Sailiga o Aave Ninii o le Malamalama

Faamatalaga: O se aafiaga moni lava lenei na faasoa mai e se tasi sa sao mai i le faatautalaina/sauaina. Ua suia igoa ma faamatalaga e iloa ai.

Sa foliga sa amata lelei lava la’u faaipoipoga. Sa loloto lou alofa ma sa ou fiafia. Ae i le mavae ai o sina taimi, sa amata loa sauaga faaletino, faalelagona, ma faaleupu. Sa ou manaomia se auala matou te o ese ai ia tausisia ai lo’u saogalemu faapea ma la’u fanau. O lo’u lē iloa pe faapefea ona amata se lumanai fou mo lo’u aiga ma lo’u fefe sa taofia a’u mai lo’u saili i se fesoasoani. Ae i le mavae ai o le iva tausaga, sa ou mafaufau ai i le auala e faasaoloto ai.

Sa faapefea ona ou alu ese mai lena sauaga i le mavae ai o le iva tausaga o loo ou ola ai? O le a se mea na ou faia? Sa iu lava ina taofi lo’u faalogo i le leo o le fili lea sa fai mai ia te a’u e leai se auala e alu ese ai. Nai lo lena, sa ou liliu e saili aave ninii o le malamalama ia sa tuu mai e lo’u Tamā Faalelagi o se taiala mo a’u e tuua ai le faaipoipoga faatautala/sauaina. Sa manaomia le aoao ia iloa tatalo ma mulimuli i Lana taitaiga e maua ai na aave ninii o le malamalama:

Sa ou tausi i a’u feagaiga, totogi la’u sefuluai, ma aoao pe faapefea ona mulimuli i musumusuga a le Agaga—o na gaoioiga sa tumau ai le taula o le faatuatua i lo’u Tamā Faalelagi.
Sa ma galulue ma lo’u epikopo ma maua le malosi e maua ai faaaliga faaletagata lava ia. E ala i lena malosi sa ou iloa ai le taimi e tatau ai ona o ese.
Sa ou maua le vaaiga ma le tali o le a le mafai lava ona ou fesoasoani, faaleleia, pe taitaia lo’u toalua agai i le malamalama. Sa i ai o ia i aao o Tamā Faalelagi—sa tatau ona ou tuua o ia!
Sa ou maua lo’u tutoatasi faaletupe i le auai i aoaoga ma avea o se faiaoga (ae sa atoa le lima tausaga i la’u faaipoipoga e ausia ai lena tulaga).
Sa tata’ia au e tulaga na oo i ai i se alii leoleo lea sa aumaia ia te a’u faamatalaga o se nofoaga tutotonu mo faalavelave.
Sa fesoasoani mai ia te a’u le nofoaga tutotonu mo faalavelave e maua se poloaiga mo se puipuiga malu lē tumau.
Sa tuuina mai e le faamasinoga ia te a’u se poloaiga mo le puipuiga malu tumau, faapea se tete’aga ma le puipuiga atoatoa o le ma fanau.

Sa i ai faaletonu faalemafaufau ma faalelagona a o ou faamaloloina; sa tupu nei mea i le taimi o miti leaga i po. Sa ta’u mai ia te a’u e le fili ni pepelo, e pei o le, “Ua tele tele foi oe: tele tele galuega, tele tele tamaiti, tele tele faafitauli. O ai o le a manao ia oe pe afai lava e te alu ese? Ua tele tele mea e te feagai ma oe. Sa e vaivai tele e te fesoasoani i lou toalua.” Sa tu’i tu’i mai e le fili manatu leaga i lo’u taua o a’u lava, ma taumafai e faatalitonu a’u ou te lē aogā. O le leo faalavelave sa taavalevale i totonu o lo’u ulu i le uma ai o nei miti leaga ou te faafetai lava e le i umi ona tumau.

Aisea? Ona o le matuā tēlē tele o le galuega e tatau ona ou faia: O a’u o se tina o le fanau e toalima, o le toatolu e maua i le ma’i o le autism [ma’i o le mafaufau]. Sa ou tausia ma o loo ou tausia a’u feagaiga. Sa ou faiaoga i le vasega lima i tamaiti e maua i le autism [ma’i o le mafaufau]sa ou mauaina lo’u tusipasi faiaoga, ma sa ou mauaina lo’u tikeri faatufugaga i le aoaoga faapitoa i le taimi lava e tasi. A o ou tulimatai i la’u galuega, la’u molimau, ma lo’u olaga, sa ou maua se vaaiga ma se faamaoniga o o’u faamanuiaga. O lena faamaoniga sa faafilemu ai le leo o le fili.

Sa ou maua foi le vaaiga ma le faamoemoe o le a mafai ona toe atinae le fesootaiga, faauooga, ma le alofa. Sa ou maitau, tusitusiga i lau tusi faamaumau, ona ou faitau lea ma toe faitau pea lava pea ina ia iloa ai mamanu, lagolago, faatulagaga, faauooga, ma faaletonu e ono tutupu i soo se isi o i tatou.

A o ou aoao e toe lagona le alofa, sa ou aoaoina ni vaega mamana se lua: (1) O le alofa o lo tatou Tamā Faalelagi mo Lana fanau uma lava e atoatoa ma (2) ona o lena alofa, O le a le faalavelave Tamā Faalelagi i le saolotoga o Lana fanau. E ala i lo tatou saolotoga e mafai ona tatou filifilia ai le malamalama po o le pogisa, alofa po o le taua. E mafai ona tatou faalogo i musumusuga a le Agaga. E mafai ona tatou maua le faamoemoe. Ma i le faaiuga, e mafai ona tatou sailia aave ninii o le malamalama e taitaia i tatou mai le loloto o sauaga.

Afai o oe po o se tasi e te iloaina ua faatautalaina/sauaina, saili vave le fesoasoani mai i pulega faalemalo, auaunaga e puipuia tamaiti, auaunaga e puipuia tagata matutua. E mafai foi ona e sailia le fesoasoani mai se fautua o se tagata na aafia po o se atamai faafomai po o se faafautuaga. O nei auaunaga e mafai ona fesoasoani e puipuia oe ma taofia isi sauaga. Tagai i le itulau “O i Ai i se Faalavelave” mo nisi faamatalaga.