Vulica

“10: Vulica,” Kunea na Kaukauwa ena Turaga: Vaqaqacotaki ni Lomada (2020)

“10: Vulica,” Kunea na Kaukauwa ena Turaga: Vaqaqacotaki ni Lomada

Vulica—Levu ni Gauna: 60 na miniti

1. Vakadinadinataki ni Noda Torocake

Wilika:

Ena kaukauwa ni Turaga kei na Nona loloma soliwale, sa rawa ni da vakalougatataki meda cakava, vosota, ka rawa na ka kecega. Ena vica na macawa sa oti, keimami sa kunea na kaukauwa ena Turaga ka vulica e vuqa na kila me vakatorocaketaka na vaqaqacotaki ni lomai keimami.

iTaviqaravi (15 na miniti)

iKalawa 1: Dikeva vakararaba na itagede ni nomu torocake ena veiwasewase yadua oqo ena nomu tikitaka na kato ka toka tikiva na vanua o vakila ni o sa vakavinakataka ena gauna ni vuli oqo.

Qarauni ni noqu bula vakayago
Vakatulewataki ni noqu vakanananu
Vakatulewataki ni lomaocaoca kei na nuiqawaqawa
Vakatulewataki ni yalorarawa kei na lomabibi
Vakatulewataki ni yalo ni cudru
Tarai cake ni veimaliwai bulabula
Vakatulewataki ni lomaqu
Vakaraitaka na vakavinavinaka
Vakarautaki ni kaukauwa vei ira na tani
Yaco me vaqaqacotaki na lomaqu
Vakilai na vaqaqacotaki vakayalo

iKalawa 2: Vola e tolu na sala o sa vakavinakataka cake kina na vaqaqacotaki ni lomamu ena gauna ni vuli oqo.

iKalawa 3: Ena itekivu ni veisoqoni vaka ilawalawa oqo, o a raica kina e dua na veisau baleti iko o gadreva mo cakava. Taura e dua na gauna mo sauma na veitaro e ra me baleta na veisau oya.

Na cava na veisau o a vinakata mo cakava baleti iko?

Na cava e lako vinaka ena nomu sasaga?

Na bolebole cava soti o a sotava?

Na cava na nomu ituvatuva ni toso ki liu?

Veitalanoataka:

Wasea ki na ilawalawa eso na vakasama o a vola ena itaviqaravi e cake. Na cava so a lako vinaka?

Na bolebole cava soti o sotava ena nomu sasaga mo veisau, kei na sala cava o sa tubu kina ena vuku ni veibolebole oqori?

2. Vuli mai na Noda Vakataotaki

Wilika:

Na veivakataotaki e tiki ni bula ka na namaki me dua na tiki ni sasaga ki na veisau. Na nomu vakataotaki e rawa ni vakavulica vei iko eso na sala mo tomana tiko kina na nomu toso ki liu. Ni o sotava na veivakataotaki, ena veivuke mo vakanamata ki na torocake ka sega ki na uasivi sara. E vakavulica o Elder Kim B. Clark: “E sega ni dua vei keda e sa vinaka sara. Ena so na gauna eda na yaco koso. Eda vakasesei se vakayalolailaitaki. Eda tarabe. Ia kevaka eda vakararavi tiko vei Jisu Karisito ena yalo sa veivutuni, ena laveti keda cake oKoya, savai keda mai na ivalavala ca, vosoti keda, ka vakabula na yaloda. E sa yalovosota ka yalovinaka o Koya; ka sa tawacava rawa ka tawa druka na Nona loloma veivueti.”(“Vakararavi vei Jisu Karisito,” Liaona, Me 2019, 56).

Na ivolanikalou e vakavulica; “Sa levu na ka rarawa sa yaco vua na yalododonu; Ia sa vakabulai koya ko Jiova mai na ka kecega” (Same 34:19).

