Akong Pundasyon: Mahimong Usa, Magserbisyong Mag-uban—Labing Dugay nga Oras: 20 Minutos

Palandonga:

Sa unsang paagi ang pagkalimot sa akong kaugalingon diha sa pagserbisyo sa uban sa tinuod nagluwas kanako?

Tan-awa:

“In the Lord’s Way,” anaa sa https://churchofjesuschrist.org/study/video/self-reliance-videos. (Walay bidyo? Basaha ang transcript alang sa “In the Lord’s Way.”)

In the Lord’s Way

Kon kamo dili makatan-aw sa bidyo, basaha kini nga script.

Presidente Henry B. Eyring:

Ang mga baroganan sa pundasyon sa programa sa welfare sa Simbahan dili lamang alang sa usa ka panahon o sa usa ka dapit. Alang kini sa tanang panahon ug sa tanang dapit. …

… Ang paagi sa pagbuhat niini klaro. Kadtong nakatigom og daghan kinahanglang magpaubos sa ilang kaugalingon aron sa pagtabang niadtong nanginahanglan. Kadtong naa sa kaabunda kinahanglang boluntaryong mosakripisyo og pipila sa ilang kahamugaway, panahon, mga kahanas, ug mga kapangohaan aron mahupay ang pag-antos niadtong nanginahanglan. Ug ang tabang ihatag sa usa ka paagi nga aron molambo ang gahom sa mga nakadawat sa pag-atiman sa ilang kaugalingon ug dayon sa pag-atiman sa uban. Buhaton kini, sa pamaagi sa Ginoo, talagsaong butang ang mahimo nga mahitabo. Ang tighatag ug ang tigdawat mapanalanginan.

(Gipahiangay gikan sa pakigpulong nga gihatag ni Presidente Eyring diha sa pagpahinungod sa Sugarhouse Utah Welfare Services Center, Hunyo 2011, ChurchofJesusChrist.org)

Presidente Dieter F. Uchtdorf:

Mga kaigsoonan, ang matag usa kanato adunay pakigsaad nga responsibilidad sa pag-ila sa panginahanglan sa uban ug pagserbisyo sama sa gihimo sa Manluluwas—sa pagtabang, pagpanalangin, ug pagbayaw niadtong naglibot kanato.

Kasagaran, ang tubag sa atong pag-ampo dili moabot samtang kita nagluhod lang apan samtang kita naglihok nagserbisyo sa Ginoo ug nagserbisyo niadtong anaa sa atong palibot. Ang dili hinakog nga mga buhat sa serbisyo ug pagpahinungod mohapsay sa atong mga espiritu, motangtang sa mga himbis gikan sa atong espirituhanong mga mata, ug moabli sa mga bintana sa langit. Diha sa pagkahimong tubag sa pag-ampo sa uban, kanunay natong makaplagan ang tubag sa atong kaugalingon.

(“Naghulat diha sa Dalan sa Damasco,” Liahona, Mayo 2011, 75–76)

Hisgoti:

Sa unsang paagi nga ang pagserbisyo sa uban nag-abli sa mga bintana sa langit sa inyong kinabuhi?

Basaha:

Ang uban mobati nga sila angay nga makabaton sa unsay anaa sa uban, nga mahimong hinungdan sa kayugot. Ang uban mobati nga may katungod sila sa mga butang nga wala nila maangkon. Kining duha ka lit-ag nagbuta sa mga tawo nga dili na nila makita ang mahinungdanong kamatuoran: nga ang tanang butang iya sa Dios. Ang kayugot ug ang pagbati nga may katungod mabuntog pinaagi sa pagtutok diha sa panginahanglan sa uban.

Basaha:

Ang mosunod nga may kalabot nga mga tudling sa kasulatan ug pamahayag ni Presidente Hinckley:

“Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

“Ug karon, alang sa katuyoan … sa pagbaton sa usa ka kapasayloan sa inyong mga sala sa matag adlaw, … Ako manghinaot nga kamo kinahanglan mohatag sa inyong kabtangan ngadto sa mga kabos, matag tawo sumala sa unsa ang anaa kaniya, ingon sa pagpakaon sa gigutom, pagsinina sa hubo, pagduaw sa mga masakiton ug pag-alagad sa ilang kahupayan, sa espirituhanon ug lawasnon, sumala sa ilang mga panginahanglan” (Mosiah 4:26).

“Kon magkahiusa kamo, walay kinutoban ang inyong gahom. Kamo makatuman bisan unsa ang inyong gipangandoy nga tumanon” (Gordon B. Hinckley, “Your Greatest Challenge, Mother,” Liahona, Ene. 2001, 97).

Kalihokan

Lakang 1: Isip usa ka grupo, paghunahuna og tawo nga nanginahanglan og tabang.

Lakang 2: Hisgoti ang mga talento, mga kontak, ug mga kapanguhaan nga inyong matanyag.

Lakang 3: Paghimo og plano sa pagserbisyo niana nga tawo. Sama pananglitan, ikaw makahimo nga:

• Mopahigayon og service project diha sa inyong komunidad.

• Motabang niana nga tawo sa pag-andam og family history gamit ang booklet nga My Family: Stories That Bring Us Together. Dayon molakaw ngadto sa templo ug mopahigayon og sagrado nga mga ordinansa alang sa mga sakop sa pamilya nga namatay na.

• Motabang sa usa ka tawo sa iyang dalan padulong sa pagbarog pinaagi sa kinaugalingong paningkamot.

Basaha:

Ang mosunod nga mga pamahayag sa mga lider sa Simbahan:

“Ang tuyo sa temporal ug espirituhanon nga pagbarog pinaagi sa kinaugalingong paningkamot mao ang paglig-on sa atong mga kaugalingon aron makatabang kita sa uban nga nanginahanglan” (Robert D. Hales,“Pag-ila sa Atong Kaugalingon: Ang Sakramento, ang Templo, ug ang Sakripisyo sa Pagserbisyo,” Liahona, Mayo 2012, 36).

“Kon kita magtinabangay, … makahimo kita sa tanan. Kon kita magbuhat sa mao, kita magwagtang sa kahuyang sa usa ka tawo nga nagbarog nga nag-inusara ug nagpuli sa kalig-on sa daghang nagserbisyo kaniya” (Thomas S. Monson, “Church Leaders Speak Out on Gospel Values,” Ensign Mayo 1999, 118).

Pasalig:

Ako mobuhat sa plano nga akong gihimo sa pagserbisyo og usa ka tawo.