Mauaina o se Lagona Faafouina e Le Tagata Mo Ia Lava

Faamatalaga: O se aafiaga moni lava lenei na faasoa mai e se tasi sa sao mai i le faatautalaina/sauaina. Ua suia igoa ma faamatalaga e iloa ai.

E tusa o le taimi sa valu ai o’u tausaga, sa amata ai ona faatautalaina/sauaina faaletino a’u e lo’u tamā. Ou te lē manatuaina le taimi muamua na tupu ai; pau lava le mea sa ou iloa i le taimi na ou vasega 4 ai, o le sasa o a’u e lo’u tamā o se vaega o lo’u olaga i aso uma. Mo ni nai tausaga, sa ou taliaina ai o se vaega masani [o le olaga], e oo lava ina faapea o se mea sa tatau ona oo ia te a’u. Sa fai mai soo lava lo’u tamā o lo’u sesē ua “faasala” ai a’u faapea. Sa ia ta’u mai ia te a’u o a’u o se tamaitiiti sili ona leaga, e sili atu le leaga nai lo isi tamaiti na te iloa. Pe ana faapea e sili atu lo’u usitai, pe ana faapea e mamā atu lo’u potu, pe ana faapea ou te lē faaitaina tele o ia, pe ana faapea o a’u o se afafine lelei atu, semanu na te lē sasaina a’u. Fai mai o ia sa pau lava le mea na ia faia ai lea mea o le aoao ai o a’u i se lesona ma faaleleia atili ai a’u. O le mea moni, e fai mai o ia pau lava le mafuaaga e sasa ai a’u ona e alofa o ia ia te a’u. Ma i le avea o se teine laitiiti o lē sa alofa i lona tamā ma matuā manao lava ia alofa mai o ia ia te ia, sa ou talitonu ia te ia.

Sa ou galue malosi i le gafatia e mafai ai e se teineitiiti laitiiti e faia mea uma lava sa ia manao mai ou te faia. I le taimi lenei o le olaga, sa ou matuā filemu lava—e oo lava ina matuā usitai lava. Sa ou matuā taumafai malosi e usiusitai, e faaaloalo, e poto, ae lē aoga lava. Sa suia tulafono i tiami uma, ma sa ou i le itu sese i taimi uma lava.

Sa amata ona suia la’u amio i le tausaga o lo’u talavou. Sa amata ona ou lagona le ita i le leai ma se mea sa ou faia e foliga e sa’o. A o faateteleina le ita ma le lē fiafia, sa amata ona ou tali atu pe a sasa a’u e lo’u tamā. Sa faateteleina ai le misa, ma o nisi taimi sa misi ai le aoga, le lotu, ma mea fai faaleagafesootai ona o le faatautala/sauaina. Sa masaa atu lo’u ita i mea uma lava o lo’u olaga. Sa matou misa ma tagata uma—uso ma tuagane, uo, faiaoga, ma ta’ita’i o le Ekalesia. Sa faapei a’u o le po ma le ao—fiafia i le tasi minute, ae ita ma faatiga i le isi.

Ae le na o le pau lena o le mea na suia. Sa palasi i lalo o’u togi i le aoga. A o le i amataina le sauaga, sa tuu a’u i se a’oga maualuga e i ai polokalama mo aoaoga televavave. I le faaiuga o le aoga maualuga, sa ou tauivi e faaagavaa mo le faauuga. O le tagata filemu, mafaufau, ma talitonu sa ou amata mai ai sa liua i se tagata lē talitonu, faalogogatā ma tumu i le ita. E ui i nei mea uma, ou te le i taua lava i se isi le mea sa tupu i le fale. Sa ou manatu o lo’u tiutetauave lea o le tausia o se mea lilo. E ui lava e oo atu i le aoga maualuga sa ou iloaina o le faatautala/sauaina e sese, ae sa ou lagona o lo’u tiute le tausia o foliga i fafo o lo’u aiga i lo’u lē talanoa lea e uiga i le mea sa tupu i tua o faitotoa tapunipuni. Sa ia te a’u le faitalia e faamautinoa ai sa foliga masani pei o aiga uma lo matou aiga i o matou tuaoi ma tagata o le uarota.

