Pagkat-on—Labing Dugay nga Oras: 60 Minutos

1. Unsa ang Emosyonal nga Kalig-on?

Basaha:

Aron mahisama sa Manluluwas, ang matag usa manginahanglan nga moatubang sa mga hagit ug mga kalisod atol niini nga kinabuhi. Ang malampusong pagdumala sa mga hagit sa kinabuhi nagkinahanglan og hugot nga pagtuo diha ni Jesukristo ug emosyonal nga kalig-on. Ang emosyonal nga kalig-on mao:

• Ang abilidad sa pagpahiangay ngadto sa emosyonal nga mga hagit uban sa kaisog ug hugot nga pagtuo nga gisentro diha ni Jesukristo.

• Pagtabang sa imong kaugalingon ug sa uban sa labing maayo kutob sa imong mahimo.

• Pagpaningkamot alang sa dugang nga tabang kon gikinahanglan.

Kini nga kurso gidesinyo sa paglig-on kaninyo sa espirituhanong paagi ug sa pagtudlo kaninyo og pipila ka sukaranang mga kahanas alang sa pagdumala sa mga hagit ug mga kapakyasan sa kinabuhi. Makakat-on ka usab gikan sa mga kasinatian ug tabang sa ubang sakop sa grupo.

Palandonga:

Pangutan-a ang imong kaugalingon, nganong ikaw gusto nga mas malig-on sa emosyonal nga paagi? Isulat ang imong tubag sa ubos.

2. Pagdawat sa mga Hagit isip Kabahin sa Plano sa Dios alang Kanato

Basaha:

Isip ang Amahan sa atong mga espiritu, ang Dios hingpit, aduna sa tanang gahom, ug nahibalo sa tanang mga butang. Siya nahigugma kanatong tanan, ug ang atong pag-uswag mao ang Iyang buhat ug himaya. Ang Iyang plano alang kanato mao ang paglambo ug pag-usab hangtod kita mahimong sama Kaniya. Mitugot Siya kanato nga mahagit, ug kon atong tubagon diha sa hugot nga pagtuo, ang Ginoo molig-on kanato ug motabang kanato nga molambo nga mahimong mas sama Kaniya. Ang pagkamalig-on sa emosyonal nga paagi nagtabang kanato nga mahimong mapailubon ug molambo gikan niini nga mga hagit.

“Walay kasakit nga kita nag-antos, walay pagsulay nga kita nagsinati ang nakawang. Kini nag-edukar kanato, ngadto sa pagpalambo sa ingon nga mga kinaiya sama sa pagpailob, hugot nga pagtuo, kalig-on, ug pagkamapainubsanon. Ang tanan nga kita nag-antos ug naglahutay, ilabi na kon kita nag-antos sa mapailubong paagi, naglig-on sa atong mga kinaiya, nagputli sa atong mga kasingkasing, nagpalambo sa atong mga kalag, ug naghimo kanato nga mas malumo ug manggihatagon … ug kini pinaagi sa kasob-anan ug pag-antos, paghago ug kagol-anan, nga kita makaangkon sa edukasyon nga maoy atong gianhi dinhi nga maangkon” (Elder Orson F. Whitney, ingon nga gikutlo diha sa Spencer W. Kimball, Faith Precedes the Miracle [1972], 98).

Tan-awa:

“He Is Building a Palace,” nga anaa sa https://churchofjesuschrist.org/study/video/self-reliance-videos [1:19].

Hisgoti:

Sa unsang paagi ang mahagitong mga kasinatian mitabang kaninyo nga molambo sa inyong kinabuhi?

3. Paggamit sa Kabubut-on sa Responsable nga Paglihok

Basaha:

Bisan og mahitabo nga maglibot kanato ang ngil-ad nga mga butang, sa gihapon kita makapili kon unsaon nato pagtubag. Ang pagdawat sa responsibilidad alang sa giunsa nato pagsumbalik, bisan kon nag-atubang og mga hagit, nagdala og kalinaw ug gahom.

