Fakakomipiuta Pē: Kakai Lalahi Kei Talavoú
Ngaahi Moʻoni Naʻá Ne Tokoniʻi Au Ke U Falala ki he Mālohi ʻo e Fakamoʻuí ke Liliu Aú
ʻOku nofo ʻa e tokotaha naʻá ne faʻú ʻi Haʻamoa.
ʻE lava ke tokoni hono tali lelei Hono mālohi faifakamoʻuí ke tau tupulaki mo liliu ai.
ʻOku ʻi ai nai ha taimi ʻokú ke ongoʻi ai kuo fuʻu tōtuʻa hoʻo fehalaākí? ʻO hangē ʻoku ʻikai hano ʻaonga hoʻo toe kamata foʻoú mo toe feingá, koeʻuhí he te ke kei fai pē ʻa e ngaahi fehalaaki tatau?
ʻOku ou manatuʻi ha ʻaho ʻe taha naʻá ku ongoʻi ai kuo siva ʻeku ʻamanakí mo fihia. Naʻá ku tangi ki hoku kaungāmeʻa mamaé fekauʻaki mo ha vaivaiʻanga ʻoku ou maʻu. Ko ha vaivaiʻanga ʻoku ou ongoʻi hangē naʻá ku maʻu maʻu peé.
Kuó ne uesia au, pea ko hono moʻoní, naʻe ʻikai ke u toe fie feinga ke u tuʻu hake ʻo hoko atu. Naʻá ku ngāue ke maʻu hoku ʻenitaumení mo ngāue fakafaifekau ʻi ha ngaahi taʻu siʻi, ka naʻe taʻotaʻofi au ʻe he meʻa ne u fefaʻuhi mo iá. Naʻe ʻikai ke u ongoʻi naʻá ku taau ke u kei feinga ke hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
ʻI he pō ko iá, naʻá ku fakaʻamu pē ke u foʻi. Ka naʻe hoko e ʻofa mo e poupou ʻa hoku kaungāmeʻá ke ne fakamanatu mai ha ngaahi aʻusia ʻokú ne tauhi ʻeku fakamoʻoní ke mālohi pea mo tokoniʻi au ke u falala ki he mālohi ʻo e Fakamoʻuí ke liliu aú.
Mahalo ʻe tokoni foki ia kiate koe.
Fakatomalá—ko e Kī ki he Fakalakalaká
Te u lea moʻoni pē—kuo teʻeki ai ke u tui maʻu pē ki he talaʻofa ʻa Sīsū Kalaisi te Ne lava ʻo “liliu ʻa e ngaahi meʻa vaivaí ko e mālohí” (ʻEta 12:27). Kuó u ongoʻi hangē kuo fuʻu tōtuʻa ʻeku fehalaākí pea ʻoku ʻikai ʻatā moʻoku ʻEne talaʻofa ʻo e fakamolemolé.
Ka kuo liliu ʻe he ako lahi ange fekauʻaki mo e meʻaʻofa ʻo e fakatomalá ʻa ʻeku founga ki hono ikunaʻi ʻo e vaivaí. Naʻe akoʻi ʻe Palesiteni Lāsolo M. Nalesoni “ko e kī ki he fakalakalaká ko e fakatomalá.” Ko e fakatomalá ʻoku ʻikai ko ha meʻa ia ʻoku tau fai ʻi he taimi pē kuo tau fakaleleiʻi ai kitautolu mo mateuteu ke mavahe mei hotau ngaahi faingataʻaʻiá; ka ko e founga ia ʻoku tau fakaafeʻi ai e mālohi ʻo e ʻEikí ki heʻetau moʻuí.
Kuó u faʻa ongoʻi ʻoku ʻiloʻi pau ʻe Sētane ʻa e founga ke fakalotosiʻi ai kiate aú. Kae hangē ko e akonaki ʻa Palesiteni Nalesoní: “Kātaki ʻoua naʻa manavasiʻi pe fakatoloi ʻa e fakatomalá. ʻOku fiefia ʻa Sētane ia ʻi hoʻo mamahí. Fakangata ia ke taʻofi. … ʻOku ʻofeina maʻu pē kitautolu ʻe he Fakamoʻuí kae tautautefito ʻi he taimi ʻetau fakatomalá.”
Kuo fuoloa ʻa ʻeku ngāue [ki he fakatomalá], ka ʻoku fāifai peá u ako ke falala ʻoku finangalo ʻa e Fakamoʻuí ke u fakatomala. ʻOkú Ne finangalo ke u toe foki ange ʻo nofo mo Ia mo e Tamai Hēvaní.
