Tasi le Aso i le Taimi

Faamatalaga: O se aafiaga moni lava lenei ua faasoa mai e se tasi sa sao mai i le faatautala/sauaina. Ua suia igoa ma faamatalaga e iloa ai.

Ou te lē manatua tonu lava pe fia lo’u matua ina ua amata ona tupu le sauaga. O lo’u tuagane, lea e tusa e iva tausaga e matua ai ia te a’u, sa amata ona sauaina faalefeusuaiga a’u. O nisi taimi sa tupu le sauaga i le ao a o o ese o’u matua ae tausitama o ia. I se tasi taimi sa ia kiina le leitio—ou te manatua pea le pese sa taina. E ese lo’u ita i lena pese.

Ina ua atoa le valu o o’u tausaga, sa tatau ona papatisoina a’u e lo’u tamā. O le mea na tupu sa lē mafai ai e ia ona auai i le aso sa fuafuaina ma sa lē manao lo’u tina e toe tolopo i se isi aso lo’u papatisoga, o lea sa fai mai ai o ia e papatiso a’u e lo’u tuagane. Sa ou le iloa le tala e fai, o lea na ou tuua ai e fai e ia. Ina ua mavae, sa ou fesiligia lo’u papatisoga mo se taimi umi lava.

O le isi na faatautalaina/sauaina a’u o lo’u tausoga. Sa amata ona ia faatautalaina/sauaina a’u ina ua o mai lona aiga e asia i matou mo le lua vaiaso. Sa fitu pe valu o’u tausaga. Sa ou matuā ita i nei mea uma.

E tusa e lua tausaga mulimuli ane, sa siitia mai ai le aiga o lo’u tausoga e latalata mai i lo’u aiga. Sa matou asiasi ia i latou mo le faaiuga o vaiaso, ma i le taumafanafana matou te nonofo ai mo le fia vaiaso i lea taimi ma lea taimi. Sa faaauau pea le sauaga. E taumafai lava o ia ia maua toatasi a’u. Sa ou lagonaina le inoino ma le palapalā ma le vaivai.

I le 12 o o’u tausaga sa ou talanoa ai i lo’u epikopo e uiga i le faia o se pepa faataga o le malumalu e faia papatisoga moe ua maliliu. Ina ua fesili mai le epikopo i se tasi o fesili o le faatalatalanoaga mo pepa faataga, sa amata ona ou tagi. Sa ia iloa le uiga o lena mea. Pau lava lana fesili, “O ai?” Sa ou ta’u i ai na o lo’u tausoga. O lo’u tuagane sa toeitiiti foi mai i le fale mai lana misiona, o lea na ou le faia ai se tala e uiga ia te ia. Sa ou tauivi ma lena filifiliga mo le tele lava o lo’u olaga.

Sa amata ona ou inu ava malosi i le vasega valu po o le iva. I le tausaga o lo’u talavou sa ou aafia ai faalefeusuaiga ma nisi o a’u uo tama. Sa ia te a’u se uiga “Ou te lē kea” ma sa ou faia soo se mea sa mananao ai ia te a’u. Ina ua uma le aoga maualuga sa i’u ina ma nonofo faatasi ma la’u uo tama pe tusa mo se tausaga seia ma lē toe uo.

Sa fesoasoani ia te a’u se uo lelei ou te mafaufau e uiga i le mea sa ou manao e fai i lo’u olaga. Sa amata ona ou toe alu i le lotu ma toe faasa’o lo’u olaga. Sa iu lava ina ou faaipoipo i se tagata ofoofogia. Ina ua 13 tausaga talu ona ma faaipoipo, sa ou ta’u atu ia te ia e uiga i le sauaga. Sa na ona tago lava o ia opoopo atu a’u i ona lima ma fusi a’u. Sa fesoasoani o ia e ave a’u mo faufautuaga, ona amata ai lea ona ou auai i togafitiga faavaega. Sa ou faanoanoa mo le tele o masina ina ua uma ona ou ta’ua i lo’u toalua e uiga i le sauaga, ae ina ua uma ona ou auai i faufautuaga taitoatasi ma faavaega, ua sili atu lava lo’u lelei.

Ua ou oo i le tele o aafiaga mai le sauaga. O a’u o se tina e matuā puipuia la’u fanau. E lē faigofie ona ou faatuatuaina tagata. E faigata tele ia te a’u ona faia ni filifiliga na o a’u.

I nisi auala ua ou faaaogaina le mea ua ou aoaoina e avea ai ma matua lelei atu. Ma te aoaoina ma lo’u toalua le ma fanau e uiga i auala tatau e tago ai. E i ai le ma tulafono o le faitotoa-tatala ma ta’u i le ma fanau e mafai ona talanoa mai ia i maua e uiga i soo se mea.

E i ai o’u aso leaga, ae ua ou aoao e faia mea uma i le tasi le aso i le taimi. Ua itiiti nei taimi e oo mai ai aso leaga. Ua i ai lo’u faamoemoe mo le lumanai.

Afai o oe po o se tasi e te iloaina ua faatautalaina/sauaina, saili vave le fesoasoani mai i pulega faalemalo, auaunaga e puipuia tamaiti, auaunaga e puipuia tagata matutua. E mafai foi ona e sailia le fesoasoani mai se fautua o se tagata na aafia po o se atamai faafomai po o se faafautuaga. O nei auaunaga e mafai ona fesoasoani e puipuia oe ma taofia isi sauaga. Tagai i le itulau “O i Ai i se Faalavelave” mo nisi faamatalaga.