“Mei he Loto Mamahí ki he Fiefiá,” Liahona, Siulai 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Mei he Loto Mamahí ki he Fiefiá
ʻI heʻeku toutou lea ʻaki ʻi heʻeku fakakaukaú ʻa e ngaahi lea ʻo e ngaahi ouau fakatemipalé, naʻe hoko ha meʻa fakaofo.
ʻI he 1988, naʻá ku ʻalu mo ha kau faiako Pilitānia kehe ke faiako ʻi ha ʻapiako ʻi Sutani. Naʻe fiefia ʻa e fānaú, pea vave ʻemau fakaangaanga ki he haʻahaʻa ʻo e nofo ʻi ha fonua langalanga haké. Neongo ia, ka ko homau pule ngāué ko ha taki pule fefeka naʻá ne fakatangaʻi ha taha pē naʻe fakakaukau ʻoku fakafepaki ange ki ai ʻi ha faʻahinga founga. Naʻá ne fehiʻa ʻiate au talu mei he ʻaho naʻá ku taukaveʻi ai ha taha naʻá ne ngaohikoviʻi.
Naʻá ne ui au ʻi ha ʻaho ʻe taha ki hono ʻōfisí. Naʻe laka hake ʻi ha miniti ʻe tolungofulu ʻene tāpalasia au ʻaki e sīpinga kotoa ʻo e lea koví mo e fakamanamaná. Naʻá ku mavahe mei he lokí ʻi ha tuʻunga moʻutāfuʻua. ʻOku ʻikai ke u toe manatuʻi e au ʻa e founga ne u lavaʻi ai ʻa e toenga ʻo e ʻahó. Naʻe ʻikai ke u lava ʻo toʻo mei hoku ʻatamaí ʻa ʻene ngaahi lea taʻe-feʻungá, ʻi he efiafí kakato.
ʻI he taimi mohé, naʻá ku tangutu ʻi hoku mohengá ʻo lau ʻa e folofolá. Peá u tūʻulutui leva ʻo lotua fakamātoato ha fakafiemālie mo ha fakanonga, ka naʻe ʻikai pē ke u ongoʻi ha meʻa. Naʻá ku tokoto ʻi he mohengá ka naʻe ʻikai ke u lava ʻo mohe. Naʻe tuʻo ua ʻeku tuʻu hake, laukonga, tūʻulutui, mo lotu, ka naʻe ʻikai hano ola.
Naʻá ku fakakaukau, “Sai pē, ʻoku ʻikai ke tali maʻu pē ʻe he Tamai Hēvaní ʻetau ngaahi lotú ʻi he founga mo e taimi ʻoku tau fiemaʻú.” Naʻá ku nofo ai ʻi ha pō taʻe-mamohe mo loto mamahi.
Ka ʻi heʻeku toe tokotó, naʻá ku fakakaukau, “ʻOku toe ha meʻa ʻe taha te u lava ʻo fai.” Naʻá ku kamata ke toe fakalau ʻa e ngaahi lea ʻo e ngaahi ouau fakatemipalé ʻi heʻeku fakakaukaú. ʻI heʻeku fai ʻení, naʻe hoko ha mana fakaofo. Naʻe mahuʻi atu ʻa e mamahí mo e taʻe-mahinó meiate au, kae taumalingi mai ʻa e nonga mo e fiefia fakaʻofoʻofa tahá kiate au mo fakafonu hoku sinó kotoa.
Naʻá ku tuʻu hake ʻo lotu, ʻo fakamālō, ʻi he loʻimataʻia, ki he Tamai Hēvaní. Peá u toe foki leva ki hoku mohengá ʻo mohe. ʻI he ʻaho hono hokó, ʻa ia naʻe totonu ke fonu ʻi he manavasiʻí mo e mamahí, ko e ʻaho fakafiefia taha ia kuó u ngāue ai mo ha kalasi ko e fānau.
Naʻá ku fakatokangaʻi ta naʻe finangalo ʻa e ʻEikí ke u fakalaulauloto ki he ngaahi ouau ʻo e temipalé. Naʻe pehē ʻe Palesiteni Pilikihami ʻIongi (1801–1877) ki he Kāingalotu naʻe kolosi ʻi he maomaonganoá ke maʻu honau ngaahi tāpuaki ʻi he Temipale Nauvoo, “Tuku ke vela ʻi homou lotó ʻa e afi ʻo e fuakava naʻá ke fai ʻi he Fale ʻo e ʻEikí, ʻo hangē ha ulo taʻe-faʻa-maté.” Ko e taimi ʻoku vela ai ʻetau ngaahi fuakava fakatemipalé ʻi hotau lotó mo e fakakaukaú, te tau maʻu foki ai ha mālohi, nonga, mo ha fiemālie.