“Ko ʻEku Pōpoaki mei he ʻEikí,” Liahona, Siulai 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ʻEku Pōpoaki mei he ʻOtuá
Naʻe ʻikai haʻaku fakamoʻoni ki he Tohi ʻa Molomoná kae tālunga e folofola mai ʻa e ʻEikí kiate au ʻo fakafou mai ʻi he tohi ʻa Hilamaní.
Laʻitaá ʻi he angalelei ʻa e tokotaha naʻá ne faʻuʻa e talanoa ko ʻení
Ko e taimi naʻe fakaafeʻi ai au ʻe haku kaungāmeʻa ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he 2020, naʻe fakapāpākū pē ʻeku loto ki aí. ʻI he kamataʻangá, naʻe ʻikai ke u ongoʻi ko ha feituʻu ʻeni ke u ʻi ai, ka naʻe kei hoko atu pē ʻeku ʻalu ki he houalotu sākalamēnití. Fāifai, peá u papitaiso.
Neongo ia, ka naʻe ʻikai mahino kiate au ʻa e foʻi fakakaukau ʻo e maʻu ha fakamoʻoní, ʻa ia naʻe lea ki ai ʻa e kāingalotu kehe ʻo e Siasí. Naʻá ku lau fakataha mo e ongo faifekau fefiné ha ngaahi veesi folofola, ka naʻe teʻeki ke u fakaava ʻiate au pē ʻa e Tohi ʻa Molomoná. Neongo siʻi feinga lahi ʻa e kāingalotu ʻo e Siasí ke talitali lelei au mo u kei mālohí, ka naʻe ʻikai fuoloa kuó u tōmui ki he lotú, liʻaki ha ngaahi houalotu, mo foki ki he tuʻunga fakamāmaní.
Pea ʻi ha ʻaho ʻe taha naʻá ku ongoʻi faikehe ai mo loto hohaʻa. Naʻá ku ongoʻi naʻá ku fuʻu taʻe-pau, fakamāmani, mo fakafepaki ki he ngaahi meʻa ʻa e ʻOtuá. Naʻá ku fakatokangaʻi naʻe ʻikai ke u ʻi he hala totonú. Lolotonga ʻeku ʻi he ongo ko ʻení, naʻá ku hila ki he folofolá ʻi hoku funga mohengá.
Naʻá ku ui ki he ʻOtuá ke Ne folofola mai ʻaki ha meʻa kiate au. Naʻá ku fai ha kiʻi lotu peá u tatali pe te u fanongo ki ha meʻa. Naʻá ku fiemaʻu ha fakafiemālie mo ha fakamahino.
Fāifai peá u ongona ha meʻa. ʻOku ʻikai ke u ʻilo ʻe au pe naʻe haʻu ʻa e ongó mei heʻeku fakakaukaú pe mei hoku telingá, ka naʻá ku ongona ha ngaahi lea “Hilamani 3:27.” Naʻá ku ʻilo ko e tohi ʻa Hilamaní naʻe ʻi he Tohi ʻa Molomoná, ko ia naʻá ku toʻo leva ʻeku folofolá ʻo sio ki he fakahokohoko ʻo e tohí pe ʻoku ʻi feʻia ʻa e tohi ko iá.
Ko e meʻa hoko ne u laú ko ha pōpoaki fakahangatonu mei he ʻOtuá kiate au, ki he momeniti ko ia ʻo ʻeku moʻuí: “Ko ia ʻoku tau lava ʻo ʻiloʻi ai ʻoku ʻaloʻofa ʻa e ʻEikí kiate kinautolu kotoa pē te nau ui ki hono huafa toputapú ʻi he moʻoni ʻo honau lotó.”
Naʻe liliu ʻe he potufolofolá ni ʻa ʻeku fakakaukau fekauʻaki mo ʻeku ngaahi tōʻongá pea ki he Tohi ʻa Molomoná. Naʻá ku fakatokangaʻi ko ʻeku ngaahi tōʻongá mo e ʻikai fakahoungaʻi ʻa e ʻOtuá naʻe hala pea naʻe fiemaʻu ke u tautapa kiate Ia mo fakatomala. ʻOku ou ʻiloʻi he ʻikai fakasītuʻaʻi au ʻe he ʻOtuá mei Heʻene ngaahi ʻaloʻofá mo e ngaahi tāpuakí, kehe pē ke u loto fakamātoato ʻi heʻeku tautapa mo muimui kiate Iá.
Ko e founga ia naʻe maʻu ai ʻeku fakamoʻoní ki he Tohi ʻa Molomoná—ko ha tohi naʻe ʻikai ke u saiʻia hono laú. ʻOku ou ʻilo ʻoku moʻui ʻa e ʻOtuá, ʻokú Ne folofola kiate kitautolu ʻi he ʻahó ni, pea ʻoku moʻoni ʻa e Tohi ʻa Molomoná.