʻe kumi ki ai ʻa e tamai ʻa e Tuʻi ko Lamonaí, ʻa ia ko e toetuʻú mo e fakamoʻuí, kuo hiki ʻe Palesiteni Nalesoni ha ngaahi tāpuaki lahi ange ʻoku maʻu mei heʻetau feinga ke hoko ʻo hangē ko Sīsū Kalaisí mo nofo ʻi he hala ʻo e fuakavá. ʻOku kau heni ʻa e:

Liliu ʻo e lotó mo e natulá
Manava ʻofá
Loto-fakatōkilalo
Foaki lahí
Angaʻofá
Mapuleʻi-kitá
Melino
Loto falala
Fiefia
Mālōloó
Mālohi fakalaumālié
Fakahā fakatāutahá
Fakatupulaki ʻo e tuí
Ko e tauhi mai ʻa e kau ʻāngeló
Ngaahi maná

Kapau ʻoku faingataʻa ke ke feilaulauʻi ha ngaahi angahala pau, ʻoua te ke foʻi. ʻOku fakamanatu mai ʻe Palesiteni Nalesoni “ʻOku ʻikai ʻuhinga ʻa e ikunaʻi ia ʻo e māmaní ke tau hoko ʻo haohaoa ʻi he moʻuí ni, pe ʻe puli fakafokifā kotoa hoʻo ngaahi palopalemá—he ʻikai ke pehē ia. Pea ʻoku ʻikai ʻuhinga ia he ʻikai ke ke kei fai ha fehālaaki. Ka ʻoku ʻuhinga hono ikuʻi ʻa e māmaní, ʻe tupulekina ho ivi ke tekeʻi ʻa e angahalá.”

ʻI heʻetau feinga ke siʻaki ʻetau ngaahi angahalá ʻo hangē ko e tamai ʻa e Tuʻi ko Lamonaí, te tau ʻiloʻi ko hono ʻiloʻi ʻo e ʻOtuá ʻoku ʻaonga maʻu pē ai ʻa e feilaulaú. ʻI heʻetau fai iá, ʻe hoko ʻetau moʻuí takitaha ko ha meʻa lelei ange ʻi he meʻa ne tau mei lava ʻo fai ʻe kitautolú.