Noqu Yavu: Noda iVakatakilakila Vakalou kei na iNaki—Levu ni gauna: 20 na Miniti

Vakananuma:

Na cava na yaga ni yaloqu vua na Kalou?

Wilika:

“Nanuma tiko ni sa ka talei ena mata ni Kalou na yalo ni tamata; Ia, raica, na Turaga na nomudou Dauveivueti sa mai mate vakayago; o koya sa mai colata kina na nodra rarawa na tamata kecega, me rawa vei ira na tamata kecega na veivutuni ka lako mai vua” (Vunau kei na Veiyalayalati 18:10–11).

Sarava:

“Our True Identity,” tiko ena https://churchofjesuschrist.org/study/video/self-reliance-videos [3:39]. (Sega na vidio? Wilika na vosavolai ni “Our True Identity”)

Na Keda iVakatakilakila Dina

Kevaka o sega ni sarava rawa na vidio, wilika na vosavolai oqo.

droini ni ga

President Dieter F. Uchtdorf:

E vuqa na veilecayaki eda sotava ena bula oqo e vu mai na noda sega ga ni kilai keda.

E dua na daunitalanoa taleitaki vakalevu ena veigauna sai koya na dauvola ivola ni Denmark o Hans Christian Andersen. Ena dua na nona italanoa, “The Ugly Duckling,” qai kila e dua na tina ni ga ni dua vei ira na luvena se qai diridiri walega sa rui levu sivia qai carukaica. O ira na vo ni luve ni ga era a sega ni vakalaiva me tu ga na gone carukaica. Era dau vakararawataki koya.

“Qai nanuma na luve ni ga carukaica ni na vinaka vei ira kece kevaka me sa biuta na nona matavuvale, ka sa mani dro yani. Ena dua na siga qai raica ni ra vuka voli e macawa e dua na qele ni manumanu rairai vakaturaga. Qai vuka muri ira yani ki na dua na drano totoka. A rai yani ki loma ni wai na luve ni ga carukaica ka raica na iyaloyalo ni dua na ga totoka. Qai kila na luve ni ga ni kena iyaloyalo oya! Sa qai kila kina se o cei dina o koya.

Vakasamataka mada na vanua o lako mai kina. Oi kemuni na luvena tagane kei na yalewa na ka bula cecere, ka lagilagi duadua ena vuravura kecega. E lomani kemuni o Koya ena loloma tawayalani. E vinakata o Koya na ka vinaka duadua me baleti kemuni. Na kila ka oqo e veisautaka na ka kecega. E veisautaka na nomu gauna oqo. E rawa ni veisautaka talega na nomu gauna se bera mai. Ka rawa ni veisautaka na vuravura.

Kevaka walega eda kila se o cei o keda kei na veika e vakarautaki tu me noda, ena vakasinaiti na yaloda ena mataqali vakavinavinaka kei na marau ka na vakararamataka na rarawa butobuto duadua ena rarama kei na loloma ni Kalou.

E dina sara era na tu na domo ka na dau tukuna tikoga vei iko ni o yalowai mo vakabauta ni o ga totoka, ka cikevaka toka ni o iko na luve ni ga carukaica ka sega ni rawa ni o namaka mo yaco mo dua tale na ka. Ia o kila vinaka cake o iko. Ko ni sega ni tamata wale. Ko ni sa lagilagi ka tawamudu.

Au kerei kemuni—ni rai ga ki loma ni wai ka raica na kemuni iyaloyalo dina! Sa noqu masu kei na veivakalougatataki ni gauna o raica kina na kemu iyaloyalo, o na raibaleta rawa na malumalumu kei na nomu vakatitiqa eso ka kila se o cei dina o iko: na luvena tagane kei na yalewa lagilagi na Kalou sa Kaukauwa Sara. Ena yaca tabu i Jisu Karisito, emeni.

Wilika:

Na veimalanivosa oqo mai vei ira na iliuliu ni Lotu:

“Ko sa dua na luve ni Kalou. Sai Koya na tama ni yalomu. Ko sa kawa cecere vakayalo, na isolisoli ni Tui kei Lomalagi. Nanuma dei na dina oya ena nomu vakanananu ka taura matua” (Boyd K. Packer, “To Young Women and Men,” Ensign, Me 1989, 54).

