O La’u Malaga

Faamatalaga: O se aafiaga moni lava lenei ua faasoa mai e se tasi sa sao mai i le faatautala/sauaina. Ua suia igoa ma faamatalaga e iloa ai.

Sa faatautala/sauaina faalefeusuaiga pea lava pea a’u i le amata mai i lo’u 6 seia oo i lo’u 14 e se tausoga e sefulu tausaga e matua ai ia te a’u. Sa matuai o’u latalata lava i lo’u tausoga lea ma lona aiga. Sa ou i ai i taimi uma i lo latou fale. Sa sili ona u alofa ia i latou nai lo upu e faamatala ai. E pei lava ona taatele i mataupu o sauaga faalefeusuaiga o tamaiti, sa le i mafai e lo’u mafaufau laitiiti ona malamalama i le aafiaga o le sauaga seia oo i se tausaga e malamalama ai—i le tulaga o a’u, e tusa o le 16 o tausaga. Nai lo o le malamalama o le sauaga e le i mafua ia te a’u (e faapefea ona mafua ia te a’u … o se tamaitiiti-6-tausaga e le tatau ona iloa pe aafia foi i mea na aoao ai a’u ma sa faia ia te a’u), sa ou teufatuina le sauaga ma tuuaia a’u lava ia. O o’u lagona o le nofosala ma le inoino ia te a’u lava ia sa matautia le tele! Na o le pau lava le auala sa ono mafai ai ona ou aloese mai i le ita-ia te a’u lava o le saili lea o se auala sa faatagaina a’u e lagona o loo ou pulea lo’u olaga (e ui lava ou te le i pulea). I le avea o se talavou, o lenei “pulea” sa faaalia mai ia lava i ituaiga o faama’i ‘ai—anorexia nervosa ma le bulimia [faama’i pa’e’e].

Sa faasolosolo ina ou vaivai tele faaletino ma faalelagona. Sa “pa’i i le maualalo” e tusa o le 100 pauna i lo’u mamafa ma sa oo lava ina manaomia ona taofia a’u i le falemai—o lo’u fatu ma totoga sa amata ona lē toe aogā. O se taunuuga, sa ou aoga i-le-fale faatasi ai ma le fesoasoani a faiaoga lagolagosua. Sa galue la’u foma’i e fesoasoani mai ia te a’u e maua se mamafa lelei atu ma sa ia tuuina atu foi a’u i se foma’i o le mafaufau. O ia o se alii lelei sa matuā fesoasoani malosi tele ia te a’u! I le taimi o a ma faatalatalanoaga faafaufautua, sa amata ona ou talanoa e uiga i le sauaga sa tupu ma lagona o le lē mautonu ma le tiga sa tumau pea ia te a’u. Sa amata ai iina lo’u auala umi o le faamalologa.

Ini nai masina mulimuli ane, sa iu ina ou faia se filifiliga faapea o le a lē mafai ona toe “salu i lalo o le kapeta” ni mea i totonu o lo matou aiga—o se mea faapenei e lē tatau ona nanaina, lē amanaiaina, pe teu ia lilo nai lo o le feagai ma ia mea. Sa ou fefe o loo faia foi e lo’u tausoga le mea lea e tasi i isi tamaiti laiti ma sa ou iloa sa tumu o ia i ponokalafi a taimaiti. Sa ou iloa le loloto o le manu’a sa oo mai ia te a’u i sauaga, ma sa ou lē manao i nisi lava tamaiti laiti e puapuagatia ona ou te le i maua le lototele e ta’u ai le mea na tupu. O lea na ou lipotia ai loa le sauaga.

