Vulica—Levu ni Gauna: 60 na miniti

1. Na Cava na Bulabula ni Lomada?

Wilika:

Me da yaco me vaka na iVakabula, ena gadrevi vei keda kece me da sotava na veibolebole kei na dredre eso ni bula oqo. Na sotavi ni bolebole ni bula ena gadrevi kina na vakabauti Jisu Karisito kei na bulabula ni lomada. Na bulabula ni lomada sai koya:

Na kaukauwa me sotavi kina na bolebole ni lomada ena yaloqaqa kei na vakabauta ka yavutaki vei Jisu Karisito.
Vukei iko kei ira na tani ena kena vinaka duadua o rawata.
Dolele yani ena gauna e gadrevi kina na veivuke eso.

Na vuli oqo e vakarautaki me vaqaqacotaki iko vakayalo ka vakavulica vei iko eso na kila matau me baleta na sotavi ni bolebole kei na vakanuinuikara ni bula. O na vuli talega mai na veika sotavi kei na veivuke mai vei ira na lewe ni ilawalawa tale eso.

Vakananuma vakatitobu:

Tarogi iko mada, na cava o vinakata kina me bulabula vakalevu cake na lomamu? Vola e ra na nomu nanuma.

2. Ciqomi ni Bolebole me Tiki ni iTuvatuva ni Kalou me Baleti Keda

Wilika:

Ni sa Tama ni yaloda, sa taucoko sara o Koya, sa Nona na kaukauwa kecega, ka kila na ka kecega. E lomani keda yadua, ka sa Nona cakacaka kei na lagilagi na noda torocake. Sa Nona ituvatuva vei keda meda tubu ka veisau me yacova ni da sa vakataki Koya. E vakatara vei keda o Koya meda bolei, kevaka eda vakaio ena vakabauta, ena vaqaqacotaki keda na Turaga ka vukei keda meda tubu cake meda vakataki koya vakalevu cake. Na bulabula ni lomada e vukei keda meda dauvosota ka tubu cake ena vuku ni veibolebole oqo.

“E sega ni dua na mosi e yaco vei keda, se veivakatovolei eda sotava e maumau wale. E veivuke ki na noda vuli, kei na vakatorocaketaki ni itovo me vaka na vosota, vakabauta, yaloqaqa, kei na yalomalumalumu. Na veika dredre kece eda sotava ka lako curuma, vakabibi ni da lako curuma ena yalovosota, e tarai cake kina na noda itovo, vakasavasavataka na lomada, vakalevutaka na yaloda, ka vakavuna meda yalo malumalumu ka dauloloma … ka sa ikoya na rarawa kei na veika dredre, oca kei na veikararawa, eda vulica kina ni da lako mai ki ke me da mai rawa ka” (Elder Orson F. Whitney, me vaka e cavuvosataki ena Spencer W. Kimball, Faith Precedes the Miracle [1972], 98).

Veitalanoataka:

Sa vukei iko vakacava na sotavi ni bolebole eso mo tubu kina ena nomu bula?

3. Vakayagataki ni Galala ni Digidigi mo Cakacaka kina Vakavuku

Wilika:

Ena gauna mada ga e yaco wavoliti keda kina na veika ca, e sa tikoga vei keda na lewa meda digitaka na ka meda cakava. Noda itavi ena ivakarau ni noda sotava, ena gauna mada ga eda sotava kina na bolebole, e kauta mai na vakacegu kei na kaukauwa.

Me vaka ni da luvena tagane kei na yalewa na Tamada Vakalomalagi, eda sa mai vakalougatataki ena isolisoli ni digidigi, na kaukauwa me cakacaka ka vakatulewa vakataki koya. Ni da sa vakaedaumeni ena galala ni digidigi, o iko kei au e daru itini, ka sa dodonu me daru cakacaka ka sega ni daru cakacakataki. “Me vakabauti ni dua se dua na ka e rawa ni cakava me da vakatarabetaki, cudru, rarawa, se yalo vakatani ena vakalailaitaka na noda galala ni digidigi ka vukici keda meda dua na ka e cakacakataki. Ia, o iko kei au e tu vei kedaru na kaukauwa me daru cakava ka digitaka na ka me daru cakava” (David A. Bednar, “And Nothing Shall Offend Them,” Liahona, Nov. 2006,”90).

Na bolebole se veisau sega ni namaki ena rairai vaka me sega ni dodonu. Eda na temaki beka meda vakaio ena sala e sega ni veiganiti ka sega ni Vakarisito:

Beitaki ira na tani
Vakaiulubale
Veivorati
Kudruvaka
Vaqara cala
Vakatitiqa
Soro
Lokuyara
Cudru
Vakalomalomani koya
Vakatara na rere me veiliutaki
Vakadonui koya vakai-koya

Na kena rawa ni bulabula na lomada e oka kina na noda kila na veika oqo vei keda ka vakayagataka na noda galala me da digitaka e dua na kena ivakarau veiganiti.

