“Ko ha Teuteu Fakaʻofoʻofa ki he Moʻuí,” Liahona, Siulai 2024.
Ko ha TeuteuFakaʻofoʻofa ki he Moʻuí
Ko e meʻa ʻoku ako ʻe he kau talavoú mo e kau finemuí ʻi he ngāue fakafaifekaú te ne tāpuekina ʻenau moʻuí ʻo taʻengata.
Talu mei heʻeku kei siʻi, mo ʻeku ʻāvea ʻi he loto vēkeveke ʻa e kau faifekaú. ʻI he lolotonga ʻo ha houalotu sākalamēniti ʻe taha ʻi hoku kiʻi kolo ʻi Mīnasi, ʻi ʻUlukuaí, naʻe fai ai ʻe ha faifekau ʻene fakamoʻoní mo fakamatalaʻi ʻene ongo ki heʻene ngāue fakafaifekaú. Naʻe nofo ʻene ngaahi leá ʻi hoku ʻatamaí mo hoku lotó.
Naʻá ku pehē loto pē, “ʻE ʻi ai ha ʻaho, te u ngāue fakafaifekau ai.”
ʻI ha taimi kimui ange ai, ʻi heʻeku hoko ko ha taulaʻeikí, naʻá ku maʻu ha faingamnālie ke kau fakataha mo e ongo faifekaú ʻi heʻena ngaahi lēsoní. Ko ha aʻusia fakangalongataʻa ke te hoko ko ha faifekau ʻi hoto taʻu 16!
Ko e taimi naʻe hoko ai hoku taʻu 18, kuo foki mai ha kakai kei talavou ʻe niʻihi mei hoku kiʻi koló, mei heʻenau ngāue fakafaifekaú, kau ai hoku tuofefine ko ʻAná, naʻe foki mai mei heʻene ngāue fakafaifekau ʻi ʻĀsenitiná. Naʻe ongo foki ki hoku lotó ʻa ʻenau ngaahi aʻusiá mo ʻenau ngaahi fakamoʻoní.
ʻI he ofi ke hoko hoku taʻu 19, naʻá ku loto ke ʻoange hoku hingoá ke u ʻalu ʻo malangaʻi ʻa e ongoongolelei ʻo e Fakamoʻuí pea mo ngāue ʻi Heʻene ngoue vainé (vakai, Tokāteline mo e Ngaahi Fuakava 75:2). Naʻá ku teuteu pea fakahū ʻeku pepa ngāue fakafaifekaú. Ko e taimi naʻe aʻu mai ai hoku uiuiʻí, naʻá ku fakaava ʻa e tohi naʻe fakamoʻoni hingoa ki ai ʻa palesiteni Sipenisā W. Kimipoló peá u lau, te u ngāue ʻi he Misiona Uruquay/Paraquay. Te u ngāue pē ʻi hoku fonuá! Naʻá ku fiefia ʻi he faingamālie ke malanga ʻaki ʻa e “ongoongo fakafiefia ʻo e fiefia lahí, ʻa e ongoongolelei taʻengatá” (Tokāteline mo e Ngaahi Fuakava 79:1.)
Naʻá ku aʻu ki he ʻōfisi fakamisioná hili ia haʻaku fononga pasi ʻi ha houa ʻe ua ki Monitivitiō, ʻUlukuai. Naʻe vaheʻi au ʻe he palesiteni fakamisioná ke u hoko ko ha faifekau ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea vahe mai haku hoa [ngāue]. ʻI he hoʻatā efiafi ko iá, naʻá ma kamata leva ke tukituki ʻi he ngaahi matapaá.
ʻI he kamataʻangá, naʻe ʻi ai ha ngaahi taimi naʻe ʻikai fakafiefia ʻa e ngāue fakafaifekaú ʻo hangē ko ʻeku fakakaukau ki aí. Meʻamālie, he naʻá ku maʻu ha hoa talangofua mo ngāue mālohi naʻe tokoni mai ke u ʻilo ʻa e fiefia ʻo e fakangaloki au ʻi he ngāue ʻa e ʻEikí. Naʻe tāpuekina au ʻe heʻene sīpingá ʻi he kotoa ʻo ʻeku ngāue fakafaifekaú.
Ka naʻe kamata fuoloa pē ʻeku teuteu ke hoko ko ha fakafofonga ʻo e Fakamoʻui ko Sīsū Kalaisí.
