E Mafai Ona Ou Toe Lagonaina Le Filemu

Faamatalaga: O se aafiaga moni lava lenei ua faasoa mai e se tasi sa sao mai i le faatautalaina/sauaina. Ua suia igoa ma faamatalaga e iloa ai.

O a’u ma nai o’u tei sa matou fananau mai i totonu o se aiga lē lelei. Mai lava i le taimi o ou tamaitiiti, ou te manatua o’u matua sa tele lava ina misa. Sa laua aoa’iina i matou i auala sa ou manatu o faiga masani ae o lea ua ou iloa nei o sauaga: tu’i, po, sasa, faataele i vai aisa, faalumaina, taufaamata’u, ma le tosoina o lauulu ma taliga. O nisi taimi sa laua tatogi mai mea faitino ia i matou. O le tele lava o taimi sa le i i ai i laua i le fale ma o lo’u uso matua sa pule o ia. Sa mulimuli o ia i faataitaiga a o’u matua i le faiga o matou.

O le a le faagaloina lava ia te a’u le taimi na amata ai e Lui ona faatautalaina/sauaina a’u faalefeusuaiga ina ua ono o’u tausaga. O lenei mea sa masani lava ona tupu pe a na o ma’ua sa i ai i le fale. Faapea lava a’u e na o a’u lava sa ia faatautalaina/sauaina faalefeusuaiga seia oo ina ou vaai ia ia ma lo’u ina ua valu o’u tausaga.

Sa oo ina leaga tele le sauaga a Lui i le āluga o tausaga. Sa ia fai mai ia te a’u afai ou te lē faia le mea e manao ai, o le a ia fasiotia a’u. Sa ou talitonu ia te ia. E tele taimi i lo’u talavou sa leai ai so’u faamoemoe ma lagona le matuā mafatia atoatoa, ma ou moomoo ai ia mafai ona ou mou atu pe oti. Sa ou lagona le nofosala ma tuufesili i lo’u mafaufau po o a mea leaga sa ou faia ua matuā leaga ai le faasalaina o a’u. Sa ou fefe i taimi uma. Sa ou tatalo i le tele o taimi i le Atua; ae peitai, sa ou manatu sa matuā le faafofoga mai lava o Ia ia te a’u. Sa ou lagona le leai o se puipuiga ma le tuulafoaiina.

Sa ou fefe e ta’u i o’u matua e uiga i faiga a Lui. Ma sa vaavaai mai Lui i taimi uma. Ina ua i ai o’u matua, sa ia faaaogaina ana tāga faitino e taufaamata’u mai ai ia te a’u ma faaali mai ia te a’u le mea e tupu pe a ou tautala i se mea. Sa faifaipea lo’u taumafai e lafi mai lo’u uso ma sa ou lē lagona se saogalemu i totonu o lo’u lava fale. Sa ou manao ou te nofo mai le aoga ma ou alu ou te faigaluega ina ia laitiiti ai le taimi ou te i ai i le fale. Ae peitai, sa lē faatagaina a’u ou te faia lea mea.

I se tasi aso a o 11 o’u tausaga, sa tuuina mai e lo’u tamā se tupe e faatau ai vaiinu mo le aiga. A o ou savali i le faleoloa, sa oso mai Lui mai o’u tua ma faatonuina a’u e avatu ia te ia le tupe. Fai mai o ia, “Afai e fesili atu Tamā ia te oe poo fea vaiinu, ta’u i ai ua gaoi e le tagata le tupe mai ia te oe.”

Sa ou lelavā lava lenei tulaga i lo’u olaga ma ou musu e usitai ia te ia. Sa oo ina ita o ia ma fasi a’u seia ou pa’ū i le eleele. Sa ou tu i luga ma ou tausulusulu i lo’u tamā. Faatasi ai ma o’u loimata o loo tatafe mai i o’u foliga, sa ou ta’u atu ia te ia le mea sa faia e Lui. Sa matuā ita tele lo’u tamā ia te ia.

Ina ua uma lena mea, sa ou lagonaina sina toomaga. Ae ou te le i taua i lo’u tamā e uiga i le sauaga faalefeusuaiga; sa ou maasiasi ma toetoe lava a ou lagona o a’u e mafua ai ona o mea matagā faalefeusuaiga sa fai mai Lui ou te faia. Ina ua uma ona ou tautala i lo’u tamā, sa taofi loa le faatautalaina/sauaina faalefeusuaiga e Lui o a’u, ae sa faaauau pea ona ia fasia a’u ma faatiga a’u. Sa ou aoao ou te ola ma le tiga. O le mea lea sa leai se faatusatusaga i le mea sa ia faia muamua.

