“3: Akong Pundasyon: Ang Atong mga Lawas usa ka Gasa gikan sa Dios,” Pagkaplag og Kalig-on diha sa Ginoo: Emosyonal nga Kalig-on (2020)
“3: Akong Pundasyon: Ang Atong mga Lawas usa ka Gasa gikan sa Dios,” Pagkaplag og Kalig-on diha sa Ginoo: Emosyonal nga Kalig-on
Akong Pundasyon: Ang Atong mga Lawas usa ka Gasa gikan sa Dios––Labing Dugay nga Oras: 20 Minutos
Palandonga:
Unsa nga mga panalangin ang inyong nadawat gikan sa pagbaton og usa ka lawas?
Tan-awa:
“God’s Greatest Creation (Labing Importanting Nilalang sa Dios),” anaa sa https://churchofjesuschrist.org/study/video/self-reliance-videos [2:51]. (Walay bidyo? Basaha ang transcript alang sa “God’s Greatest Creation.”)
God’s Greatest Creation
Kon kamo dili makatan-aw sa bidyo, basaha kini nga script.
Presidente Russell M. Nelson:
Bisan kinsa nga nagtuon sa mga lihok sa lawas sa tawo sa siguro “nakakita sa Dios nga naglihok sa iyang pagkahalangdon ug gahom” [Doktrina ug mga Pakigsaad 88:47].
Kada mata adunay mga lente nga makatutok. Ang mga kaugatan ug mga kaunoran nagkontrol sa duha ka mata nga makahimo og tulo ka dimensyon nga imahe. Ang matag dalunggan gikonektar ngadto sa gihiusa pagtingob nga ekipo nga gidesinyo sa pag-usab sa sound waves [pitipiti sa tingog] ngadto sa madungog nga mga tono.
Ang inyong kasingkasing usa ka talagsaon nga bomba. Kini adunay upat ka sensitibo nga mga balbola nga moabli ug mosira labaw kay sa 100,000 ka beses sa usa ka adlaw. Hunahunaa ang sistema sa lawas sa pagpanalipod. Kini makasabot og sakit. Kini makapasanay og mga pangontra nga mga cell [selyula] nga mopatay sa kagaw nga moatake sa lawas. Ang lawas mobag-o sa walay gamit nga mga cell ug mopaangay sa mga gidaghanon sa kaugalingong importante nga mga sangkap nini.
Ang daghang kahibulongang mga hiyas sa inyong lawas nagmatuod sa inyong “diosnong kinaiya” [2 Pedro 1:4]. Gihulagway kini ni Apostol Pablo isip usa ka “templo sa Dios” [1 Mga Taga-Corinto 3:16]. Sa unsang paagi nga naingon niini? Tungod kay ang inyong lawas mao ang templo sa inyong espiritu. Ug giunsa ninyo paggamit ang inyong lawas nag-apekto sa inyong espiritu. Ang Dios mao ang Amahan sa atong mga espiritu. Kabahin kita sa Iyang balaan nga katuyoan. Ug sa dihang gilalang Niya kita sa pisikal nga paagi, gilalang kita sama sa panagway sa Dios.
Ang kalamboan sa espiritu adunay mahangturong sangpotanan. Kon kita sa tinuoray nahibalo sa atong balaan nga kinaiyahan, niana kita mopugong sa atong mga gana. Kita motutok sa atong mga mata diha sa mga talan-awon, sa atong mga dalunggan diha sa mga tingog, ug sa atong mga alimpatakan diha sa mga hunahuna nga maghatag og kaayohan sa atong pisikal nga pagkalalang isip usa ka templo sa atong Amahan sa Langit. Alang niining pisikal nga mga gasa, salamat sa Dios!
Hisgoti:
Sa unsang paagi nga ang pagbaton og pisikal nga lawas nag-andam kanato nga mahimong sama sa atong Langitnong Amahan?
Basaha:
Ang mosunod nga mga pamahayag sa mga lider sa Simbahan:
“Kay ang pisikal nga lawas mahinungdanon sa plano sa Amahan sa kalipay ug sa atong espiritwal nga kalamboan, si Lucifer nagtinguha sa pagpugong sa atong pag-uswag pinaagi sa pagtintal nato sa sayop nga paggamit sa atong lawas” (David A. Bednar, “Magmabinantayon ngadto sa Pag-ampo Kanunay,” Liahona, Nob. 2019, 34).
“Ang inyong kataposang kahilwasan niini nga kinabuhi makita diha sa dili gayod paghimo sa unang makahaylo nga lakang paingon sa dapit diin ikaw dili angayang moadto ug sa paghimo sa dili nimo angayang buhaton. … [Isip mga tawo kitang tanan adunay pisikal nga mga kahinam nga gikinahanglan alang sa atong pagpakabuhi.] Kini nga mga kahinam kinahanglan kaayo alang sa pagpalambo sa kinabuhi. Busa, unsa man ang gibuhat sa kaaway? … Giatake kita niya pinaagi sa atong mga kahinam. Gitintal kita niya sa pagkaon sa mga butang nga dili nato angayang kaonon, sa pag-inom sa mga butang nga dili nato angayang imnon, ug sa paghigugma sa dili nato angay nga higugmaon!” (Russell M. Nelson, diha sa “Advice from the Prophet of the Church to Millennials Living in a Hectic World,” Peb. 18, 2018, newsroom.ChurchofJesusChrist.org).
Hisgoti:
Sa unsang paagi ang dili maayong pagtratar sa atong lawas makaapekto sa atong emosyonal nga kalig-on?
Basaha:
Ang mga tudling sa kasulatan:
“Ang kalag ipahiuli ngadto sa lawas, ug ang lawas ngadto sa kalag; oo, ug matag bahin sa lawas ug lutahan ipahiuli ngadto sa iyang lawas; oo, gani bisan buhok sa ulo dili mawala; apan ang tanan nga butang ipahiuli ngadto sa ilang tukma ug hingpit nga bayanan” (Alma 40:23).
“Ug si [Jesukristo] magpadayon, mag-antos sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan. … Ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayod sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:11–12).
Hisgoti:
Unsaon ni Jesukristo paglig-on kanato aron makalahutay og maayo o gani sa pagbuntog sa bisan unsang pisikal nga limitasyon nga kita mahimong aduna?
Pasalig:
Ako mopili og usa ka paagi nga mas maayo nakong maatiman ang akong lawas sama sa usa ka templo.