“6: Noqu Yavu: Walia na Leqa,” Kunea na Kaukauwa mai vua na Turaga: iSau ni Yalo (2020)
“6: Noqu Yavu: Walia na Leqa,” Kunea na Kaukauwa mai vua na Turaga: iSau ni Yalo
Noqu Yavu: Walia na Leqa—Levu ni Gauna: 20 na miniti
Ripote:
Wasea vakalailai kei na nomu ilawalawa na itavi dredre o a vakacavara rawa ena macawa sa oti.
Vakananuma:
Na cava o nanuma kina ni sa vakatara na Tamada Vakalomalagi meda sotava na leqa kei na veibolebole eso?
Sarasara:
“Dua na Lori Levu Cake?” tiko ena https://churchofjesuschrist.org/study/video/self-reliance-videos. (Sega na vidio? Wilika na ilavelave ni “Dua na Lori levu cake?”)
Dua na Lori Levu cake?
Kevaka o sega ni sarava rawa na vidio, wilika na itukutuku.
Peresitedi Dallin H. Oaks
Rua na tagane rau tauyavutaka e dua na veitokani. Rau tara e dua na valelaca ena yasa ni dua na gaunisala osooso. Rau taura mai e dua na lori ka draivataka yani kina nona iteitei edua na dauiteitei, ka rau volia mai vakasinai ena nodrau lori na meleni yadua na dola. Rau draivataka yani na lori sinai oqo kina nodrau valelaca e yasani gaunisala, ka rau mai volitaka kina ya dua na dola na meleni.
Rau lesu tale yani kina iteitei nei dauteitei ka baci volia tale e dua na lori sinai ena meleni ya dua na dola. Kauti ira tale yani e bati ni gaunisala ka volitaki ira tale me yadua na dola. Ena nodrau draiva tale yani kina iteitei nei dauteitei me rau volia vakasinai tale mai na lori, sa kaya vei kena ikarua, “Daru sega ni rawa ilavo vakalevu tiko ena bisinisi qo, se vacava?” “E sega, e daru sega saraga,” a kaya mai o itokani. E a taroga yani, “O nanuma beka ni dodonu me dua na lori levu cake?”
(“Vakanamata kei na Veika Me Vakaliuci,” Ensign, Me 2001, 82)
Veivosaki:
Na cava na leqa dina ena italanoa oqo? Na cava eso na ka e rau rawa ni cakava na turaga e rua?
Wilika:
Na malanivosa ni ivolanikalou oqo kei na itukutuku mai vei Elder Hales:
“Raica, ko sa sega ni kila; ko a nanuma niu na solia vei iko, ia ko a sega mada ni vakasamataka mo a kerea ga vei au.
“Ia, raica, au sa kaya vei iko, sa dodonu mo vakasamataka vakavinaka ena nomu vakasama; oti e dodonu mo qai taroga vei au kevaka e sa dodonu, ia kevaka e sa dodonu, au na vakauqeta na yalomu ka na katakata mai na lomamu; o koya ko na qai vakila sara ni sa dodonu.
“Ia kevaka e sega tiko ni dodonu ko na sega ni vakila e dua na ka, ia ko na vakila na berabera ni nomu vakasama ka na vakavuna mo na guilecava na veika e cala” (Vunau kei na Veiyalayalati 9:7–9).
“E namaka vei keda na Turaga me da walia ga vakataki keda na noda leqa. Eda tamata vakasama, ka dau veidrutaitaka na ka. E tu vei keda na kaukauwa me da kila na veika eda gadreva, me da tuvatuva ka, tuva na takete, ka walia na noda leqa” (Robert D. Hales, “Na iSolisoli Vinaka Yadua,” New Era, Okosi. 1983, 8, 9).
Wilika:
Na malanivosa ni ivolanikalou eso oqo:
“Ia oqo, kevaka sa tu na kaukauwa levu vakaoqo vua na Turaga, ka sa vakayacora e vuqa na cakacaka mana ena kedra maliwa na luve ni tamata, me qai sega ni rawa vakacava vua me vakaroti au me’u taya e dua na waqa?” (1 Nifai 17:51).
“Ia oqo, koi au ko Nifai, au sa sega ni cakacakataka na kau me vaka e vulica na tamata, se me’u taya na waqa ena kena icakacaka vaka-tamata; ia au sa taya ga ena kena icakacaka sa vakaraitaka vei au na Turaga; o koya, a sa sega kina ni vaka na kena icakacaka vaka-tamata.
“Ia koi au, ko Nifai, au sa dau lako vakawasoma ki na ulunivanua, ka’u sa dau masu vakawasoma vua na Turaga; a sa vakaraitaka kina vei au na Turaga na veika lelevu” (1 Nifai 18:2–3).
Veivosaki:
E rawa vakacava vei Nifai me tara e dua na waqa?
Yalataka:
Au na cakava na veikalawa keitou a veivosakitaka ena itaviqaravi meu cakacakataka na noqu leqa. (Nanuma, kakua ni guce. E taura na gauna me dau wali na leqa kei na vakayaco veisau.)