Ena nomu gole vua na iVakabula ni ko sotava na veivakataotaki, sa rawa mo tauyavutaka e dua na rai ni toso ka sega ni mo vinaka sara. E dua na sala me wali kina na veivakataotaki sai koya me vakatauvatani ki na lakova tiko e dua na ilakolako. Me kena ivakaraitaki, raitayaloyalotaka ni o lako tiko ki na dua na tauni voleka. E qai ca e dua na taya ni lori ena nomu ilakolako. O na tekivuna beka na nomu ilakolako mai na ivakatekivu mo vakavinakataka na taya? Sega. O na vaqara e dua na sala mo vakavinakataka kina ena vanua e yaco kina ka o tomana tale na nomu ilakolako. Sa vakakina, ni o sotava e dua na veivakataotaki, o na vakila beka ni sa bokoci kece na nomu toso ka dodonu mo tekivu tale, ia e sega ni dina oqori. E rawa ni o kunea eso na sala mo vakavinakataka kina na leqa ena vanua o tiko kina ka toso ki liu. Me kena ikuri, na veivakataotaki e rawa sara mada ga ni vakaraitaka vei iko na vanua o na gadreva mo vakavinakataka cake.

Veitalanoataka:

Na cava o sa vulica mai na nomu vakataotaki?

3. Vosota Vakavinaka na Noda Bolebole

Wilika:

Ena bula oqo sa dodonu me da vulica me da bula vata kei na bolebole kei na veikararawa. Eda na gadreva beka meda galala mai na bolebole ni lomada ka saga meda vinaka sara, ia ena noda igu vinaka duadua mada ga, sa dau tu ga na ivakatakilakila ni bolebole ni lomada. Ia e sega ni dodonu meda soro. Sa dodonu me da vulica me da bula vata kei na veibolebole oqo ni da toso ki liu ena vakabauta. Ni caka oqo ena vukea meda vakila na vakacegu ka yaloqaqa vakalevu cake.

E vakavulica o Elder Dieter F. Uchtdorf: “E dua na vakasama bibi e toka eke: na dau vosota e sega ni, noda tu wale ka wele tu, e sega talega ni o koya na noda tu wale ena vuku ni rere. Na dau vosota sa ikoya na wawa ka cakacaka tiko ka vosota vakadede. E kena ibalebale na noda cakava tiko e dua na ka ena noda vakayacora tiko na veika kece eda rawa ni rawata—na cakacaka, vakanuinui, kei na cakacakataki ni vakabauta; sotava na dredre ena yaloqaqa, kevaka sara mada ga e bera tiko mai na veika e gadreva na lomada. Na yalovosota e sega walega ni vosota vakadede; ia sai koya na vosota vakadede vakavinaka!” (“Vosota Tikoga,” Liaona, Me 2010, 57).

Veitalanoataka:

Na ivakasala cava mai na vidio oqo e rawa ni o vakayagataka ki na nomu bula?

4. Tuvanaki ni Takete ni Veisau Yadua

Wilika:

Ena gauna taucoko ni vuli oqo o sa vulica kina eso na kila me vukei iko mo vakayaco veisau ki na nomu bula. O sa tuvanaka, cakacakataka, ka ripotetaka na lalawa eso mo vakatovotovotaka kina na kila oqo. E vakavulica o Peresitedi M. Russell Ballard: “Tuva na lalawa leleka e rawa ni o yacova. Tuvanaka na takete e veiraurau vinaka—sega ni vuqa se lailai sara, ka sega ni cecere se lolovira sara. Vola na nomu lalawa rawarawa, ka cakacakataka me vaka na kedra bibi. Masuta na veidusimaki vakalou ena nomu tuva nomu takete” (“Keeping Life’s Demands in Balance,” Ensign, Me 1987, 14).

E dau kaya vakawasoma o Peresitedi Heber J. Grant: “Na ka eda sega ni guce ni cakava ena yaco me rawarawa vei keda me cakava; e sega ni baleta ni sa veisau na ituvaki ni ka o ya, ia e baleta ga ni sa vakalevutaki na kaukauwa meda cakava kina” (tawakilai na ivurevure).

iTaviqaravi (10 na miniti)

iKalawa 1: O na gadreva beka mo tomana tiko na toso ki liu ena nomu veisau kei na lalawa ena gauna oqo, se o rawa ni vakasamataka mo digitaka e dua na takete duidui me vakavinakataka cake na vaqaqacotaki ni lomamu. Taura e dua na gauna mo vola e ra na nomu takete ni gauna oqo se na takete vou. Ni o vakayacora, nanuma na ivakasala nei Peresitedi Ballard baleta na takete ena iwase mai cake.

iKalawa 2: Sauma na veitaro e ra.

