“Naʻe Fakaʻamu ʻa Hoku Laumālié Ke u ʻi Ai Mai,” Liahona, Siulai 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Fakaʻamu ʻa Hoku Laumālié Ke u ʻi Ai Mai
Naʻe ongo kiate au ha talanoa fakafolofola manakoa ko ha tali ki heʻeku fakaʻamu ke ofi ki heʻeku Tamai Hēvaní mo Hono ʻAló.
Hāʻele ʻAnga Ua Maí, tā fakatātaaʻi ʻe Harry Anderson
Naʻá ku haʻu ki he temipalé ʻi ha ʻaho ʻe taha mo ha fehuʻi ʻi hoku lotó: “Tamai Hēvani, ʻoku fēfē nai ʻeku ngāue ʻi he ongoongoleleí?”
Naʻe ongo mālohi ʻa ʻeku ngaahi tōnounoú ʻi he uike ko iá. Hangē ko Nīfaí, naʻá ku ongoʻi mafasia ʻi he ngaahi angahala naʻe faingofua ke u moʻua aí. Ka, naʻe toe hangē pē foki ko Nīfaí, naʻá ku ʻilo ʻa ia naʻá ku falala ki aí. (Vakai, 2 Nīfai 4:18–19.) Naʻá ku ʻamanaki ʻe tokoni haʻaku feohi mo e ʻEikí ʻi Hono falé ʻi he pongipongi ko iá ke ʻomi ke ofi ʻa e vāmamaʻo naʻá ku ongoʻí.
Naʻá ku fakafanongo fakalelei ʻi he sēsini ʻenitaumení peá u ongoʻi houngaʻia ʻi he mālohi mo e ʻilo naʻá ne ʻomi maʻakú. Ka ʻi heʻeku hū ki he loki silesitialé, naʻe kei ongoʻi mafasia pē hoku lotó. Te u ʻilo fēfē nai ʻa hoku tuʻunga mo e ʻEikí?
Naʻá ku tangutu ʻo fakalaulauloto ʻi ha ngaahi miniti siʻi, ʻo u ongoʻi hangē he ʻikai maʻu ha tali ki heʻeku fehuʻí, pea kamata ke u tuʻu, Ka naʻe fusi hifo au ʻe ha meʻa ke u tangutu, ʻo fiemālie ange ʻi he sea moluú. Naʻá ku fakakaukau, “ʻOku ʻikai ke u fie mavahe au.”
Naʻá ku vakavakai takai ʻi he lokí ʻo fakatokangaʻi ha tāvalivali angamaheni ʻo Sīsū Kalaisi ʻoku takatakaiʻi ʻe ha kau ʻāngelo, pea naʻe mafao mai Hono ongo toʻukupú kiate au. Naʻe haʻu ki heʻeku fakakaukaú ha fakalea ʻo ha potufolofola manako: “Naʻe fakaʻamu ʻa hoku laumālié ke u ʻi ai mai” (vakai, ʻAlamā 36:22).
Kuó u faʻa fakalaulauloto ki he mahuʻinga ʻo e veesi ko iá ʻi he talanoa ʻo ʻAlamaá. Kimuʻá, tuʻunga ʻi heʻene ngaahi angahalá, naʻe “fuʻu ilifia” ʻa ʻAlamā ʻi he fakakaukau ʻe tuʻu ʻi he ʻao ʻo e ʻOtuá (ʻAlamā 36:14). Kae hili ʻene tafoki kia Kalaisí, naʻá ne mamata ki he ʻOtuá ʻoku takatakaiʻi ʻe he kau ʻāngeló, pea “naʻe fakaʻamu ʻa hono laumālié ke ʻi ai mai.” Naʻe fakaʻofoʻofa maʻu pē kiate au ʻa e fakafehoanaki fakafolofola ko ʻení. Naʻe ʻaonga lahi fau ki he loto ʻo ʻAlamaá ʻa ʻene kihiʻi feinga ke tafoki ki he ʻEikí.
Naʻá ku fakatokangaʻi naʻe ʻikai ke u ongoʻi mateuteu ke mavahe mei he loki silesitialé koeʻuhí, he naʻe fakaʻamu hoku laumālié ke ʻi ai, ʻo hangē ko ʻAlamaá,—fakatouʻosi ʻi he temipalé ʻi he ʻaho ko iá pea fakaiku ki he Tamai Hēvaní mo Sīsū Kalaisi, ʻi hoku ʻapi fakalangí. Naʻe fakaʻaongaʻi ʻe he Laumālie Māʻoniʻoní ʻa ʻeku talanoa fakafolofola manakó ke talamai ʻoku ʻafioʻi ʻe he ʻOtuá hoku lotó. Naʻe fakamanatu mai kiate au neongo ʻeku ngaahi tōnounoú, ka kuo tali ʻe he ʻEikí ʻa ʻeku ngaahi feinga ke ofi kiate Iá. Naʻá Ne ʻafioʻi ʻoku ou fakaʻamu ke u ʻi ai mai.