Naʻe Kamata Kotoa Ia ʻaki ha foʻi Pine Hēkesi.
ʻI Sānuali ʻo e 1962, naʻe hoko ai hoku taʻu onó, naʻe ō mai ʻa e ongo faifekaú ki he falekoloa siueli ʻo ʻeku tangataʻeikí ko e feinga ke fetongi ha foʻi pine hēkesi naʻe mole ʻi ha taha ʻiate kinaua. Lolotonga ʻena ʻi aí, naʻá na fanongo ki ha taha ʻokú ne tā ha kītā. Ko e taimi naʻá na ʻeke ai fekauʻaki mo iá, naʻe fakaafeʻi ai kinaua ʻe heʻeku tamaí ke na hū mai ʻo feiloaki mo hono kaungā tangatá.
Naʻe ʻeke ange ʻe heʻeku tangataʻeikí mo hono kaungā tangatá, ʻi he lolotonga ʻo ʻenau pōtalanoá, pea ʻokú na tā kītā. Naʻe pehē ʻe ha ʻeletā ʻe taha ʻoku tā siʻisiʻi pē. Naʻe mono atu leva ʻe he kaungā tangata ʻo ʻeku tangataʻeikí ʻa e kītaá ki ai ke ne tā. Naʻá ne kamata ke ne tā ha ngaahi hiva kae hiva hono hoá.
Naʻe fakaiku ʻa e kiʻi kumi pine hēkesi pē ʻa e ongo faifekaú ke fakafeʻiloaki ai hoku fāmilí ki he ongoongolelei ʻo Sīsū Kalaisí. Naʻa mau hoko ʻo kaungāmeʻa lelei mo e ongo faifekaú pea mo kamata fanongo ki he ngaahi lēsoní. Naʻe tō ʻa e tenga ʻo e ongoongoleleí, pea kamata ke tupu, ʻo ʻuluaki kamata ʻi heʻeku fineʻeiki ko ʻElisaá (Elsa), mo hoku tuofefine ko ʻAna mo Sitelá, pea toki hoko au.
Talu mei he ʻaho ko iá, mo e tupulaki ha manako ki he ngāue fakafaifekaú, ʻi hoku fāmilí. Naʻá ku ngāue fakafaifekau, kuo ngāue fakafaifekau hoku ngaahi fohá, pea kuo kamata ʻeni homa makapuná ke teuteu ke ngāue fakafaifekau, ko e toʻu tangata ʻaki ia hono tolu ʻo ha kau faifekau.
ʻOku ʻikai faingofua maʻu pē ke te hoko ko ha faifekau. ʻOku fiemaʻu ha teuteu kimuʻa pea toki mateuteu ha talavou pe finemui ke ʻalu ki he malaʻe ʻo e ngāue fakafaifekaú. Ko e feituʻu ʻeni ʻe lava ke hoko ai ʻa e mātuʻá, fāmilí, mo e kau taki ʻo e Siasí ko ha faʻifaʻitakiʻanga lelei pea ngāue fakataha ke teuteu ʻa e toʻu tupú ʻi heʻenau kei taʻu īkí.
Ko ha founga ʻe taha ke tokoniʻi ai kinautolu ke nau teuteú, ko hono vahevahe ʻa e ngaahi taukei ngāué mo kinautolu. ʻE tokoni ʻa e ngaahi pōtoʻi ngāue hangē ko e fakahū ha paʻangá, fō mo e haiane ʻo e valá, tuituí, palākeni ʻo e suú, feimeʻatokoní, talanoa mo e niʻihi kehé, pea ko e tokoni ki he niʻihi kehé ʻe tokoni ia kiate kinautolu ʻi heʻenau ngāue fakafaifekaú. ʻOku toe tokoni foki ʻa e kau ʻi he seminelí mo e ʻinisititiutí ʻi he teuteu ko iá pea ʻokú ne fakamālohia ʻa e meʻa ʻoku nau ako ʻi ʻapí pea ʻi heʻenau ngaahi kōlomú mo e ngaahi kalasí.