Na kila maqosa cava au sa vulica kau rawa ni vakayagataka ki na lalawa oqo?

Na kaukauwa kei na ivurevure cava soti e tiko vei au e rawa niu vakayagataka?

Na ikalawa cava au na taura meu rawata kina na lalawa oqo?

O cei e rawa niu na saumi taro kina? O cei e rawa ni tokoni au ena lalawa oqo?

Wilika:

“Na veika eda segata me rawata ena bula e sega ni baleta meda uasiviti ira na tani ia meda tovolea ga me vakatorocaketaki keda. Me voroki na noda isausau yadua, meda vinaka cake ena veisiga yadua, me da vosota vakavinaka cake na noda veivakatovolei mai na ka eda namaka, me da soli ka me vaka eda se bera vakadua ni solia, me da cakava na noda cakacaka ena kaukauwa ka vakaotivi vakavinaka sara—oqo na inaki dina” (Thomas S. Monson, “TheLighthouse of the Lord: A Message to the Youth of the Church,” Ensign, Fepe. 2001, 5).

Veitalanoataka:

Na sala cava e tiki kina ni ituvatuva ni Kalou baleti keda na tuva lalawa?

5. Vakasaqara na Veivuke mai vua na iVakabula

Wilika:

E vakatavulica o Baraca Tad R. Callister na veika oqo me baleta na Turaga:

“Na Veisorovaki ni iVakabula e solia vei keda na bula me isosomi ni mate, ‘na isala vakaiukuuku me isosomi ni dravusa,’ veivakabulai me isosomi ni mavoa, kei na vinaka sara me isosomi ni malumalumu. E sa iwali mai lomalagi ki na vei dredre kei na sasaga ni vuravura oqo.

Ena iotioti ni macawa ni bula vakayago ni iVakabula, e a kaya o Koya, ‘Dou na kunea e vuravura na rarawa: ia mo dou vakacegu; au sa vakamalumalumutaki vuravura’.[Joni 16:33]. Baleta ni a vakayacora na Nona Veisorovaki na iVakabula, e sega ni dua na kaukauwa mai taudaku se veika e yaco se tamata—e sega ni dua na ivalavala ca se mate se veisere—ka rawa ni tarovi keda mai na rawati ni bula vakacerecerei, ke da muria na ivunau ni Kalou. Ena kila-ka oqori, sa rawa meda toso ki liu ena vakacegu kei na veivakadeitaki dei ni sa tiko vata kei keda na Kalou ena vakasaqaqara vakalomalagi oqo” (“Na Veisorovaki i Jisu Karisito,” Liaona, Me 2019, 87).

E vinakata na Turaga me vakacegui keda ka tokoni keda. E yalataka o Koya, “Mo yalomalumalumu; ena tuberi iko e ligamu na Turaga na nomu Kalou, ka sauma vei iko na nomu masu.” (Vunau kei na Veiyalayalati 112:10). Oqo e vica na sala o rawa ni vakasaqara kina na veivuke vakalou:

Vosoti iko kei ira na tani.
Masu ena vakabauta, yalomalumalumu, kei na vakavinavinaka.
Kana magiti mai na ivolanikalou kei na nodra ivakavuvuli na parofita bula.
Gole ki valetabu.
Mo nanuma na siga ni Vakacecegu, mo vakatabuya.
Vakaivotavota ena sakaramede, ka dau nanuma tikoga na iVakabula.
Me kilai tiko ni kena tiko na vakatataro kei na tarogi ni taro sa tiki bibi ni kena ciqomi na ivakatakila.
Nanuma tiko na iVakabula e vinakata me vukei iko ena nomu lalawa.

