Akong Pundasyon: Pagdawat og mga Ordinansa sa Templo—Labing Dugay nga Oras: 20 Minutos

Palandonga:

Unsa ang pipila ka butang nga importante kaayo nganha kanimo?

Tan-awa:

“Doing What Matters Most,” anaa sa https://churchofjesuschrist.org/study/video/self-reliance-videos. (Walay bidyo? Basaha ang transcript alang sa “Doing What Matters Most.”)

Doing What Matters Most

Kon kamo dili makatan-aw sa bidyo, basaha kini nga script.

Tigsaysay:

Usa ka eroplano nahagsa sa Florida usa ka ngiub nga gabii bulan sa Disyembre. Kapin sa 100 ka mga tawo ang namatay. Mga 20 ka milyas na lang ang gilay-on aron luwas silang makatugpa.

Presidente Dieter F. Uchtdorf:

Human sa aksidente, ang mga imbestigador misulay og suta sa hinungdan. Ang kambyo sa pagtugpa napaubos na og husto. Ang eroplano anaa sa perpektong mekanikal nga kondisyon. Ang tanan husto ang paglihok—gawas lamang sa usa: ang naponder nga bombilya. Kadtong gamay nga bombilya—nga 20 sentimos ang kantidad—ang sinugdanan sa nagsunod-sunod nga mga panghitabo nga sa katapusan misangpot ngadto sa makalilisang nga kamatayon sa kapin sa 100 ka mga tawo.

Siyemprea tinuod, ang naponder nga bombilya dili maoy hinungdan sa aksidente; kini nahitabo tungod kay ang mga crew mibaling sa ilang atensyon ngadto sa usa ka butang nga daw importante niadtong higayona samtang wala magtan-aw sa unsay labing importante.

Ang kalagmitan sa pagpunting ngadto sa dili importante baylo sa labing importante mahitabo dili lamang sa mga piloto apan ngadto sa tanan. Kitang tanan namiligro. …

Ang inyong mga hunahuna ug kasingkasing nakapunting ba diha niadtong mga butang nga lumalabay lamang o sa mga butang nga labing importante?

(Tan-awa sa “Kita Nagbuhat og Dako nga Buhat ug Dili Makaanha,” Liahona, Mayo 2009, 59, 60.)

Hisgoti:

Unsa ang dili makahuluganong mga butang ang mobalda kanato gikan sa pag-uswag? Unsaon sa mga ordinansa sa ebanghelyo pagtabang kanato?

Basaha:

Ang mosunod nga tudling sa kasulatan ug mga pamahayag sa mga lider sa Simbahan:

“Diha sa mga ordinansa niana, ang gahom sa pagka-diosnon gipakita” (Doktrina ug mga Pakigsaad 84:20).

“Angay natong tun-an ang ika-109 nga seksiyon sa Doktrina ug mga Pakigsaad ug sundon ang pahimangno ni Presidente [Howard W.] Hunter ‘sa paghimo sa templo sa Ginoo isip talagsaong simbolo sa [atong] pagkamiyembro’” (Quentin L. Cook, “Hunahunaa ang Inyong Kaugalingon nga Anaa sa Templo,” Liahona, Mayo 2016, 99).

“Ang tumong nga gipaningkamotan sa matag usa kanato mao ang matugahan og gahom diha sa balay sa Ginoo, ma-seal isip mga pamilya, matinud-anon sa mga pakigsaad nga gihimo diha sa templo nga maghimo kanato nga takus sa labing mahinungdanong gasa sa Dios—ang kinabuhing dayon. Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway. Ang inyong pagsimba sa templo ug ang inyong pagserbisyo didto alang sa inyong mga katigulangan mopanalangin kaninyo og dugang nga personal nga pagpadayag ug kalinaw ug molig-on sa inyong pasalig nga magpabilin diha sa dalan sa pakigsaad” (Russell M. Nelson, “Samtang Magdungan Kita nga Magpadayon sa Unahan,“ Liahona Abr. 2018, 7).

Hisgoti:

Unsaon sa pagsimba sa templo ug family history nga buhat pagdugang sa atong emosyonal nga kalig-on?

Kalihokan (5 minutos)

Lakang 1 Uban sa kaabag, basaha ang kinutlo ni Presidente Boyd K. Packer ug ang mga tudling sa kasulatan sa ubos gikan sa pagpahinungod nga pag-ampo sa Kirtland Temple. Badlisi ang mga panalangin nga gisaad alang niadtong kinsa mosimba sa templo.

“Ang Ginoo mopanalangin kanato samtang motambong kita sa sagradong ordinansa nga buhat sa mga templo. Ang mga panalangin didto dili limitado sa atong pagserbisyo sa templo. Kita mapanalanginan sa tanan natong mga kalihokan“ (Boyd K. Packer, The Holy Temple (1980), 182).

“Ug aron unta sila magtubo diha kanimo, ug modawat sa usa ka kahingpitan sa Espiritu Santo, ug matukod sumala sa imong mga balaod, ug makaandam sa pag-angkon sa matag gikinahanglan nga butang” (Doktrina ug mga Pakigsaad 109:15).

“Ug sa diha nga ang imong mga katawhan makalapas, bisan kinsa kanila, sila unta diha-diha maghinulsol ug mobalik nganha kanimo, ug makaangkon og kalooy diha sa imong panan-aw, ug ipahiuli ngadto sa mga panalangin nga ikaw mi-orden nga ibu-bo niadto kinsa motahod kanimo diha sa imong balay” (Doktrina ug mga Pakigsaad 109:21).

“Ug kami mangayo kanimo, Balaan nga Amahan, nga ang imong mga sulugoon makasulod unta niini nga balay sinangkapan uban sa imong gahom, ug aron ang imong ngalan unta maanaa diha kanila, ug ang imong himaya maglibot kanila, ug ang imong mga anghel mobantay kanila” (Doktrina ug mga Pakigsaad 109:22).

“Kami mangayo kanimo, Balaan nga Amahan, … nga walay hinagiban nga mahimo batok kanila nga mouswag” (Doktrina ug mga Pakigsaad 109:24–25).

Lakang 2: Sa inyong kaugalingon, pamalandong, “Unsay kinahanglan nakong usbon sa akong kinabuhi aron mas kanunay nga makaapil sa mga ordinansa sa templo?”

Pasalig:

Ako motakda og petsa sa pagtambong sa templo kon ako adunay rekomen sa templo. Kon ako walay rekomen sa templo, ako motakda og miting sa akong bishop o branch president sa pagbag-o sa akong rekomen o makighisgot kon unsaon nga ako maandam sa pagdawat sa akong mga ordinansa sa templo.