ITAVIQARAVI (5 minutes)

Railesuva na ituvaki yadua e ra, kei na dua na itokani. Ni o vakayagataka na lisi ena parakaravu e cake, vakasamataka eso na isau tawayaga ka na rawa ni vakayagataki ena ituvaki yadua. Me veivosakitaki na sala eda sa temaki kina meda vakaio kei na sala eda rawa ni “lewa vakai [keda] na ka meda kitaka ka sega na ka me lewai keda” (2 Nifai 2:26).

iTuvaki	iSaunitaro Tawayaga	Sala mo Lewa Vakai Iko na ka mo Kitaka (2 Nifai 2:26)
iTuvaki iVakaraitaki O sega ni digitaki ki na dua na cakacaka o a vinakata dina.	iSaunitaro Tawayaga O Cudru ka beitaki ira na tani. Vakatitiqataka na nomu rawa ka. Yali na inuinui ni o na kunea e dua na cakacaka vinaka ka sega ni via tovolea tale.	Sala mo Lewa Vakai Iko na ka mo Kitaka (2 Nifai 2:26) Kerea na nodra nanuma eso tale. Vakaraica na kila matau vovou o rawa ni vulica se na veika ena solia vei iko e levu cake na kila-ka. Volakerekere kina so tale na cakacaka.
iTuvaki O a lewai vakatani se vakamaduataki mai vua e dua o kauwaitaka.	iSaunitaro Tawayaga	Sala mo Lewa Vakai Iko na ka mo Kitaka (2 Nifai 2:26)
iTuvaki O vakayacora e dua na cala ka a vakararawataka e dua tale na tamata.	iSaunitaro Tawayaga	Sala mo Lewa Vakai Iko na ka mo Kitaka (2 Nifai 2:26)
iTuvaki E dua a lawakitaki iko ka o vakayalia kina na ilavo.	iSaunitaro Tawayaga	Sala mo Lewa Vakai Iko na ka mo Kitaka (2 Nifai 2:26)
iTuvaki E tiko vei iko e dua na mate ka sega ni rawa mo cakava kina na veika o a rawa ni dau cakava ena veigauna sa oti.	iSaunitaro Tawayaga	Sala mo Lewa Vakai Iko na ka mo Kitaka (2 Nifai 2:26)

Veitalanoataka:

Na gauna cava o sa bau vakayagataka kina na nomu galala ni digidigi mo cakacaka kina vakavuku? E a vukei iko vakacava?

Veitalanoataka:

Se cava sara na nodra bolebole, na cava era a cakava na tamata yadua ena vidio me vukei ira kina na Turaga?

Wilika:

“Na vakabauti Jisu Karisito sai koya na kena nuitaki ni ena vuku ni Nona isoro ni veivakaduavatataki ena vakadodonutaka o Koya na veika tawadodonu kece, vakalesuya mai na ka kece sa yali, ka vakavinakataka na ka kece sa kavoro, oka kina na yalo. Ena vakadodonutaka o Koya na ka kecega, ka na sega ni vakawaletaka e dua na ka lailai sara” (Lynn G. Robbins, “Be 100 Percent Responsible” [lotu ena Brigham Young University, Okos. 22, 2017], speeches.byu.edu).

Veitalanoataka:

Ena vukei keda vakacava na vakabauti Jisu Karisito me da vosota vakavinaka na veibolebole eso.?

4. Na Veivakalougatataki ni Veisau

Wilika:

“Eda a dau rogoca beka na ivosavosa talei: “Na veisau ena dau yaco tu ga.” Ena noda bula taucoko, sa dodonu me da na sotava na veisau. Eso na veisau e kidavaki; eso e sega. E dau tu na veisau e yaco vakasauri ki na noda bula, me vakataka ni mate e dua noda daulomani, e dua na tauvimate sega ni namaki, na kena yali na iyau eda vakamareqeta. Ia e vuqa ga na veisau e vakaituvatuva ka vakamalua” (Thomas S. Monson, “Kune Marau ena iLakolako Oqo,” Liaona, Nove. 2008, 84).

Sa vakadeitaka vei keda na Turaga ni kevaka eda vakamalumalumutaki keda Vua, ena rawa ni vukei keda o Koya meda veisau meda vinaka cake. “Ka kevaka era na lako mai vei au ko ira na tamata au na vakaraitaka vei ira na nodra malumalumu. Au sa solia vei ira na tamata na malumalumu mera vakayalomalumalumutaki ira kina; ia sa rauti ira vinaka na tamata kece ga era sa vakamalumalumutaki ira vei au na noqu loloma soli wale; ni kevaka era sa vakayalomalumalumutaki ira vei au, ka vakabauti au, au na qai vakayacora me vu ni nodra kaukauwa na veika malumalumu” (Ica 12:27).

5. Vakaraitaki ni Vakavinavinaka e Veisiga

Wilika:

Ena gauna ni bose vaka ilawalawa oqo, e dua na nomu yalayala e veimacawa ena oka kina na vola e dua mada ga na ka o vakavinavinakataka e veisiga yadua. Na vakaraitaki ni vakavinavinaka e sega ni kena ibalebale ni o cakitaka se vakawalena na yalo ni mosi se yalolailai. E kena ibalebale ni o vakadinadinataka na veivakalougatataki sa solia vei iko na Tamada Vakalomalagi. Me ivakaraitaki, e rawa ni gauna a yalovinaka kina vei iko e dua se nomu taleitaka e dua na ka o a raica, boica, rogoca, tara, se tovolea.

Veitalanoataka:

Na gauna cava sa vukei iko kina se so tale na vakavinavinaka me sotavi na marau?