Mulimuli ane, sa filifili ai Lui e auai i le vaegaau. Mo i matou, o le filifiliga sili ona leaga lena sa ia ono faia. Sa fiafia lo’u tina ma lo’u tamā o le a aluese Lui mai lo matou aiga mo se taimi, ae sa matuā faigata le taimi o Lui i le vaegaau. Sa leaga atili ai lona mafaufau. O le a lava se mea sa ia aafia ai i le vaegaau sa faateteleina ai lona natura sauā sa i ai. Ina ua foi mai o ia mai le militeli, sa sili atu ona leaga lana amio nai lo le taimi muamua .

Mulimuli ane sa amata e Lui lona lava aiga. Sa matou faamoemoe o le mea lea o le a fesoasoani ia te ia e sui ai. Peitai e le o le tulaga lena. Na ia faatoateleina ana tagata e faatautalaina/sauaina. Sa fetagisi i taimi uma lona toalua ma lana fanau. Sa faaauau pea ona ia misa ma i matou faapea foi ma o matou tuaoi.

I le 18 o o’u tausaga, sa iu lava ina ou filifili e tuua lo’u aiga. Sa matuā ou lelavā lava i lo’u olaga. Sa i ai o’u ma’ila’ila ma ponaivi gaui e faamanatu mai ai ia te a’u sauaga sa faaoo e Lui ia te a’u.

Ina ua mavae ni nai tausaga sa ou feiloai ai i se tamaitai talavou ma faaipoipo, ma le moomoo ia faia se aiga matagofie o le a sili atu nai lo le aiga na ou ola a’e ai. Ae peitai, e le i lelei foi lena tulaga, ma muta ai foi ma la’u faaipoipoga. Sa ou matuā faanoanoa tele. Sa aveesea la’u galuega. Sa lē mafai ona ou toe aoga. Sa ou solia le tulafono o le lēgaviā ma le toe alu i le lotu. O se vaega o lo’u tagata sa foliga sa leai se fesootaiga ma le olaga. Sa leai so’u faamoemoe po o se faamalosiauga.

Sa iu ina amata ona ou matuā tatalo malosi i le Atua e fesoasoani mai ia te a’u. Sa oo ina ou maua le lototele ma ta’uta’u atu a’u agasala i le epikopo. Sa auina atu a’u e lo’u epikopo i le Tautua mo Aiga o le AAG ina ia maua le togafitiga. I le taimi muamua sa ou manatu o a’u faafitauli e le tetelē tele. Ae peitai, sa amata ona ou faasoa atu lo’u talaaga ma feagai ma a’u mataupu e matautia le leaga. Sa ou aoao e faaleleia a’u sootaga ma o’u tuafafine. Sa ou iloa ai foi sa fai ma a’u vaisu feusuaiga ma amata ona auai i fonotaga a le LDS Addiction Recovery Program. [Polokalame AAG Toefaaleleia Mai Vaisu] Sa ou iloa ai foi le tele o mea e uiga ia te a’u lava i lena faagasologa.

O se auala faigata, ae ina ua mavae sina taimi, faatasi ai ma faamalosiauga mai a’u uo ma i le polokalame toefaaleleia, sa ou filifili ai e toe foi atoatoa mai i le Ekalesia. Sa amata ona ou matuā galue malosi ina ia faamagaloina a’u i a’u filifiliga sa faia o se taunuuga o lo’u tiga ma ia agavaa e toe alu i le malumalu.

Ua ou maua tali i totonu o fonotaga toefaleleia. O iina e mafai ona saoloto le faasoa atu o o’u manatu ma lagona. O a’u uo i le polokalame e malamalama i o’u faafitauli ma latou te lē faamasino. Latou te taliaina a’u mo le tagata e i ai a’u ma vaai i le susulu o lo’u lumanai.

O la’u malaga e faaauau pea ona manaomia le taimi, onosai, alofa, auaunaga, fesootaiga tatala, ma se loto maualalo. E taitasi sitepu laiti ou te lalaa ai, ma maua ai le toomaga mai le avega mamafa i luga o o’u tauau. E ala i le mana o Keriso ma Lana Togiola, ua ou maua le pulea sili atu i lo’u olaga Ua suia e le Atua lo’u agaga, ma ua mafai ona ou toe lagonaina le filemu. O lea ua i ai lo’u faamoemoe mo le lumanai.

Afai o oe po o se tasi e te iloaina ua faatautalaina/sauaina, saili vave le fesoasoani mai i pulega faalemalo, auaunaga e puipuia tamaiti, auaunaga e puipuia tagata matutua. E mafai foi ona e sailia le fesoasoani mai se fautua o se tagata na aafia po o se atamai faafomai po o se faafautuaga. O nei auaunaga e mafai ona fesoasoani e puipuia oe ma taofia isi sauaga. Tagai i le itulau “O i Ai i se Faalavelave” mo nisi faamatalaga.