Aoao Mai Lea Aso i Lea Aso

Faamatalaga: O se aafiaga moni lava lenei ua faasoa mai e se tasi sa sao mai i le faatautalaina/sauaina. Ua suia igoa ma faamatalaga e iloa ai.

Sa 33 o’u tausaga, e le i leva ona tete’a, ma filifili e toe amata ona tafao faamasani. I ni taimi eseese se lua, sa toso ai a’u e alii sa ou feiloai i ai i gaoioiga faaleagafesootai. O le iloa ai o mea sa tutupu ia te a’u sa matuā faigata tele. Sa umi lava se taimi faato’ā ou faailoaina mea sa tutupu. Sa oo lo’u tino i se tulaga faateia ma sa lagona le pepē; sa ou oo i taimi sa ou lagona atoatoa ai le faaaogaina, lē aogā, ma le maasiasi.

Sa i ai taimi sa ou lagona ai le fiu aua o le taumafai sa matuā faavaivai tagata. Sa ou iloaina e lē mafai ona ou manumalo i lenei taua na o a’u. Sa ou saili se fesoasoani mai se faufautua tomai faapitoa, ma sa fesoasoani ma taialaina a’u i le taimi faanoanoa.

Sa ou fefautuaai foi ma lo’u epikopo i se faiga faifaipea. Faatasi, sa laua taiala ma faamalosiau ia te a’u ia taumafai pea, ma faamalosiauina a’u e atinae la’u sootaga ma Tamā Faalelagi ma Iesu Keriso. Sa ou iloa i taimi sa ou faapalasi ai i o’u tulivae ma tauanau atu mo le fesoasoani sa toe faamamāina a’u, aumaia ia te a’u le malosi, i sia mea itiiti i sia mea itiiti, e faafoia ai lenei mea. O le faamoemoe ma le faamalologa e mafai. E tele mea sa ou aoaoina e uiga ia te au lava, lo’u Tamā i le Lagi, ma lo’u Faaola, i lenei malaga atoa.

Ua ou aoao e faatuatua ia Tamā Faalelagi. Na te silafia le mea e sili ona lelei. Ua ou aoao pe a ou manaomia le fesoasoani, fautuaga, po o le taitaiga ou te faapalasi i o’u tulivae.

Ua ou aoao po o ai a’u uo, ma ua ou aoao po o le a le uo moni lava. Ua ou aoao foi le auala e faatulaga ai laina tuaoi.

Ua ou aoao le alofa, agalelei ma le osonai e sili atu.

Ua ou aoao ia ou agalelei atu ia te a’u lava, ina ia aua le tuuaia au lava, aemaise lava o se mea na tupu e le o a’u e mafua ai. Ua ou aoao ina ia lē faamasino pe faitioina a’u lava. O loo ou aoao ou te alofa ia te a’u lava ia ia sili atu a o faagasolo aso taitasi.

Ou te faafetai mo le lototele filemu ua fesoasoani ia te a’u e avea ma tagata ua i ai nei a’u. O loo ou tuputupu pea ma aoao mai lea aso i lea aso, ae ua matuā ou faafetai mo le ala o loo ou savalia ma mo mea uma lava ua ou faatoilaloina.

Atonu o se malaga filemu lenei—e le toatele nisi o iloa le mea sa oo ia te a’u—ae ou te manatu o le tele o taimi o le faatinoga sili ona filemu o le lototele e mafai ona avea ma mea sili ona malosi.

Ou te malamalama i le mana faamalolo sa mafai ona folafola mai e Keriso ona o Lana Togiola. Ua ou malamalama sili laitiiti atu pe faapefea ona Ia onosaia o’u tiga ma puapuaga i le faatoaga ma luga o le satauro. Ou te talitonu i le mana o agelu ma le puipuiga latou te aumaia. Ou te iloa sa lē tuua na o a’u i lenei malaga, ma ua faamalosia la’u molimau i le iloa e moni lava e aafia le Atua i vaega uma o o tatou olaga. E le tau lava ina siaki mai e Ia i tatou faa tasi i se taimi; Na te faia mea uma faaagāga mo i tatou, ma Na te tagatagai mai ia i tatou.

Ua tupu malosi tele atu la’u molimau. Sa ou aoao i le moni o le lalolagi o agaga. Sa ou iloa sa ou tauivi ma le fili i aso taitasi. I nisi taimi ou te vaai faalemafaufau ia te a’u lava ia o ou faamauluina le ofutau faaleagaga; sa fesoasoani lenei mea e aumaia ia te a’u le malosi. Sa ou iloa e tatau ona ou puipuia faaleagaga a’u lava ia mai le mamafa ma le puaoa sa ou savali ai ina ia faailoa atu ma talia o’u aafiaga. O o’u tiga sa matuā loloto ma moni ma sa tiga moni ai lava lo’u fatu ma lo’u tino atoa. I nisi taimi, sa ou lagona ai e pei e ma’i lo’u tino.

Ae peitai, o lenei aafiaga ua aumaia ai foi i luga se malosi i totonu ia te a’u—o se malosi ou te le i iloa o i ai iina. O se malosi e agalelei, faamalosiau, ma faagaeetia. O se malosi e ta’u maia ia te a’u e mafai ona ou faia mea faigata. O se malosi ou te iloa o le a uunaia a’u i taimi o faigata ma luitau. O se malosi e sili atu le iloaina o a’u nai lo lo’u iloa o a’u lava. Sa ou lagonaina se toe faaolaina o lo’u agaga, o lo’u loto, lo’u tagata faavavau lea sa nonofo faatasi ma Tamā Faalelagi, o lo’u agaga lea e iloa mea ou te agavaa i ai.

O o tatou agaga e sili mamao lona taua nai lo le mea e mafai ona tatou mafaufauina! A o tatou faalagolago i le fesoasoani ma le mana o Iesu Keriso, i le iuga e mafai ona tatou faatoilalo, faafoia, manumalo ma faamanuiaina! O i tatou o atalii ma afafine o se Tupu Faalelagi, ma o se mea lena e olioli ai! Ua faia i tatou mo mea silisili ma matagofie—mea e lē mafai ona vaai faalemafaufau i ai pe lagonaina. Ia tatou olioli i tagata o i ai i tatou; tatou te matagofie ma ofoofogia i le silafaga a lo tatou Tamā Faalelagi. Ua matuā taua lava i tatou! Ou te talitonu e naunau o tatou agaga e faatasi i lo tatou aiga ma lo tatou Tamā Faalelagi ma toe mafuta ai i Lona afioaga. Ou te avatu ia te Ia a’u viiga, lo’u Tamā, lo’u Tupu

Afai o oe po o se tasi e te iloaina ua faatautalaina/sauaina, saili vave le fesoasoani mai i pulega faalemalo, auaunaga e puipuia tamaiti, auaunaga e puipuia tagata matutua. E mafai foi ona e sailia le fesoasoani mai se fautua o se tagata na aafia po o se atamai faafomai po o se faafautuaga. O nei auaunaga e mafai ona fesoasoani e puipuia oe ma taofia isi sauaga. Tagai i le itulau “O i Ai i se Faalavelave” mo nisi faamatalaga.