ʻOku totonu ke hokohoko atu ʻetau poupoú ʻi he lolotonga ʻo ʻenau kei ngāue fakafaifekaú. ʻOku mālie ke fanongo ki he ngaahi aʻusia fakaʻofoʻofa ʻoku meimei ke maʻu fakaʻaho ʻe heʻetau kau faifekaú. Te tau lava foki ʻo hoko ko ha konga ʻo e ngaahi aʻusia ko iá ʻaki haʻatau tokoni kiate kinautolu ʻoku nau akoʻí. Hangē ko ʻení, naʻe fetuʻutaki mai ha faʻē ʻa ha taha ʻo e ongo faifekau naʻá na akoʻi homau fāmili, ki heʻeku fineʻeikí, pea mo tohi mai ki ai ʻi ha ngaahi taʻu lahi, mo ʻtokoni ke nofo ʻa ʻeku fineʻeikí ʻi he hala ʻo e fuakavá.
ʻI heʻetau tokoniʻi ʻa e kau faifekau ʻo e kahaʻú ke nau teuteú, ʻoku totonu ke tau manatuʻi ko e ngāue fakafaifekaú ʻoku mahulu hake ia ʻi ha tukufakaholo pē ʻi he Siasí—ko ha fakaafe ia mo ha fekau mei he ʻEikí (vakai, Mātiu 28:19). Naʻe akoʻi kia ʻĀtama mo ʻIvi ʻa e ongoongoleleí ʻi he kamataʻangá. Peá na akoʻi leva ʻa e ongoongoleleí ki heʻena fānaú (vakai, Mōsese 5:6–12). “Pea ko ia naʻe pehē hono kamata ke malanga ʻaki ʻa e Ongoongoleleí, talu mei he kamataʻangá, pea fakahā ia ʻe he kau ʻāngelo māʻoniʻoni naʻe fekauʻi atu mei he ʻao ʻo e ʻOtuá” (Mōsese 5:58).
ʻOku hoko atu ʻi he taimí ni ʻa e malanga ko ʻení ʻaki ha kongakau ko ha kau faifekau ʻe toko 71,000 tupu. Ka ʻoku tau fiemaʻu ke tokolahi ange, ʻo toe tokolahi ange ʻaupito ʻi he ʻotu muʻá—ko ha kongakau ʻo e kau faifekau mo e kāingalotu.
Meʻa Te Tau Lava ʻo Ako ʻi Heʻetau Ngāue Fakafaifekaú
Lolotonga ʻeku ngāue fakafaifekaú, naʻá ku anga ki he ngāue fakafaifekaú pea kamata ke u fakakaukau lahi ange ki heʻema pōpoakí. Naʻá ku ongoʻi maʻu pē naʻe moʻoni ʻa e ongoongoleleí, ka naʻá ku maʻu ha holi lahi ke ʻiloʻi naʻe moʻoni ia. Naʻá ku lotu, ʻaukai, ako, ngāue, pea tatali ki ha tali.
Lolotonga ha lēsoni ʻi ha ʻaho ʻe taha, naʻá ku fakamatalaʻi ai ʻa e fakamatala ʻe Siosefa Sāmita ʻa e ʻUluaki Mata Meʻa-Hā-Maí:
“Naʻá ku mamata ki ha pou maama feʻunga tonu mo hoku ʻulú, ʻi ʻolunga ʻiate au, pea naʻe lahi ange hono ngingilá ʻi he laʻaá, ʻa ia naʻe maliu māmālie hifo kae ʻoua kuo tō ia kiate au. …
“ʻI he nofo mai ʻa e māmá ʻiate aú, naʻá ku sio ki he Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi, ʻokú na tuʻu mai ʻi ʻolunga ʻiate au ʻi he ʻataá. Naʻe folofola mai ʻa e toko taha kiate au, ʻo ne ui au ʻaki hoku hingoá, ʻo ne tuhu ki he tokotahá ʻo pehē—Ko Hoku ʻAlo ʻOfaʻangá ʻEni. Fanongo kiate Ia!” (Siosefa Sāmita—Hisitōliá 1:16–17).
ʻI he momeniti ko iá, naʻá ku lava ʻo ongoʻi hono fakapapauʻi mai ʻe he Laumālie Māʻoniʻoní kiate au ko e meʻa naʻá ku akoʻí ʻoku moʻoni. Naʻe mamata moʻoni ʻa e Palōfita ko Siosefa Sámitá ki he Tamaí mo e ʻAló, pea ko e Tohi ʻa Molomoná ko e folofola ia ʻa e ʻOtuá pea, ʻokú na fakamoʻoniʻi mo e Tohi Tapú ʻa hotau Fakamoʻuí. Ko ha nonga ʻeni naʻá ne ʻomai ki heʻeku moʻuí. Naʻa mo e ngaahi taʻu lahi kimui maí, ʻokú ne kei fakamāfanaʻi pē hoku lotó.