O le mea e leaga ai, o le lipotiga sa tutupu ai faafitauli i lo’u aiga, lea na mafua ai lagona sili atu o le nofosala ia te a’u. Ina ua salalau atu le tala sa faatautalaina/sauaina faalefeusuai a’u e lo’u tausoga, sa faasoa mai tagata o aiga latou te le i manao e “faaituau.” Ae peitai, sa le i i ai lava so’u manatu sa i ai se “itu.” Ou te le i manao foi i se isi e tuuesea lo’u tausoga pe faafitia o ia. Pau lava le mea sa ou manao ai o se faailoaina o le mea sa tupu, o se mea matuai leaga tele sa ou oo i ai o a’u o se tamaitiiti, ma sa tatau i lo’u tausoga ona feagai ma taunuuga ma tali atu mo filifiliga sa ia faia—ma i le faagasologa o ia tulaga e maua ai se fesoasoani ma se lagolago sa ia manaomia. O le iuga mo a’u, e ala i faufautuaga ma le lagolago a lo’u epikopo, ua ou faamagaloina lo’u tausoga ma i latou i lo’u aiga o ē sa lē lagolagoina a’u—e le o toe avea ma sa’u avega mamafa e tauave. O loo i ai le Toatasi e sili nai lo a’u o lē sa totogiina le tau ina ia le manaomia ai ona ou tauaveina lena avega; oka lo’u faafetai mo lo’u Faaola.

Mo soo se tasi ua faamanu’alia aI ou te talosaga atu ia te oe ‘aua e te fiu. ‘Aua nei aveesea le faamoemoe. ‘Aua nei taofia le agai i luma. E le oo mai le faamalologa i se po se tasi. O nisi taimi o le atoatoa e le oo mai i lenei olaga, ae o le ala tatou te savalia sa le i faia ia matuai atoatoa le sasa’o ma le molemole. O le a i ai i taimi uma patupatu ma omoomo, lugā ma lālō, tavi’ovi’o ma feliuaiga. O lo tatou avanoa lea e faatulaga ai la tatou vaai i le tafailagi ma savali pea, pe na o le tasi le laa i le taimi (e tusa lava pe i ai foi ni laa se lua i tua i lea taimi ma lea taimi). E ui lava o lo’u sauaga faalefeusuaiga sa muta i le tele o tausaga talu ai, ma ua ou savali i le ala umi lava o le faamalologa, ae e i ai lava taimi ou te ala a’e ai ua toe faia foi sa’u miti leaga i po o lo’u sauaga.

Po ua ou malepelepe ea e faavavau i lenei mea? Matuā leai lava. Atonu e tumau pea faailoga mai manu’a o le taimi ua tuanai, ae latou te lē faamatalaina a’u. Manu’a? Ioe. Malepelepe? Leai. I le avea ai o se tagata matua o lē ua tele lava ina faamaloloina, ua ou aoao e faamafanafana le tamaitiiti manu’a o loo nofo pea i totonu ia te a’u. O lo’u toe moe ai i le maea atu o se tasi o na miti leaga faatasi ma upu faamafanafana o loo tafe atu i le mafaufau loloto o se tamaitiiti laititi e fefe: “E le o oe e mafua ai. E le tuuaia oe. ‘Aua e te avea le mamafa o lenei tiga i luga o oe lava.” Ou te talitonu i na upu ma faamalosiau I soo se tasi o sē sa faamanu’alia ia manatua, e le o oe ena mafua ai! E alofaina oe. E te le o malepelepe. Faatasi ai ma le taimi, o le a faamaloloina manu’a uma ma o le a toe faasa’o sese uma aua o “ia o le ua malosi aoao e laveai” (2 Nifae 31:19).

Afai o oe po o se tasi e te iloaina ua faatautalaina/sauaina, saili vave le fesoasoani mai i pulega faalemalo, auaunaga e puipuia tamaiti, auaunaga e puipuia tagata matutua. E mafai foi ona e sailia le fesoasoani mai se fautua o se tagata na aafia po o se atamai faafomai po o se faafautuaga. O nei auaunaga e mafai ona fesoasoani e puipuia oe ma taofia isi sauaga. Tagai i le itulau “O i Ai i se Faalavelave” mo nisi faamatalaga.