Veitalanoataka:

O sa vaqaqacotaki vakacava mai vua na Turaga ena gauna ni vuli oqo?

6. Vakasaqara na Veivuke mai vei ira na Tani

Wilika:

E sega ni vinakata na Kalou meda lako curuma duadua ga na noda vakatovolei. Ia e dau vakavuqa ni dau sotava o koya na noda gagadre mai vua e dua tale na tamata. Sa tu vua na Kalou ka na biuti ira na tamata ki na noda bula mera vukei keda ka tokoni keda ena gauna ni noda vakatovolei. Na vanua e rawa ni da gole kina me da vukei e oka kina na:

Matavuvale kei ira na iTokani nuitaki.
Ira na iliuliu ni Lotu kei ira na marama se turaga dauveiqaravi.
iVurevure vakaitikotiko.
Veivuke vaka-kenadau.

Veitalanoataka:

Era vukei iko vakacava eso tale ena gauna ni vuli oqo?

Vakasaqarai ni Veivuke Vaka-Kenadau

Wilika:

E dredre meda kila se meda vaqara se kua na veivuke vaka-kenadau. Na ituvaki eso oqo era ivakatakilakila ka na rawa ni vakaraitaka na gadrevi ni veivuke mai vei ira na kenadau.

O vakararawataki mai na veivakauqeti kaukauwa ni cudru, rarawa, rere, mosi ni yalo, se nuinuikara. Se cava ga na ka o cakava, na veika o vakila oqo e tu ga ka sa dau vakamalumalumutaka na yago kei na vakasama.
Dina ni na vakilai vagauna ni basika ka yali tale yani, na veileqa oqo e tomani tikoga me vica vata na vula.
O vakila ni o malumalumu vakayago, ka veisau na ivakarau ni nomu kana kei na moce.
E sega ni dau tarovi rawa na nomu vakila na lomaleqa kei na nuiqawaqawa.
O dau vakananuma mo vakamavoataki iko se so tale.
Na nomu rawa ni cakacaka e veisiga e tarai, ka yalani kina na nomu rawa ka.

Kevaka o sa sotava tiko eso na ivakatakilakila oqo ka lomaleqataka na nomu bula, vosa ki na dua na kenadau ni bula se dua o nuitaka.

Me kilai: Na ikuri ni ivakamacala ena digitaki ni kenadau ni veiqaravi ni bula baleti iko ena rawa ni kunei ena iwasewase ni “iVurevure” ena mua ni iwase oqo.

7. iTinitini

Wilika:

Vakanuinui vinaka ena vakacavari ni vuli oqo! E vuqa na ka eda sa veivosakitaka ena sega ni rawa ni rawati ena loma ni 10 na macawa. Ia, o ni sa tauyavutaka beka eso na itovo ka rawa ni vukei kemuni mo ni toso ki liu ki na vaqaqacotaki ni lomada. Railesuva vakawasoma na wase ena ivola ni cakacaka oqo mo nanuma ka vakatovotovotaka kina na vei ivakavuvuli kei na kilaka oqo.

Veitalanoataka:

Dou wasea vakailawalawa ena volodia na veika dou sotava mai na vuli oqo. Vakasamataka mo wasea na kila-ka yaga duadua o sa vulica, na veika vakayalo o sa sotava, na sala o sa veisau kina, se sa vakalougatataki iko vakacava na Turaga ena gauna ni vuli oqo.

Wilika:

Ni sa vakacavari na vuli oqo, eso na ilawalawa era digitaka me vakalailaitaki na nodra tomana tiko na nodra dau sota vata. Eso era kunea na yaga ni vuli vata tikoga, veitokoni vakai ira, ka cakacaka me rawai na veibolebole eso. Eso tale era dau vakau itukutuku ena talevoni veikauyaki se itukutuku raraba me ra dau veivakayaloqaqataki ka wasea na itukutuku veilaveti, vidio, kei na itukutuku tale eso.

Veitalanoataka:

Veivosakitaka vakailawalawa kevaka o ni vinakata moni na veitaratara tikoga vakai kemuni. Ke vakakina, o ni na vinakata mo ni cakava vakacava?