“Isip mga anak sa atong Langitnong Amahan, gipanalanginan kita sa gasa sa moral nga kabubut-on, ang kapasidad sa paglihok og pagpili nga ikaw ra ang magbuot. Gitogahan uban sa kabubut-on sa pagpili, kamo ug ako mga tinugyanan, ug kita gayod ang molihok ug dili aghaton sa paglihok. Ang pagtuo nga adunay tawo o butang nga makapahimo kanato nga masilo, masuko, masakitan, o maglagot mopaubos sa atong moral nga kabubut-on ug mohimo kanato nga mga butang nga aghaton pa sa paglihok. Isip mga tinugyanan, hinoon, kamo ug ako adunay gahom sa paglihok ug sa pagpili unsaon nato pagtubag” (David A. Bednar, “Ug Walay Makapasilo Kanila,” Liahona, Nob. 2006, 90).

Ang mga hagit o wala damha nga mga kausaban ingon og dili patas. Mahimong tintalon kita sa pagtubag sa mga paagi nga dili mabungahon ug dili Kristohanon:

• Nagpasangil sa uban

• Naghimo og mga pasangil

• Misukol

• Nagbagulbol

• Mangita og sayop

• Nagduha-duha

• Miundang

• Nag-unya-unya

• Masuko

• Nagpatuyang og hunahuna nga makalolooy ang imong kaugalingon

• Nagtugot sa kahadlok nga mopatigbabaw

• Kaugalingong pagkamakatarunganon

Ang mahimong lig-on sa emosyonal nga paagi naglakip sa pag-ila niini nga mga tubag sa atong mga kaugalingon ug sa paggamit sa atong kabubut-on sa pagpili og mas maayong tubag.

KALIHOKAN (5 minutos)

Kauban sa usa ka kaabag, rebyoha ang matag sitwasyon sa ubos. Gamit ang lista sa miaging parapo, paghunahuna og pipila ka dili mabungahon nga mga tubag nga magamit ngadto sa matag sitwasyon. Hisgoti kon sa unsang paagi kita matintal sa pagtubag ug mga paagi nga kita makahimo sa “paglihok alang sa [atong mga kaugalingon] ug dili pagaaghaton” (2 Nephi 2:26).

Sitwasyon	Dili Mabungahon nga mga Tubag	Mga Paagi sa Responsable nga Paglihok (2 Nephi 2:26)
Sitwasyon Ehemplo Wala ka mapili alang sa usa ka trabaho nga imo gayod nga gikinahanglan.	Dili Mabungahon nga mga Tubag Masuko ug mopasangil sa uban. Magduha-duha sa imong mga abilidad. Mawad-an og paglaom nga ikaw makakita og usa ka maayong trabaho ug mohunong sa pagpaninguha.	Mga Paagi sa Responsable nga Paglihok (2 Nephi 2:26) Mangayo og feedback gikan sa uban. Mangita og bag-ong kahanas nga imong makat-onan o mga butang nga mohatag kanimo og mas daghan pang kasinatian. Mangita og laing trabaho.
Sitwasyon Nasaypan ka sa paghukom o napakaulawan sa usa ka tawo nga imong gimahal.	Dili Mabungahon nga mga Tubag	Mga Paagi sa Responsable nga Paglihok (2 Nephi 2:26)
Sitwasyon Nakahimo ka og sayop nga nasakitan ang laing tawo.	Dili Mabungahon nga mga Tubag	Mga Paagi sa Responsable nga Paglihok (2 Nephi 2:26)
Sitwasyon Usa ka tawo wala magmatinuoron kanimo ug nawad-an ka og kwarta.	Dili Mabungahon nga mga Tubag	Mga Paagi sa Responsable nga Paglihok (2 Nephi 2:26)
Sitwasyon Aduna kay sakit nga nagpugong sa imong abilidad sa pagbuhat og mga butang nga ikaw makahimo kaniadto.	Dili Mabungahon nga mga Tubag	Mga Paagi sa Responsable nga Paglihok (2 Nephi 2:26)

Hisgoti:

Kanus-a nimo nagamit ang imong pagkatinugyanan sa responsable nga paglihok? Sa unsang paagi kini nagtabang kanimo?

Tan-awa:

“Mountains to Climb,” anaa sa https://churchofjesuschrist.org/study/video/self-reliance-videos [5:05].

