Leo o Sui Usufono

Galuega o Talafaasolopito o Aiga: O La Tatou Faigamalaga o le Faatuatua ma le Sootaga

Saunia e Sister Marjorie Rae Papali’i

Ua tomanatu le ulugalii faamisiona o auaunaga, o Elder ma Sister Papali‘i i le mau faamanuiaga ua la mauaina e ala i aafiaga eseese i talafaasolopito o aiga.

“Na fetalai atu Iesu ia te ia, o A‘u o le toetu ma le ola. O le faatuatua mai ia te au, e ui lava ina oti, a e ola lava ia” (Ioane 11:25).

I le avea ai o se aiga, sa tonu ia i ma‘ua o le malumalu ma le talafaasolopito o aiga o le a avea o se vaega tele o lo ma‘ua olaga faaulugalii. Ua ma faamae‘aina nei le faitauafe o sauniga mo o ma aiga ua maliliu, e aofia ai le faitauselau o igoa Samoa, ia na ma aoaoina faapea sa faigata tele ona su‘e ona o le leai o se talafaasolopito tusitusia. Ae peitai, sa faatauanau pea ma faaalu e lo‘u toalua o Sosene Faleofe “Fe” le tele o itula ma aso i le Nofoaga Autu o Talafaasolopito o Aiga e faitau ia ata mataninii o pepa tuai o faamatalaga. I le mavae ai o se taumafaiga tele, sa mafai ai e ia ona faagasolo ia igoa na maua ma faafesootai i latou i ona laina faaleaiga. Ina ua ma aveina na igoa i le malumalu i masina taitasi, sa o se mea fiafia le iloa ua ma fusifusia faatasi o matou aiga e faavavau.

Ina ia faalautele le galuega, sa faatulagaina le tele o aso i tausaga taitasi i le malumalu mo tupulaga e fa o lo matou aiga: o o‘u matua, o lo‘u toalua ma a‘u lava, o lo ma atalii ma lona toalua, o atalii matutua o le ma fanau, o lo‘u uso, ma lona aiga. Sa matou faia papatisoga, faamauga, ma mulumuluga mo le faitau selau o o matou tauaiga i aso faapitoa nei faaleaiga i le malumalu, e tuufaatasia ai o matou aiga lautele i se ala semanu e le mafai ona faataunuuina ai.

I se tasi aafiaga e manatua pea, sa ou faigaluega i sauniga i le malumalu ae sau se uso i la‘u tamai potu. Mai le uluai upu na ia ta‘ua, sa matuai malosi le Agaga, ma sa ou tagi i le sauniga atoa. Ina ua alu ese atu o ia, sa ou matauina ai o le kata o le igoa, o la‘u lava, ma sa ou iloaina ai mai lenei aafiaga, na talia e lenei uso pele i talaatu o le veli le galuega sa ou faatulagaina mo ia.

O le faatumauina o lo tatou tuuto i le galuega o malumalu ma le talafaasolopito o aiga e le faigofie. E tatau ona tatou tuuto patino e lagolago le tasi ma le isi. E le‘i faigaluega muamua Fe i se komepiuta, ma na le‘i iloaina foi se mea e uiga i saite eseese e saili ai, ae e le‘i umi ae faamanuiaina o ia i lona faatuatua ma galuega lelei. Ua faaauau pea ona ina faaaogaina lona malamalama fou ua maua i le faalauteleina o ona gafa Samoa.

I se tasi Aso Toonai i le Ofisa Autu o Talafaasolopito o Aiga, sa tosina atu ai au i se pusatoso o atamataninii, lea e teu ai ata laiti o pepa o faamatalaga taua. I totonu, sa ou maua ai se faaputuga mo Kent, Egelani, ia na faila i lalo o se atunuu sese. Ina ua tuuina i lo latou pusatoso sa‘o, sa ou vaaia e mai le eria lava e tasi o lo‘u aiga lautele, o lea sa ou nofo ifo ai i lalo e faitau ata mataninii taitasi. Na faafuasei ona ou tau atu i se aiga o ni matua ma se fanau e toaono, lea sa mafai ona ou faafesoota‘ia o se tuafafine i le toeaina o lo matou aiga. Matou te le‘i iloa o ola, vagana ai i le taimi lena. O se faataitaiga manino lea o le ala e taiala ai pea i tatou e le Agaga i lenei galuega paia.

I le toemanatunatu ai i la‘u lava faigamalaga, na fai mai lo‘u tina e faapea, na tuulafoai a‘u e lo‘u tamā moni ona o a‘u o se teine, aua sa manao i se tama. I se tasi aso, a o faatautaua le tagamea, sa ou lagonaina se uunaiga malosi e faamae‘a lona galuega faaleaiga i le malumalu, ina ia faamaluluina ai lo‘u loto ia te ia ma faamatuu atu ai le avega mamafa o le teena i le fiasefulu tausaga. E le‘i pine ae ou maua le uso o lo‘u tamā moni ma le fiaselau o igoa faaleaiga ia na mafai ona ou aveina i le malumalu. Ina ua maliu le uso lea o lo‘u tamā, sa aumai i lona afafine le faatagaga ou te faia ai foi galuega o le malumalu faapea lona uso ua maliu, ua fiafia o le a i ai sona ‘aluga e taoto ai lona ulu i le lagi. Na folafola mai le manuia e lo‘u faamanuiaga faapeteriaka, pe a ou faamae‘aina la‘u talafaasolopito o aiga, ma e mafai ona ou molimau atu ua ma mauaina le manuia tele i lenei galuega paia.

“Ma o lenei, o‘u uso e, ma tuafafine pele e ma alofaina, tuu mai ia te au e tuuina atu ia te outou o mataupu autu nei e faatatau i e ua maliliu ma e o ola e le mafai ona tatou ala māmā atu ai i luga, e faatatau i lo tatou olataga. Ona o lo latou olataga ua tatau ma taua tele mo lo tatou olataga, e pei ona fai mai Paulo e faatatau i tamā—e faapea e le mafai ona faaatoatoaina o i latou e aunoa ma i tatou—pe mafai foi ona faaatoatoaina i tatou e aunoa ma o tatou tagata maliliu” (Mataupu Faavae ma Feagaiga 128:15).

“O e ua maliliu e salamo o le a togiolaina e ala i le usitai i sauniga o le Maota o le Atua” (Mataupu Faavae ma Feagaiga 138:35).