Sa faaauau pea ona faateteleina le lē pulea i le taimi o lo’u talavou matua. Sa vave ona ou aluese ma le fale o o’u matua ma ou manatu o le a sili atu le olaga i le taimi lava ou te ola ai na o a’u. Ae e leai—ma i le tele lava o itu sa sili atu ona leaga. O le pogisa i lenei vaega o lo’u olaga e le o se mea ou te fia mafaufau i ai. Sa faateteleina le faanoanoa, ita, ma le popole. Sa faifaipea ona ou i ai i ni sootaga ma fegalegaleaiga sa vavave ona suia faalelagona ia sa ou lē iloa pe faapefea ona ou alu ese mai ai. Sa matuā ou manao lava ia lelei ma filemu lo’u olaga, ae sa leai ma so’u iloa pe faapefea ona faia lena mea pe faape’ī foi foliga. Sa ou lagona e pei a’u o se tagata ese sa nofo i tausiusiuga pogisa o le lalolagi. E mafai ona ou vaavaai atu ma matamata a o ola fiafia ma ola masani tagata fiafia, ae e lē mafai lē mafai lava ona faatagaina a’u ou te auai ma i latou. Pau lava e le o au o se tasi o i latou.

E tusa o le taimi lea, sa amata ai ona ou maua musumusuga faaleagaga ou te alu i se misiona. Sa leai so’u naunautaiga ou te auauna atu i se misiona ma o lea sa ou tetee ai i musumusuga mo ni nai tausaga. Sa iu lava ina ou taliaina ma maua se valaau e auauna atu i Europa i sasae. Sa faigata la’u misiona, ma e talu ai ona o a’u lava taua i totonu ia te a’u lava ia, sa i ai ni taimi sa faigata ai ona auauna isi faatasi ma a’u. Sa matuā sili ona faamanuiaina a’u i ni soa sili ona agalelei ma se peresitene o le misiona agaalofa ma o lona faletua sa aoaoina faalefaufautua o le soifua maloloina faalemafaufau. O le taimi lea o la’u misiona sa ou filifili ai e saili se fautuaga mo le sauaga sa feagai ma a’u i lo’u tuputupua’e.

I lo’u faato’ā taunuu lava i le fale, sa ou valaau ai i le ofisa o Tautua mo Aiga o le AAG e latalata ane i lo’u fale. Sa ou le iloa poo le a la’u mea sa fai; sa fesili mai le teine o le ofisa po o le a le mea sa ou manaomia ai se togafitiga ma sa ou fai atu ma le lē mautonu, “Ia, sa masani ona sasa soo lava a’u e lo’u tama.” Sa ia tofia a’u i se faufautua ma aumai se aso ma se taimi o lo’u faatalanoaga muamua.

Ou te manatua sa ou tu i fafo o le fale o le Tautua mo Aiga o le AAG a o le i faia lena faatalanoaga. Sa ou lagona lo’u matuā faavalevalea tele. “Ua ou matuā faatelēina lava lenei mea,” sa ou fai ai ia te a’u lava. “E tatau ona ou alu i le fale.” Sa ou mautinoa lava a ou faamalamalama atu le mafuaaga o lo’u i ai iina, o le a faataavavale mata o le faufautua ia te a’u, talanoa mai faapea o togafitiga e mo tagata e i ai faafitauli “moni” lava, ma faapea mai ua ou faatelēina lava le mataupu. Toetoe lava a ou lē alu i totonu.

Ae ua matuā ou fiafia lava sa ou alu i totonu. E mafai ona ou faasino tonu lava i le minute sa suia ai lo’u olaga i la’u uluai faatalatalanoaga o lo’u togafitiga.

O la’u faufautua o le tagata muamua lava lea sa faalogologo mai i la’u tala ma le malamalama ma le tiga alofa moni lava. Sa faamaonia e ia faigata sa ou faafeagai mo le tele o tausaga. Sa ou lē iloaina muamua le tele o lo’u manaomia o le faamaoniga seia oo mai i lena minute—sa ou faalogoina e pei o le ea mālū i totonu o se potu sa tapunia mo le toeitiiti 20 tausaga. Sa ia faailoa mai le tele o mea sa ou mafaufau i ai o lo’u “tulaga malepelepe” (o lo’u ita, faanoanoa, ma le tosina i sootaga faaleuo matuā sili ona leaga) o ni aūga o le PTSD (post-traumatic stress disorder [gasegase popole ona o mafatiaga sa oo i ai]) ma tali masani, e oo mai i siosiomaga vevesi, O a’u o se tagata masani e pei o isi? E lē afaina? Ou te le i faalogo i lena tala talu mai le taimi o 8 o’u tausaga. Mo le taimi muamua lava, sa ou lagonaina le faamoemoe loloto e mafai ona ou fiafia. Sa ou savali ese mai lena faatalatalanoaga ma se lagona fiafia i lo’u loto ou te le i lagonaina lava muamua.

