Sailiga o Lo’u Tāua

Faamatalaga: O se aafiaga moni lava lenei na faasoa mai e se tasi sa sao mai i le faatautalaina/sauaina. Ua suia igoa ma faamatalaga e iloa ai.

O lenei tusi sa muai tusia mo se aoaoga faalesiteki e fesoasoani ai i epikopo e galulue faatasi ma latou na toe sao mai i sauaga faalefeusuaiga. Ua i ai le faatagana e faasoaina atu iinei.

Epikopo Pelē,

Ou te fia fesoasoani atu ia te outou ia malamalama pe faape’ī le avea ma se tasi e tauaveina se mealilo matagā—o se mealilo sa tumau mai pea talu mai a o laitiiti.

O outou taitoatasi ua outou vaai ia te a’u, ma e toatele outou e silafia lo’u tagata. O nisi o outou sa tatou galulue faatasi. Ua ta’u mai ia te a’u o outou manatu faapea o a’u o se tamaitai talavou e lelei tele. Sa ou auauna i se misiona ma ou umia foi valaauga tāua faaleta’ita’i. Ae peitai, o se vaega o a’u, o loo mauaa i lo’u olaga ua tuanai, lea e lē mafai ona iloa i tua mai o foliga vaaia i fafo—e ui lava i nisi taimi sa ou lagona ai sa iloa e tagata e uiga i lo’u olaga ua tuanai. O tagata e pei o a’u e tele lava ina lagona faapea i soo se sekone lava o le a “maua” i matou, ona oo mai lea o se taunuuga o se ta’uleagaina matagā ma le teena.

Ou te le iloa po o le a lo’u matua ina ua amata—ma atonu o le a ou lē iloa lava—ae sa faatautalaina/sauaina faalefeusuai a’u o se teineitiiti, muamua e nisi o tamaiti tuaoi ma mulimuli ane e se tausoga e matua atu. O taimi taitasi sa ou lagona lo’u lē tāua ma ou taumafai e faagalo. Sa matuā lelei lava ona ou nanāina na manatuaga i se tulimanu pogisa o lo’u mafaufau seia oo i lo’u tausaga faaiu i le aoga maualuga ina ua ou i ai i se tulaga sa faamanatu maia ia te a’u e uiga i le sauaga.

Ina ua mavae lena, sa ou manatua ni nai mea mai le taimi ua tuanai ma faasoa atu le mea sa tupu ia te a’u i la’u uo sili. O ia o le tagata muamua ma le pau foi lea o le tagata sa ou faatuatuaina i la’u mea lilo o le tele o tausaga, auā a faatautalaina/sauaina oe faalefeusuaiga, e tele lava ina e vaai ia te oe lava e te auleaga, palapalā, nofosala. E matuā loloto ou lagona o le ita ia te oe lava. E te talitonu afai e iloa e tagata, o le a latou vaai i le matagā ma sui la latou vaai mai ia te oe.

I le aoga maualuga, ma le tele lava o isi taimi talu mai lena, sa ou oo ai i ni vaitaimi o le faama’i paee—o se tulaga, ua ou iloa, e matuā taatele lava i tagata ua afaina i sauaga faalefeusuaiga. O le faatautala/sauaina faalefeusuaiga e ta’u maia le tulaga o le aveesea o le mafai ona pulea se mea e paia ma faaletagata lava ia. Sa ou lagonaina se manao matuā loloto ia mafai ona pulea se mea. Sa ou manatu, o le pulea o lo’u fia ai, o le a fesoasoani ia te a’u e faafoia o’u lagona o le ita ia te a’u lava. E moni, e le i aogā lena mea, ma sa na ona faateteleina le leaga o le tulaga o lo’u faaogeina ina ua faasolosolo ina lē mafai ona pulea. Sa i ai foi i si mafuaaga mo lo’u faaaogaina o lea amio lē lelei o le taumafa. I le vaitaimi lona lua le faatautalaina/sauaina o a’u, sa fai mai e lē na faatautalaina/sauaina ia te a’u tala e uiga i lo’u tino faapea e le o mea sa manao ai o ia. O le mea lea sa aoaoina a’u ia i ai lagona lē lelei e uiga i o’u foliga vaaia.

Ou te fefe foi o loo mafai ona iloa e tagata le mea sa tupu ia te a’u. O le mea lea e faigata mo a’u le alu i tafaoga faamasani. I sootaga ma fegalegaleaiga ou te i ai e i ai lo’u uiga e nanau e avea faapei o se pili fesuisuiai ona lanu ma faafetuutuunai a’u e tusa ai ma mea e fiafia pe lē fiafia i ai le tagata o loo ma tafafao faamasani. E faigata lava le oo mai ia te a’u o le talitonu lelei ia te a’u lava ia. O se lagona masani lea i tagata ua afaina.

I lo’u olaga atoa lava sa ou tauivi ma la’u mea lilo matagā. E faigata ona iloa lo’u mamā i luma o le Atua ma tuueseesea le mea lena mai le mea o loo sese moni lava—o le faaleagaina o a’u e le tagata sa faia le sauaga. Ua matuā faafaigata atili lenei mea i le mea moni faapea ina ua faaleagaina a’u, o a’u ua na o se teineitiiti e lē sala ma sa lē malamalama o lae sa lē mafai ona ou tuuina atu se maliega i le amio. Aisea na ou le taofia ai le sauaga? Aisea na ou tuua ai e faifaipea? Aisea na tupu ai lea mea? A o ou tuputupu a’e, sa ou fuafuaina le tulaga o le tuputupu a’e o lo’u malamalama ia te au lava ia o se teineitiiti. Sa faateteleina o’u lagona nofosala a o sese ona ou vaai i lo’u gafatia i le taimi ua tuanai e filifili ai ma sa faateteleina ma faateteleina atili pea a o faagasolo atu tausaga taitasi. O ia ituaiga o mafaufauga e taatele. E lē taitai foi fesoasoani le faapea o le toatele o i matou, talu ai e leaga tele o matou lagona e uiga ia i matou lava, e faapena ona tosina atu i matou i alii o ē faamalosia o matou lava manatu lē lelei e ala i lo latou faia o i matou o ni meafaitino ae le o ni afafine o le Atua. O le tele o lo matou mafaufau ita ia i matou lava e tupu mai i lenei lava ituaiga o mafaufauga ma amioga.