Naʻe hangē ʻeku ngāue fakafaifekaú ko hano maʻu ha mataʻitohi MA fakalaumālié. Ko e meʻa ʻoku ako ʻe he kau talavoú mo e kau finemuí ʻi he ngāue fakafaifekaú te ne tāpuekina ʻenau moʻuí ʻo taʻengata. ʻOku kau ʻi he ngaahi meʻa lahi, ʻoku nau akó ʻa e:
-
Founga ke ako, lotu, akoʻi, mo fakaʻaongaʻi fakaʻaho ai ʻa e ngaahi tefitoʻi moʻoni ʻo e ongoongoleleí.
-
Founga ke nofo ai mo e hoá ʻi he houa ʻe 24 ʻi he ʻahó.
-
Founga ke tokangaʻi ai ʻenau moʻui leleí.
-
Founga ke palani aí.
-
Founga ke fakaleleiʻi ai ʻa e ngaahi poto fakatakimuʻá.
-
Founga ke feohi lelei ai mo e kakai kehé.
-
Founga ke kumi, fakafanongo, pea mo tataki ʻe he Laumālie Māʻoniʻoní.
Ko e kau talavou mo e kau finemui ʻoku ngāue fakafaifekaú ʻe fakamālohia mo teuteuʻi kinautolu ke nau fehangahangai mo e ngaahi pole ʻo e moʻuí kapau ʻe hokohoko atu ʻenau fakaʻaongaʻi ʻa e meʻa kuo nau ako ʻi heʻenau ngāue fakafaifekaú.
Ko e ʻAhó ʻEni
Kuo akoʻi kitautolu ʻe hotau palōfita ʻofeiná, Palesiteni Lāsolo M. Nalesoni:
“Kuo teʻeki ai ha taimi ʻi he hisitōlia ʻo māmaní ʻe mātuʻaki mahuʻinga fakataautaha lahi ange ai ʻa e ʻilo ʻo hotau Fakamoʻuí ki he moʻui ʻa e tangata kotoa. Fakakaukau ki he vave hano fakaleleiʻi ʻo e ngaahi fepaki fakalilifu ʻi he funga ʻo e māmaní—mo ia ʻi heʻetau moʻui fakafoʻituituí—ʻe lava ke fakaleleiʻi kapau naʻa tau fili kotoa ke muimui kia Sīsū Kalaisi mo tokanga ki Heʻene ngaahi akonakí.”
Ko e ʻahó ʻeni ke tau fakahaaʻi ai ʻa e ʻulungāngá mo e lototoʻá pea vahevahe ʻa e ongoongolelei ʻo Sīsū Kalaisí. Ko e ʻaho ʻeni ke teuteu ai hotau toʻu tupú ke ngāue ʻi he kongakau ʻa e ʻEikí ʻi he ngāue fakafaifekau akoʻí pe tokoní. ʻOku fiemaʻu kimoutolu ʻe he māmaní! ʻOku ʻi ai ha ngaahi tui ke fakamālohia, ngaahi nima ke hiki hake, mo e moʻoni ke malanga ʻaki (vakai, Tokāteline mo e NgaahiFuakava 81:5).
ʻOfa ke ueʻi kitautolu ʻe he fakaafe ko ʻeni mei he ʻEikí ke tau ngāue mo hiki hake ʻa e fuka ʻo e moʻoní ʻaki ʻa e mālohi:
“Vakai, ʻoku ou pehē kiate kimoutolu, ko hoku lotó ʻoku totonu ke mou laka atu.
“ʻO hiki hake homou leʻó ʻo hangē ko e leʻo ʻo e talupité, ʻo fakahā ʻa e moʻoní ʻo fakatatau ki he ngaahi fakahā mo e ngaahi fekau kuó u tuku kiate kimoutolú.
“Pea ko ia, kapau te mou faivelenga, ʻe … fakakalauni ʻaki ʻa kimoutolu ʻa e lāngilangi, mo e nāunau, mo e moʻui taʻe-faʻa-maté, mo e moʻui taʻengatá” (Tokāteline mo e Ngaahi Fuakava 75:3, 5).