Akong Pundasyon: Pakigsulti—Labing Dako nga Oras: 20 Minutos

Palandonga:

Kanus-a ang Langitnong Amahan mitubag sa akong mga pag-ampo?

Tan-awa:

“Creating Lift,” anaa sa https://churchofjesuschrist.org/study/video/self-reliance-videos. (Walay bidyo? Basaha ang transcript alang sa ”Creating Lift.”)

Creating Lift

Kon kamo dili makatan-aw sa bidyo, basaha kini nga script.

Presidente Dieter F. Uchtdorf:

Aron ang eroplano malayo gikan sa yuta, kinahanglan nga imo kining pasakaon. Sa aerodynamics, ang pagsaka mahitabo kon ang hangin moagi sa pako sa eroplano sa paagi nga ang gikusgon niini ubos sa pako mas kusog kay sa gikusgon ibabaw sa pako. Kon ang pagpasaka sa ibabaw mas kusog kaysa gibug-aton nga mobitad paubos [gravity], ang eroplano mosaka gikan sa yuta ug molupad.

Sa sama nga paagi, kita makahimo sa pagbayaw sa atong espirituhanong kinabuhi. Kon ang pwersa nga motulod kanato padulong sa langit mas kusog kaysa mga pagtintal ug kahasol nga mobira kanato paubos, kita makasaka ug makaadto sa gingharian sa Espiritu.

Bisan og daghang mga baroganan sa ebanghelyo ang makatabang kanato aron makab-ot ang pagkabayaw, ako gusto nga mopokus og usa ka pino nga butang.

Pag-ampo!

Ang pag-ampo mao ang usa sa mga baroganan sa ebanghelyo nga makatabang sa pagpabayaw. Ang pag-ampo adunay gahum sa pagbayaw kanato gikan sa kalibutanong mga tinguha. Ang pag-ampo makapasaka nato ngadto sa mga panganod sa kaalautan o kangitngit ngadto sa kahayag ug klaro nga kapunawpunawan.

Usa sa dakong mga panalangin ug mga pribilehiyo ug mga oportunidad nga atong naangkon isip mga anak sa atong Langitnong Amahan mao nga kita mahimong makig-istorya Kaniya pinaagi sa pag-ampo. Kita mahimong makig-istorya Kaniya sa atong mga kasinatian sa kinabuhi, mga pagsulay, ug mga panalangin. Kita mahimong maminaw ug makadawat og celestial nga giya gikan sa Balaang Espiritu sa bisan unsang panahon ug sa bisan unsang dapit.

(Tan-awa sa “Pag-ampo ug ang Asol nga Kapunawponawan,” Liahona, Hunyo 2009, 3–4.)

Hisgoti:

Ngano nga ang pagpaminaw importante nga bahin sa atong pag-ampo?

Basaha:

Ang mosunod nga tudling sa kasulatan ug pamahayag ni Presidente Nelson:

“Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing” (Doktrina ug mga Pakigsaad 8:2).

“Ang inyong kalag mapanalanginan samtang magkat-on kamo sa pagpaminaw, dayon paminaw aron makakat-on gikan sa mga anak, mga ginikanan, mga kauban, mga silingan, ug mga lider sa Simbahan, kining tanan makapalambo sa kapasidad sa pagpaminaw sa tambag gikan sa kahitas-an” (Russell M. Nelson, “Listen to Learn,” Ensign, Mayo 1991, 24).

Hisgoti:

Unsaon nato pagkat-on sa pag-ila sa mga tubag sa atong mga pag-ampo?

Kalihokan

Lakang 1: Isip usa ka grupo, basaha ang mga lakang sa ubos ug sa daklit hisgoti kini.

Lakang 2: Hangyoa ang usa o duha ka sakop sa grupo sa pagsulti sa uban mahitungod sa usa ka hagit o pangutana nga sila aduna. Ang tanan kinahanglan nga mosunod sa mga lakang sa ubos ug maninguha sa pagpaminaw.

Lakang 3: Kon mahuman, pangutan-a ang mga sakop sa grupo kinsa misulti kon unsay ilang gibati sa dihang ang grupo naningkamot gayod sa pagpaminaw.

1

Hinuktoki og maayo

• Pagpunting diha sa mga pulong ug sa linihokan sa lawas sa mamumulong.

• Ayaw pagbalda.

• Ayaw pagbasa o pagpadala og mga mensahe sa inyong cell phone.

2

Dayega

• Tan-aw sa namulong.

• Gamit og mugbo nga mga pulong sama sa “oo” o “okey.”

• Pasalamati ang mamumulong.

3

Rebyoha

• Sulti, “Sa ato pa, nag-ingon ka nga …”

• Dayon sublia kon unsay inyong nadungog.

4

Pangutana

• Pangutana, “Nasabtan ba nako?”

• Hulata ug paminaw ngadto sa tubag.

Basaha:

Ang mosunod nga mga pamahayag sa mga lider sa Simbahan:

“Ang atong Langitnong Amahan naminaw sa mga pag-ampo sa Iyang mga anak sa tibuok yuta nga nangamuyo sa mga pagkaon aron kaunon, sa mga sinina aron itabon sa ilang mga lawas, ug sa dignidad nga magagikan sa pagkahimong makasangkap sa ilang kaugalingon” (Henry B. Eyring, “Mga Oportunidad sa Paghimo og Maayo,” Liahona, Mayo 2011, 22).

“Kinahanglan kita nga mangayo og panabang sa atong Langitnong Amahan ug magtinguha og kusog pinaagi sa Pag-ula sa Iyang Anak, nga si Jesukristo. Diha sa temporal ug espirituhanong mga butang, [kini] makahimo kanato nga mga madaginuton nga mga tigsangkap sa atong mga kaugalingon ug sa uban” (Robert D. Hales, “Pagkahimong Madaginuton nga mga Tigsangkap sa Temporal ug Espirituhanong Paagi,” Liahona, Mayo 2009, 8).

Pasalig:

Mag-ampo ako sa tinagsa nga paagi ug uban sa akong pamilya kada buntag ug gabii. Ako mogahin og panahon human sa matag pag-ampo nga matinahurong maminaw alang sa giya.