Toeitiiti atoa le tausaga o faia lo’u togafitiga. O nisi faatalatalanoaga sa matuā loloto; o nisi sa māmā. I le faagasologa o lena tausaga, sa ou galue ai i le toe faaleleia o le leaga faalemafaufau sa faia e le sauā o lo’u tamā. Sa fesoasoani la’u foma’i ia te a’u e faailoa mai auala fou ou te mafaufau ma amio a’i na semanu e lē mafai ona ou mafaufau i ai a’u lava. Sa amata ona suisui lemu lava o’u mafaufauga mai le leaga ma le manao e faaleaga a’u lava i manatu lelei ma le faamalosiau. Sa tele ina ou tagi i taimi o togafitiga, i le ofisa o la’u foma’i ma taimi na o a’u. Ae sa amata foi ona ou ‘ata faanatura ma lagona moni le filemu ia te a’u lava ma le olaga. E oo mai i le faaiuga o lo’u togafitiga, sa mafai ona ou mafaufau ma talanoa e uiga i sauaga e aunoa ma lagona o le faanoanoa, fefe, po o le maasiasi. Sa ou aoaoina ni tulaga taua, e aofia ai le iloa o le sauaga e le i tupu lava ona o a’u ma o a’u o se tagata agavaa ma le taua.

Sa ou alu i le togafitiga ma se lalolagi atoa o tiga lilo i luga o o’u tauau. Pe ana ou le alu ae ou tumau ai pea i lo’u ala muamua, ou te iloa semanu e faaauau pea le tītō i lālō o lo’u olaga. Na semanu ou te taumafai pea i le mea sili ona mafai e “taofiofi faatasi mea uma,” ae e pei lava ona sa i ai muamua, na semanu e aveese mamao ma mamao atu lava a’u e lena tiga i ni tulaga ma filifiliga sili ona tiga. Sa ou aluese mai lena togafitiga ma se lagona toe faaleleia o ai a’u faapea ma tomai o le olaga na semanu ou te mauaina lava i totonu o se siosiomaga lelei ma maloloina i le aiga. Sa ia te a’u se lagona lelei atu po o ai a’u, auala e taulimaina ai faafitauli, le lagona o le mafai ona faatuatuaina, ma le mea e fai pe a puaoa lo’u mafaufau i manatu pogisa ma le leaga. Sa ou sau i fafo mai lena togafitiga ua ou sauni, nai lo le fefe, mo le olaga.

Ua toeitiiti lava 10 tausaga talu ona amata lo’u togafitiga muamua. Talu mai lena taimi, sa ou faamaeaina le kolisi ma le aoga maualuga atu, amata se galuega, ma faaipoipo. Ou te matuā galue malosi e avea o se leo lagolago mo le soifua maloloina faalemafaufau ma faamalosiau ia i latou o e o loo tauivi e saili le fesoasoaniga mai ia i latou e i ai tomai faapitoa. O loo i ai pea taimi e faigata ai; ou te le manatu o le a o ese atoatoa lava na tulaga. Ae o lea ua ou iloa le auala e taulima ai i latou ina ia lē mamafa tele ma lē tumau i se taimi umi. O lo’u olaga semanu e faateleina le fiafia, faaoaina, ma sili atu ona faaatoatoaina pe ana leai le faatautala/sauaina. Ou te matuai faafetai lava mo le faamanuiaga o le togafitiga.

Afai o oe po o se tasi e te iloaina ua faatautalaina/sauaina, saili vave le fesoasoani mai i pulega faalemalo, auaunaga e puipuia tamaiti, auaunaga e puipuia tagata matutua. E mafai foi ona e sailia le fesoasoani mai se fautua o se tagata na aafia po o se atamai faafomai po o se faafautuaga. O nei auaunaga e mafai ona fesoasoani e puipuia oe ma taofia isi sauaga. Tagai i le itulau “O i Ai i se Faalavelave” mo nisi faamatalaga.