Leo o Sui Usufono
Ua Maua e se Ulugalii Ausetalia le Olioli ina ua Fesoasoani e Faamae‘a Malumalu o le Alii
Ua faasoa e se ulugalii Ausetalia le olioli i le auai ai i le faatinoina o auiliiliga o le fausaga o malumalu ma le tausiga i le Pasefika i Saute
O ni faipisinisi e toalua i le teuteuga mai le Australia‘s Gold Coast, ua maua le olioli ma le lotomalie e fesoasoani e tuu ni nai toe polesi matagofie e faamae‘a ai malumalu o Le Ekalesia a Iesu Keriso o le Au Paia o Aso e Gata Ai i le Pasefika i Saute atoa.
E umia e malumalu o le Ekalesia le taua tele faaleagaga mo ona tagata. E ese mai le toetoe atoa le 20,000 maota tapuai a le Ekalesia ia ua soo ai le lalolagi, ma ua faatumulia i savali faaleagaga ma musika i Aso Sa taitasi, o malumalu o nofoaga o le paia ma le filemu e faaesea ai mai popolega o le lalolagi.
O nofoaga e tupu ai faamanatuga aupito maualuluga o le faatuatua—o le faaipoipoga a ulugalii ma le “faamauina” faatasi o aiga mo le faavavau. Ona o nei fale e patino ona faapaiaina i le Alii mo sauniga nei, o le matagofie o totonu o malumalu e atagia ai lenei faamoemoega paia.
Ua i ai ia Michael ma Debbie Wilkin le potomasani patino i le tuuina atu o ni pa‘i mulimuli matagofie i nei fale maoae, ua lauiloa o “maota o le Alii”. O nei au faiteuteuga mai Robina, Ausetalia o nisi ia o ‘au filifilia e toatele i le lalolagi atoa, ua faakonekerate e le Ekalesia e faamae‘a ia toe polesi taua i nei malumalu matagofie.
Ua oo ina latou aofia ai i lenei galuega i se ala e le masani ai.
“Na tofia la‘u uo ma a‘u e faatino nisi o sauniga sui i le Malumalu o Brisbane Ausetalia,” ua faamatala mai e Michael. “Sa ou tietie atu i le malumalu i le veni o la‘u pisinisi, ma ina ua ou toefoi i ai ina ua mae‘a la‘u galuega atofa, sa sau se alii ia te au i le paka o taavale ma fai mai, o ia o le pule o fale ma fanua mo le Ekalesia i le eria.
“Sa ia fesili mai pe ou te fia manao e fai ni nai galuega mo le Ekalesia.”
Fai mai Michael, “Sa talosagaina i ma‘ua pe ma te mananao e fai ni nai teuteu valivali faapitoa (valivali i se vali auro faapitoa) i luga o se faatagata o le Agelu o Moronae (o se perofeta i Amerika anamua, o lē na muai tomatau maia le toefuataiga o le talalelei ma o lona faatagata o se atavaaia lea i tumutumu o nisi o malumalu o le Ekalesia). Sa ma ta‘u atu ia te ia ma te loto i ai, auina atu le ma talosaga, ma sa ma faia lena galuega manaia ma sa faamanuiaina ai lava i ma‘ua mai lena taimi e galulue i le tele o isi poloketi.”
Ua faamoemoeina e tagata o Le Ekalesia ia maota o le Alii e manatunatu ai i ituaiga o aafiaga latou te talitonu o le a latou maua i le afioaga o le Atua, o lea la e na o galuega aupito silisili e talia i ona auiliiliga uma. “E faapitoa tele nei fale, o lona uiga la o galuega tatou te faia e tatau foi ona atoatoa,” o le tala lea a Debbie.
La te faia vali faapitoa, faaaoga pepa tipi teuteu, valiteuteu faapitoa (e ta‘ua foi o le “faalau-auro” i le vali auro e 23 karati), palasa lipea ma ufipuipui, e oo lava i le faiga o lipea o meaafale. “I le tulaga o le galuega ma te faia, e mafai ona ma faia soo se mea e manaomia ona fai i le teuteuina o se malumalu,” le tala a Michael.
E galulue le ulugalii i malumalu ua uma ona faatuina ma ua talosagaina se toefaafouga o totonu, faapea foi i fausaga fou o malumalu. O le mea masani, o la la‘ua galuega toefaafou e faataunuu i le taimi o se tasi o vaitau e tapuni ai malumalu mo le faaleleia ta‘i afa tausaga, e masani pe tusa o le lua vaiaso pe ta‘ifaalua i se tausaga.
