Mga Kapanguhaan

Mga Ideya alang sa Paglingaw-lingaw

Musika	Adunay ebidensiya nga ang musika makatabang sa pagpakunhod sa kabalaka ug kaugtas. Kon kamo nagpamati nga naugtas o nawad-an og kadasig, kantahi ang inyong kaugalingon o pamati ngadto sa usa ka paborito nga pisa sa musika. “Ang mga himno [ug ubang makapabayaw nga musika] makapasaka sa atong mga espiritu, makahatag kanato og kaisog, ug makapalihok kanato ngadto sa matarong nga lihok. Kini makapuno sa atong mga kalag uban sa langitnong mga hunahuna ug makadala kanato og espiritu sa kalinaw” (“First Presidency Preface to Hymns,” Hymns [Mga Himno], 1985, x).
Mauswagong Ehersisyo sa Paglingaw-lingaw	Ang tinuoray nga paglingaw-lingaw nagtabang sa inyong lawas nga mamaayo gikan sa kaugtas. Pagpraktis niini nga ehersisyo sa gabii sa dili pa kamo matulog sa pagbansay sa inyong lawas nga malingaw. Pagbuhat og mas mubo nga bersyon niini nga ehersisyo sa panahon sa adlaw bisan unsang orasa nga nagpamati kamo og kaugtas. Higda o lingkod nga komportable ug piyonga ang inyong mga mata. Pangita alang sa bisan unsa nga tensiyon nga mahimong inyong gidala, nagtutok sa usa ka bahin sa inyong lawas matag higayon: ang inyong ulo ug nawong, mga mata, apapangig, liog, mga abaga ug buko-buko, mga bukton, mga kamot ug mga tudlo, dughan ug tiyan, mga bitiis, ug mga tiil ug mga tudlo sa tiil. Sa tinuyo nga paagi lingawa ang matag bahin sa inyong lawas. Batia ang tanang tensiyon nga nagkahaw-as, sama sa balas nga milusot sa imong mga tudlo. Kon kamo nagbati gihapon og tensiyon, hugti ang tensiyonado nga bahin sa inyong lawas sulod sa 10 ka segundo ug dayon buhii sulod sa 10 ka segundo. Hinay-hinay. Sa hunahuna hiling-hilinga ang inyong lawas alang sa nagpabiling tensiyon, dayon sa hingpit kalingaw. Tutoki ang usa ka panumdoman o gihanduraw nga sitwasyon nga nagdala og kalinaw ug hingpit nga kalipay. Sulayi sa paghanduraw ang talan-awon ingon ka klaro nga mahimo hangtod bation ninyo nga andam sa pagbuka sa inyong mga mata pag-usab.
Pagkamahunahunaon Naggamit sa Lima ka mga Pagbati	Ang pagtutok sa inyong mga pagbati makatabang kaninyo sa pagpraktis og pagkamahunahunaon. Sulod sa daghang minutos sa hilom obserbahi ang inyong mga palibot. Samtang inyong buhaton, paningkamoti ang pagbuhat sa mosunod: Tan-awa ang lima ka butang nga inyong makita. Tan-awa ang inyong palibot ug paghatag og pagtagad ngadto sa lima ka butang nga inyong makita. Pilia ang butang nga dili ninyo sagad mamatikdan, sama sa anino o sa usa ka gamay nga liki. Paniira ang upat ka mga butang nga inyong mahikap. Paghatag og pagtagad ngadto sa upat ka butang nga karon inyong mahikap, sama sa grano sa inyong mga sinina, ang pagbati sa hoyohoy diha sa inyong panit, o sa hamis nga ibabaw sa lamesa nga pahulayanan sa inyong mga kamot. Paminawa ang tulo ka mga butang nga kamo makadungog. Paminawa sa makadiyot, ug timan-i ang tulo ka mga butang nga inyong madungog sa likod. Kini mahimong ang huni sa usa ka langgam, ang andar sa reprigerator, o ang hinay nga mga tingog sa trapik gikan sa duol nga dalan. Timan-i ang duha ka mga butang nga kamo makasimhot. Ilha ang duha ka baho nga kasagaran inyong isalikway, humot o baho. Tingali inyong mamatikdan ang alimyon sa aguho nga kahoy kon kamo anaa sa gawas o sa mga sinina nga inyong gisul-ob. Hinumdomi ang usa ka butang nga kamo makatilaw. Tutoki ang usa ka butang nga kamo makatilaw karon dayon, niini nga higayon. Kamo makadimdim sa usa ka ilimnon, makausap og suwinggam, makakaon og bisan unsa, o paniira ang bag-ong lami sa inyong ba-ba.
Paghanduraw	Dinhi niining paagi sa paglingaw-lingaw, kamo moporma og mental nga mga imahe sa paghimo og biswal nga panaw ngadto sa usa ka malinawon, mahilom nga dapit o sitwasyon. Pagsugod pinaagi sa paghanduraw og usa ka dapit nga maghimo kaninyo nga malipayon. Kini mahimong usa ka tinuod nga dapit o usa ka gihanduraw nga dapit. Atol sa paghanduraw, sulayi ang paggamit og daghang mga pagbati kutob nga kamo makahimo, lakip ang pagsimhot, pagtan-aw, pagdungog ug paghikap. Kon ikaw naghanduraw nga naglingaw-lingaw sa lawod, mahimo kamong maghunahuna mahitungod sa baho sa tubig sa dagat, ang tingog sa naghaguros nga mga balod, ug ang kainit sa adlaw diha sa inyong lawas. Mahimo ninyong piyongon ang inyong mga mata, maglingkod sa hilom nga luna, ug magsiguro nga ang inyong sinina komportable.

Mubo nga sulat: Makagamit usab kamo sa pagkamahunahunaon nga kalihokan gikan nini nga kapitulo.

Mubo nga mga Sulat