Ngaahi peesi fakalotofonuá
Mei he Fakaʻānauá ki he Aʻusiá: Ko e Lavameʻa ʻa Lotu ʻi he PathwayConnect
ʻI he 2023, naʻe ʻilo ai ʻe Tuʻipulotu Tupou, ʻa ia ʻoku ui ʻe hono ngaahi kaungāmeʻá ko Lotu, ʻa e PathwayConnect ʻo fakafou ʻi hono tehiná, ʻa ia naʻá ne toki ʻosi mei he polokalama [PathwayConnect] pea naʻá ne fakahikihikiʻi ʻa e polokalamá. Naʻe fakakaukau ʻa Lotu ke lesisita ʻi hono fakalotolahiʻi ia ʻaki ʻa e malava ke maʻu haʻane sikolasipi ʻe ala tokoni ke totongi ʻene akó. Naʻá ne pehē, “Naʻá ku fiefia ʻi he fanongo ki he faingamālie ko ʻení pea mo kau ki he polokalamá ni.”
Naʻe fokotuʻu ʻa e PathwayConnect ʻe he ʻUnivēsiti Pilikihami ʻIongí, pea ʻokú ne ʻomi ha hala fononga kuo fokotuʻutuʻu maʻá e kau ako ʻi he funga ʻo e māmaní ke fakatupulaki ʻenau ʻilo fakaakó, fakapalōfesinalé mo e fakalaumālié. ʻOku fakatefito ʻa hono faʻu ʻo e polokalamá maʻá e kakai hangē ko Lotú, ʻa ia ʻoku nau vēkeveke ke fakalakalaka ʻenau moʻuí ka ʻoku ngali faingataʻa ke nau maʻu ha ngaahi founga ke aʻusia ai ʻa e tuʻunga fakaakó.
Neongo ʻa e vēkeveke ʻa Lotú, ka naʻe kei hoko pē ʻa e PathwayConnect ko ha pole kiate ia koeʻuhí ko ha faingataʻaʻia ʻi he lea [faka-Pilitāniá]. Naʻá ne pehē, “Ko e pole lahi tahá ʻa e faʻu tohí. Naʻá ku taʻeoliʻia, pea ko e lea faka-Pilitāniá ko e lea fika ua ia ʻoku ou ʻiló, ka naʻá ku maʻu ʻa e loto-toʻa ke feinga pē—ʻo tatau ai pē pe ko e hā—ke aʻusia ʻeku taumuʻá.” ʻI he loto-fakapapau ʻa Lotu ke lavameʻá, naʻá ne vilitaki ai ʻo fakalakalaka ʻene taukei ʻi he lea fakafonuá.
Naʻe ola lelei ʻene ngaahi feingá ʻi heʻene lavameʻa ʻi he PathwayConnect. Naʻá ne fakahaaʻi ʻi he loto-houngaʻia, “Naʻá ku fiefia ʻi he A ʻeku māká ʻi he semesitā kotoa pē. Ko ha tāpuaki ia moʻoku, pea [koeʻuhí] ko ʻetau Tamai Hēvaní, ʻoku ou ʻiloʻi ʻoku ʻikai ke u tuenoa. ʻOkú Ne hiki hake au mo tokoniʻi au ke u ikunaʻi [ʻa e ngaahi faingataʻá].”
ʻOku ʻikai ke fakataumuʻa pē ʻa Lotu ki he lavameʻa fakatāutahá; ka ʻokú ne taumuʻa ke fakamālohia ia ʻo fakafou ʻi ha tuʻunga fakaako ʻoku māʻolunga angé mo e fakalele pisinisí. “ʻOku ou hanganaki atu ke hokohoko atu ʻeku maʻu mataʻitohi ʻi he Pule Fakapisinisí koeʻuhí ke u ngāue pē maʻaku, ʻo ʻikai fakafalala ki ha taha kae fokotuʻu haʻaku pisinisi pē ʻaʻaku mo tokoniʻi ʻa e kakai kehe ʻoku nau fiemaʻu ʻeku tokoní.” ʻOku fenāpasi ʻa e fakaʻānaua ko ʻení mo e ngaahi akonaki ʻa ʻEletā Russell M. Nelson, ʻa ia naʻá ne fakamamafaʻi ʻi ha lea ʻi he 2013, “Ko e faikehekehe ʻo e fakaʻamu ke ke lava ʻo tokoniʻi ʻa e kakai kehé mo e malava ke tokoniʻi kinautolú, ko e akó.”
Kuo fuoloa taʻu ʻa hono taukaveʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e mahuʻinga ʻo e akó ko ha maka-tuʻu-loto ʻo e moʻui fakafalala pē kiate kitá. Naʻe pehē ʻe Palesiteni Tōmasi S. Monisoni:
“ʻOku ou tapou atu ke mou tulifua homou akó . . . koeʻuhí ke mou mateuteu ke tokoni ʻo ka aʻu ki ha tūkunga ʻe fiemaʻu ai ke fakahoko ia.
“ʻE fakalahi atu ʻa homou ngaahi talēnití ʻi hoʻomou ako mo ʻiló. Te mou lava ke tokoni lelei ange ki homou fāmilí ʻi heʻenau akó, pea ʻe nonga hoʻomou fakakaukaú ʻi hoʻomou ʻiloʻi kuo mou mateuteu ki he ngaahi tūkunga te mou ala fehangahangai mo ia ʻi he moʻuí.”
ʻI he hoko ʻa Lotu ko ha faʻē kei talavou ʻoku ʻi ai hono fāmilí, naʻe ʻilonga ʻene mahino kakato ki he ngaahi tefitoʻi moʻoni ko ʻení ʻi heʻene foua ʻa e PathwayConnect, ʻo fakalakalaka ai ʻene taukei fakaakó, tupulaki fakalaumālie, mo mateuteu ke hoko atu ʻene akó ʻi he ʻUnivēsiti Pilikihami ʻIongi-ʻAitahoó. Talu mei heʻene kei ako māʻolungá, kuo hoko ia ko haʻane fakaʻānaua ke maʻu haʻane mataʻitohi BA ʻi ha ʻaho koeʻuhí ke ne moʻui fakafalala pē kiate ia mo tokangaʻi lelei ange ʻa e kakai ʻi heʻene moʻuí.
Ko e faleʻi ʻeni ʻa Lotu ki ha taha pē ʻoku fakakaukau ke fili ʻa e PathwayConnect:
“Siʻoku kaungāmeʻa mo e fāmili ʻofeina, kau ʻi he polokalama ko ʻení. ʻE tokoni ia ke ke aʻusia lelei ai ho ngaahi taumuʻá, ʻoatu ha ngaahi faingamālie lahi, pea te ke ako mo tauʻatāina ai.”