O le faatautalaina/sauaina faalefeusuai foi o a’u na mafua ai foi miti leaga i po. Mo le tele o tausaga sa i ai vaitaimi sa avea ai nei miti leaga i po ma mala ia te a’u. Ua ou aoao ia ou faaeteete i mea ou te tuu i lo’u mafaufau ina ia le tele ai mea e faaaoga e Satani e faatupu ai nei miti e mata’utia le leaga.

O nei miti leaga i po sa tata’ia a’u ou te talanoa i lo’u epikopo e uiga i le faatautalaina/sauaina faalefeusuai o a’u. Na aoga ia talanoaga. Sa ta’ita’ia ai lo’u epikopo e valaaulia a’u ou te auai i se vaega a le Tautua mo Aiga o le AAG. O le taimi ma le siosiomaga o mea tonu lava ia sa ou manaomia.

Ou te faafetai sa aoao a’u e lo’u Tamā Faalelagi e uiga i lo’u taua ma sa onosai ia te a’u i taimi sa ou lē tagi atu ai ia te Ia i aso sa sili ona matuā ou tuua toatasi ai. O le tatalo e tele lava ina faigata mo tagata ua afaina i sauaga faalefeusuaiga. O le faatuatuaina [o se isi] e oo mai ma le matuā faigata tele—e oo lava i le faatuatuaina o le Atua, ma o nisi taimi aemaise lava le faatuatuaina o le Atua.

Ina ua faamanu’alia a’u o se teineitiiti, sa solia ai lo’u lagona loloto i totonu o le saogalemu ma le talitonu i le aao puipui o le Atua. O le laasaga o le tatalo ma le taumafai ma le faamoemoe sa atinae e se fuafuaga e agai i luma ma faatuatua, se taumafaiga e atinae le lotomaualalo, ma se malamalama tuputupua’e e alofa le Atua ia te a’u ma finagalo ia ou fiafia. O vaaiga sa ou maua mai i la’u misiona, lea sa ou aoao ai e tatalo ma le faatuatua, sa matuā taua tele i lo’u faamalologa. O le auai foi i vaega faafaufautua o Tautua mo Aiga o le AAG sa taua foi i le laasaga o lo’u faamaloloina.

Sa manaomia ona ou aoao e mafai ona fesoasoani le Alii e faamaloloina a’u. O manu’a o le faatautalaina/sauaina faalefeusuaiga e matuā loloto le o’oo’oga. O le galulue ai ma lo’u epikopo ma le vaega o Tautua mo Aiga o le AAG ua fesoasoani e tatala, faamamā, ma fusifusia o’u manu’a. O loo ou maloloina. Ou te masalomia o le a faaauau pea ona i ai taimi o le a tiga ai o’u manu’a, ae ua sili atu le mea ua i ai nei nai lo mea sa masani ai. E matuai o’u faafetai lava.

Epikopo e, ia silafia o outou o faataitaiga i auala tou te faia ai i latou o loo siomia outou ma le tulaga o le faaaloalo tou te faaali atu i tamaitai. O le vaai atu i alii amiotonu i le talalelei e aumaia ia i matou le faamoemoe o loo i ai alii i lenei lalolagi e mafai ona faatuatuaina. O se tasi o fesoasoani sili sili mo i matou o le faamalosiauga lea ia saili lo matou taua o le tagata lava ia. E ia i matou uma lava le meaalofa o le avea ma fanau a le Atua ma tagata taitoatasi o se tofi taua . O se oa pe a matou iloa e i ai lo matou taua ma a oo ina matou maua se ala i le Faaola, o Lē faamautinoa mai lo matou taua e ala i Lana taulaga. E amata ai ona matou malamalama i le auala e mafai ai e Ia ona tauave o matou faavauvauga ma o matou faanoanoaga.

Ua ou maua le malosi sili i le Faaola. Ou te iloa e alofa o Ia ia te a’u ma popole alofa mo a’u. Ua ou iloa foi le tele e mafai ona fesoasoani ai o Ia ia te a’u pe a ou talia o Ia i lo’u loto. Ua avea a’u ma se tagata malosi atu ona o lenei malamalama. O loo umi naua pea le ala ou te alu ai.

O la’u tatalo o loo ia te outou epikopo lelei e. Tou te tauaveina se avega mamafa, ae ou te iloa o loo ia te outou le Alii ma faamalosia outou. Faafetai mo lo outou i ai i se tulaga o loo mafai ai e le Alii ona faaaoga la outou fesoasoani. Ia faamanuia outou e le Alii i mea uma tou te faia.

Ma le faamaoni lava,

O lo outou tuafafine

Afai o oe po o se tasi e te iloaina ua faatautalaina/sauaina, saili vave le fesoasoani mai i pulega faalemalo, auaunaga e puipuia tamaiti, auaunaga e puipuia tagata matutua. E mafai foi ona e sailia le fesoasoani mai se fautua o se tagata na aafia po o se atamai faafomai po o se faafautuaga. O nei auaunaga e mafai ona fesoasoani e puipuia oe ma taofia isi sauaga. Tagai i le itulau “O i Ai i se Faalavelave” mo nisi faamatalaga.