“Mo qarauna vakavinaka na ivakarau ni o vakatakilakilataki iko kina. Mo kakua ni vakatakilakilataki iko se mo kilai ena dua na yavubula e sega ni tudei. Na yavubula duadua ga meda vakatakilakilataki kina sai koya ni da sa luvena tagane se luvena yalewa na Kalou. Na dina oqori e ulabaleta na vei ivakatakilakila kece tale eso, oka kina na kawatamata, na cakacaka, nai tuvaki ni bula vakayago, se na isema vakalotu” (Dallin H. Oaks, “How to Define Yourself,” New Era, June 2013, 48).

“O duatani duadua. O duatani duadua, ni ko buli ena vuku tawamudu ka solia vei iko na dodonu me nomu na bula tawamudu.

“Me kakua kina na lomatarotaro e nomu vakanananu me baleta na nomuni vakamareqeti vakayadua. Na inaki taucoko ni ituvatuva ni kosipeli oya me vakarautaka e dua na madigi vei kemuni yadua mo ni yacova na kemuni ituvaki taucoko, sai koya na torocake tawamudu kei na rawati ni bula vakalou” (Spencer W. Kimball, “Privileges and Responsibilities of Sisters,” Ensign, Nove. 1978, 105).

Veitalanoataka:

Cava na vuna e bibi kina na noda nanuma tiko na keda ivakatakilakila dina kei na ka eda rawa ni rawata?

ITAVIQARAVI (5 na miniti)

Wilika: E vinakata na Tamada Vakalomalagi meda vakamareqeti keda ena ivakarau e raici keda kina o Koya ka sega ni vaka na rai nei vuravura. E dau vakayagataka o Setani na yalolailai me vakavuna meda vakatitiqataka kina na loloma ni Kalou vei keda kei na keda ituvaki vakalou kei na inaki.

iKalawa 1: Vata kei na dua na itokani, wilika na kedrau duidui na yaga kei na kilikili ena teveli e ra (raica na Joy D. Jones, “Yavunibula Tawayalani,” Liahona, Nov. 2017, 13–15).

Yaga	Bulakilikili
Yaga Na keda yaga vua na Kalou e sega vakadua ni veisau.	Bulakilikili Na noda bula kilikili e dau veisau.
Yaga Na keda yaga sa vakadeitaki oti tu mai ni bera noda tadu mai ki vuravura. Eda sa nona ka talei na Kalou.	Bulakilikili Na noda bula kilikili e rawati mai na talairawarawa.
Yaga Na loloma ni Kalou vei keda sa tawayalani ka tawamudu. E sega ni gadrevi meda “cakacakataka”.	Bulakilikili Kevaka eda caka cala, eda sa kilikili vakalailai cake ia eda sega ni tawayaga vua na Kalou. Eda se ka bibi tikoga Vua.
Yaga E vinakata na Kalou meda raici keda kei ira na tani me vaka nona raici keda o Koya.	Bulakilikili E vinakata na Kalou meda veivutuni tikoga me rawa ni da kilikili kaya na veivakalougatataki kece e vinakata o Koya me solia vei keda.

iKalawa 2: Veivosakitaka vata kei nomu itokani na vuna e vinakata kina o Setani me da vakabauta ni tautauvata na keda yaga kei na noda bula kilikili. E vakasukai keda beka vakacava ki muri na noda dau beci keda ena noda vakanananu?

Wilika:

Eda na sega ni kila na talei ni dua na tamata me vaka na noda sega ni vakarautaka rawa na rabailevu ni veivuravura. Na tamata yadudua eda sotava era sa TAMATA DOKAI vua na Tamada Vakalomalagi. Ni da sa kila oqori, sa rawa ni da tekivu kila na sala meda qaravi ira kina na wekada” (Dieter F. Uchtdor, “Sai Kemudou na Ligaqu,,” Liaona, Me 2010, 69).

Veitalanoataka:

Na cava na vuna e bibi kina me da raici ira na tani me vaka e raici ira na Kalou? Eda na vakatorocaketaka vakacava na isolisoli vakayalo oqo?

Yalataka:

Au na kunea e dua na sala meu nanuma kina na noqu ivakatakilakila vakalou ena macawa oqo.