Ko e Mahino ʻa e ʻOfa Haohaoa ʻa Kalaisí
Naʻe tokoniʻi au ʻe he ngaahi fakaafe taʻe-fakangatangata ʻa e Fakamoʻuí ke fakatomalá ke u vakai ki he ngaahi tefitoʻi moʻoni kehe ʻo e ongoongoleleí ʻi ha maama foʻou—hangē ko e ʻofa faka-Kalaisí. ʻI he Siasí, ʻoku tau fakaʻuhingaʻi ʻa e ʻofa faka-Kalaisí “ko e ʻofa ia ʻoku māʻolunga, fakaʻeiʻeiki, mo mālohi tahá, pea ʻoku ʻikai ko ha ongoʻi ʻo ha kiʻi ʻofa pē ʻi he lotó; ko e ʻofa haohaoa ʻa Kalaisí.” Kuó u tui maʻu pē ki he mahuʻinga ʻo e ʻofa faka-Kalaisí, ka ʻoku ʻikai ke u tui naʻe mahino kiate au ʻa e founga ke kamata fakatupulaki ai ʻa e ʻofa faka-Kalaisí ka ne taʻeʻoua ʻa e kamata ke mahino kiate au ʻa e founga ʻoku ʻomi ai ʻe he Fakamoʻuí ke fakamolemoleʻi ʻeku ngaahi angahalá ʻi heʻeku faʻa fakatomalá, ko hano fakahaaʻi ia ʻo ʻEne ʻofa haohaoa ʻiate aú.
Pea ʻi he taimi ne u kamata tui ai ʻe foaki moʻoni mai ʻe he Fakamoʻuí ha ngaahi faingamālie taʻefaʻalaua ke u fakatomala ai pea haʻu kiate Iá, naʻe kamata ke u vakai ki he niʻihi ʻoku mau feohí ʻi ha founga kehe. Naʻá ku fakatokangaʻi te u lava ʻo muimui ki Heʻene sīpingá ʻaki ʻeku akoako ke fakahaaʻi ʻa e ʻofa faka-Kalaisí ki he niʻihi ne nau fakamamahiʻi aú. Te u lava ʻo fakamolemoleʻi mo maʻu ha mahino ki he niʻihi ʻoku nau fakamāuʻi taʻe-māʻoniʻoni ʻeku ngaahi tōnounoú.
Fakavaʻe ki he Liliú
Kuo hoko ʻa e ongo tefitoʻi moʻoni ʻe ua ko ʻení—ʻa e fakatomalá mo e ʻofa faka-Kalaisí—ko e fakavaʻe ia ʻo ʻeku ngaahi feinga ke fakaʻatā ʻa Sīsū Kalaisi ke ne liliu aú. Kuo kamata ke u vakai kiate kinaua ko ha ongo tefitoʻi moʻoni ʻokú na fengāueʻaki mo fefakakakatoʻaki.
Naʻe akoʻi ʻe Palesiteni Henelī B. ʻAealingi, Tokoni Ua ʻi he Kau Palesitenisī ʻUluakí, “ko e houngaʻia ʻi he fakamolemole ʻo e ngaahi angahalá ko e tenga ia ʻo e ʻofa faka-Kalaisí.” Kuo hoko ʻeni ʻo moʻoni kiate au ʻi heʻeku liliu ʻo fakafou ʻi he fakatomalá mo e ongoʻi houngaʻia ʻi he ʻofa mo e fakamolemole ʻa e ʻOtuá. Pea ʻoku ou fiemaʻu leva ke aʻusia ʻe he niʻihi kehé ʻa e ʻofa ʻa e ʻOtuá ʻo hangē ko ia kuó u maʻú.
Ko ia ko e ngaahi ʻaho ko ia ʻoku mole ai ʻeku fakaʻaiʻaí pea ʻahiʻahiʻi au ke u liʻaki lotu pe tukuange e ngaahi meʻa mahuʻingá, ʻoku ou manatuʻi mahalo te u lava ʻo fakalotolahiʻi ha taha kehe. Mahalo te u lava ʻo hoko ko ha faʻifaʻitakiʻanga ki he niʻihi ʻoku mau feohí ʻa ia ʻoku nau faingataʻaʻia foki mo kinautolú.
ʻOku hanga ʻe he ʻofa ʻoku ou ongoʻi ki hoku Fakamoʻuí pea mo e ʻofa faka-Kalaisi ʻoku ou ongoʻi ki he niʻihi ʻoku mau feohí ʻo pukepuke au ke u mālohi. ʻOkú ne fakamanatu mai kiate au ʻa ʻEne manavaʻofa kiate aú. ʻOku ou kei feinga pē ke ikunaʻi hoku ngaahi vaivaí, ka ʻoku ou ʻiloʻi ʻe tokoniʻi au ʻe he falala ki Hono mālohi faifakamoʻuí ke hokohoko atu ʻeku tupulakí peá u hoko ʻo tatau ange mo Iá.