La te vave mauaina a la‘ua galuega atofa ma iloilo ia manaoga patino o malumalu e atofa atu, ona malaga ai lea i le eria. A taunuu, e savalia e Michael ma Debbie faatasi ai ma le pule o fale ma fanua o le malumalu ia le malumalu, ma tuu meafaapipii lanumeamata i mea uma la te vaaia ai se mea e manaomia ona toe fai pe polesi.
“E i ai se avanoa puupuu lava, e fai ai mea uma o lenei galuega o lea la ma te matua‘i taulai lava i ai,” na ta‘ua ai e Debbie.
“A mae‘a mea uma o i le ma lisi, ona ma savavali faataamilo ai lea ma toe vaavaai i ai—e vaai ai pe i ai se isi mea ma te le‘i matauina i le taimi muamua,” o lana tala lea. “O le faamautinoa ua mae‘a atoatoa ona fai ma lelei ona fai—o le lagona o le ausia o le faiga, o se tulaga faagaeetia lena.”
Ma, e pei ona maua e Michael ma Debbie, sa la oo i ni taimi maoae faafaaaliga ma le mauaina o faamanuiaga pe a la galulue ai i malumalu o le Alii.
“Sa ma manaomia ni pepatipi teuteu mo se malumalu sa ma galulue ai, ae talu ai ma te le‘i iloaina se tasi i lena aai faapitoa, sa na ona ma o ai i le initoneti ma maua ai se toalua pe toatolu e sapalaia pepa ia.” Fai mai Debbie, “Sa ma lagona le tosina atu i se tasi faapitoa, ae o le 11 i le po na manaomia ai nei pepatipi teuteu i le vave e mafai ai ona ma maua. Sa lei mafai ona ma maua o latou taimi faigaluega i le uepisaite, ae na faafuasei ona oo mai se uunaiga ia te au, “Ae a pe a tau ina e vili i ai?”
“Sa ma talanoaina afai ma te faia lena mea, atonu o le a tali mai le masini ma ta‘u mai ai o latou itula,” sa faaauau ai Debbie. “O lea, sa ou vilia ai le numera, ma sa tali mai le pule o le pisinisi.”
Sa i ai o ia i le ofisa i lena po ona sa feagai ona tagata ma ni nai faafitauli i se poloketi sa latou galulue ai. Mulimuli ane, ina ua o Michael ma Debbie e piki mai a la pepatipi teuteu fou, sa fai i ai le tamaloa e le masani ai ona ia i ai i le ofisa i lena taimi o le po.
“Sa ia fai ane na tatau ona sau e toetipi uma pepatipi teuteu mo lana lava poloketi, ma sa tuu o le a i ai iina seia aulia le lua po o le tolu i le taeao. E lei tupu lava lena mea muamua,” le tala a Debbie. “Ae sa ma anapopogi ma Mike ma tatalo i le aso atoa e uiga i lenei mea, ma ma te talitonu na ta‘ita‘i i ma‘ua e le Alii i le pisinisi e mafai ona fesoasoani ia i ma‘ua e faamae‘a le mea sa ma galulue ai.”
“E ese lo ma faafetai mo taimi faapenei.”
Fai mai Michael ma Debbie Wilkin o se taimi sagisagi fiafia tele lenei i lenei galuega faapitoa o le fauina o malumalu i le lalolagi atoa, ma e tumu i la‘ua i le faafetai i le mafai ona faatino o si a la‘ua matafaioi itiiti. “Ma te fiafia i nai elemene patino o se luitau, ma e ma te fiafia lava e galulue faatasi. E fai lava si ese—o se ‘au a se tane ma se ava. Ae lelei tele lo ma galulue faatasi,” le tala a Debbie.
“O se faaupuga lenei ua ou faalogo fai e isi, ‘O loo i ai le Alii i auiliiliga,” ma o nisi taimi ua mavae, sa ou taumanatunatu moni ai lava, ‘E moni?’” na faaopoopo mai ai Michael. “Ae e i ai moni lava o Ia pe a tatou tauivi i le mea sili, e taumafai e sue se vaifofo mo se faafitauli tatou te feagai, o le a Ia faaali mai ia i tatou le ala sili atu e fai ai.
“E ofoofogia moni lava le avea o se vaega o lena mea.”