Hisgoti:

Bisan pa sa ilang mga hagit, unsa ang gibuhat sa mga indibidwal diha sa video sa pagtugot sa Ginoo nga motabang kanila?

Basaha:

“Ang pagbaton og hugot nga pagtuo diha ni Jesukristo mao ang pagsalig nga tungod sa Iyang maulaong sakripisyo Siya motarong sa tanang walay kaangayan, mopahiuli sa tanang mga butang nga nawala, ug moayo sa tanang mga butang nga naguba, lakip sa mga kasingkasing. Siya mohimo sa tanang mga butang nga matarong, dili mobiya og bisan unsa nga detalye nga dili matagad” (Lynn G. Robbins, “Be 100 Percent Responsible” [debosyonal sa Brigham Young University, Ago. 22, 2017], speeches. byu.edu).

Hisgoti:

Sa unsang paagi nga ang hugot nga pagtuo diha ni Jesukristo nagtabang kanato nga maayo ang paglahutay sa mga hagit?

4. Ang mga Panalangin sa Kausaban

Basaha:

“Sa usa ka higayon o sa lain tanan kita nakadungog sa pamilyar nga panultihon: ‘Walay laing mas makanunayon kay sa kausaban.’ Sa tibuok natong kinabuhi, kinahanglan kita nga makasugat ug mohimo og kausaban. Ang uban nga mga kausaban gihangop; ang uban wala. Adunay mga kausaban sa atong mga kinabuhi nga kalit, sama sa wala damha nga pagkawala sa usa ka minahal, ang wala paabota nga sakit, ang pagkawala sa usa ka katigayonan nga atong gibahandi. Apan kasagaran sa mga kausaban moabut sa ginagmay ug hinay-hinay” (Thomas S. Monson, “Pagpangita og Kalipay Panahon sa Panaw,” Liahona, Nob. 2008, 84).

Ang Ginoo naghatag kanato og kasigurohan nga kon kita magpaubos sa atong mga kaugalingon sa Iyang atubangan, Siya makatabang kanato sa pag-usab nga mas maayo. “Ug kon ang mga tawo moduol ngari kanako Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan, kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27).

KALIHOKAN (5 minutos)

Matag semana kita magkat-on og bag-ong mga kahanas aron sa pagtabang kanato sa “pagbuhat alang sa [atong mga kaugalingon] ug nga dili pagaaghaton” (2 Nephi 2:26). Hunahunaa ang usa ka butang nga inyong gusto nga palamboon. Kon kamo adunay kausaban sa hunahuna, gamita ang luna sa ubos sa pagrekord sa inyong mga ideya ug mga panghunahuna. Kon dili, samtang kamo magrebyo sa mga hisgotanan niini nga manwal, may purohan nga inyong madiskobrehan ang mga paagi nga inyong gustong usbon, ug kamo makabalik ug makarekord sa inyong mga hunahuna ug mga pagbati dinhi.

Usa ka butang nga akong gusto nga usbon:

Unsaon nga ang akong kinabuhi malahi kon himoon ko kini nga kausaban?

5. Pagpahayag og Inadlaw nga Pasalamat

Basaha:

Sa panahon niining mga miting sa grupo, usa sa inyong mga pasalig sa matag semana maglakip sa pagsulat og dili mominos sa usa ka butang nga kamo mapasalamaton sa matag adlaw. Ang pagpahayag og pasalamat wala magpasabot nga gilimod ninyo o gibale-wala ang mga pagbati sa kasakit o pagkanawad-an og paglaom. Kini nagpasabot nga inyong gidawat ang mga panalangin nga gihatag sa Langitnong Amahan kaninyo. Sama pananglitan, kini mahimo sa dihang ang usa ka tawo mabination kaninyo o sa dihang gidayeg ninyo ang usa ka butang nga inyong nakita, nasimhot, nadungog, nahikap, o natilawan.

Tan-awa:

“Grateful in Any Circumstance,” anaa sa https://churchofjesuschrist.org/study/video/self-reliance-videos [1:06].

Hisgoti:

Kanus-a ang pagkamapasalamaton mitabang kaninyo o sa uban sa pagsinati og kalipay?