Vulica—Levu ni Gauna: 60 na Miniti

1. Na Cava na Lomaocaoca kei na Nuiqawaqawa?

Wilika:

Na lomaocaoca kei na nuiqawaqawa erau sa tiki tu ni bula. Na veivosa oqo e vakamacalataka na sala eso e veisotavi kina na mona kei na yago ki na veika e gadrevi, me vaka e dua na leqa e vanua ni cakacaka, veitarogi e koronivuli, se dua na vakatulewa bibi. Na lomaocaoca kei na nuiqawaqawa vakarauta e rawa ni vukei iko mo vakanamata, yacova na nomu takete, ka taqomaka na yagomu. Me ivakaraitaki, kevaka e tiko eso na lomaocaoca me baleta na nomu cakacaka, o na rawa ni vakavakarau mai ki cakacaka ka vakanamata ki na nomu itavi.

Na lomaocaoca kei na nuiqawaqawa e vukei iko mo bula tiko, ia na nomu lomaocaoca kei na lomaleqa vakawasoma se vakabalavu ena rawa ni vakavuna na leqa bibi eso ka veimuataki ki na tauvimate ni vakasama. Kevaka o lomaocaoca ka nuiqawaqawa tiko vakalevu, e rawa ni o tauvimate wasoma, mosi na ulumu, yalocudrucudru, veisau vakalevu nai vakarau ni nomu kana, se dredre na vakanamata.

O na rairai tekivu bikai ena nomu cakacaka, se o na sega beka ni via cakacaka baleta ni o rerevaka e dua na ka ca ena yaco se o na sega ni vinaka cake. Oqo era ivakatakilakila ni o vakila tiko na lomaocaoca se ivakatagedegede ni lomaocaoca kei na nuiqawaqawa ka dau veivakamalumalumutaki.

Na lomaocaoca kei na nuiqawaqawa e rawa ni vakayacoka ki na nomu rawa ni vakila na Yalotabu se vakatanitaka na nomu kila na veivakauqeti vakayalo. E kaya o Sister Reyna I. Aburto, “Ia, kevaka meda sa rarawa tu ga ka yaco noda mosi me tarova noda vakila na loloma nei Tamada Vakalomalagi kei na Luvena kei na veiuqeti ni Yalo Tabu, eda sa qai vakaleqai tiko ena nuiqawaqawa, lomaocaoca, se dua tale na leqa ni lomada” (“Veidraki Kece, Jisu Tu vei Au!” Liaona, Nove. 2019, 57).

Na iwase oqo e vakanamata ena vulici ni kena sotavi vakavinaka cake na itagede vakarauta ni lomaocaoca kei na nuiqawaqawa. E rawa ni o vulica mo kila ni sa rui levu na nomu lomaocaoca se lomaleqa ka vakasaqara na veivuke e veiganiti.

Veitalanoataka:

E sa vukei iko se vakararawataki iko vakacava na lomaocaoca kei na lomaleqa?

2. Kila vinaka na iVakatagedegede ni Lomaocaoca

Wilika:

Me vakataka na ivakaraitaki ena papa ni motoka ka vakananuma vei iko mo vakamalua, vakatawana na waiwai, se dikeva na idini, na ivakatakilakila ni lomaocaoca e vakananumi iko mo toso vakamalua, vakatawana na nomu “taqe,” vakayalo ka vakaraica eso na iwali vou. Ni o cakacaka mo vakatulewataka vakavinaka na nomu lomaocaoca, ena rawa ni veivuke me wasei na lomaocaoca ki na va na ivakatagedegede duidui. (Raica na ivolakabi ena itaviqaravi oqo.)

ITAVIQARAVI (5 na miniti)

iKalawa 1: Vakai iko ga, wilika na va na ivakatagedegede ni lomaocaoca. O na rairai sotava na itagede duidui ni lomaocaoca ena veigauna duidui eso. O na rairai vakila ni o tiko ena dua na ivakatagedegede dromodromo nikua kei na dua na itagede drokadroka ni mataka. Na nomu yaco mo bulabula vakalevu cake ena lomamu ena vukei iko mo sotava e dua na ivakatagedegede drokadroka ni lomaocaoca vakalevu cake. Makataka na ivakatagedegede e vakamacalataka vakavinaka na veika o vakila ena gauna oqo.

iTagade Ni Lomaocaoca

	Kevaka o Vakila ni o …	Na cava me caka
Drokadroka	Kevaka o Vakila ni o … Nuidei Lomavinaka Vakarau mo sotava na bolebole Rawa ni veiyaloni kei ira na tani Rawa ni vakila vakarawarawa na Yalo	Na cava me caka Oqo na ivakatagedegede era gadreva na tamata me ra tiko kina, ia e kena ivakarau me dau veitubuyaki. Toso tikoga. Ena ivakatagedegede drokadroka, o sotava tiko kina na lomaocaoca ni veisiga ni matavuvale, cakacaka, vuli, kei na toso ki liu ena sala bulabula.
Dromodromo	Kevaka o Vakila ni o … Ririko Kauwai Lomaleqa Sega ni dei Dredre ni veisemati kei ira na tani Vagolei tani mai na vakilai ni Yalo	Na cava me caka E sa matau tu me dau vakayagataki eso na gauna ena itagede dromodromo. Dau yalovinaka vei iko ni ko sotava tiko na veibolebole ni bula. Vakaitavi ena itaviqaravi veivakacegui, me vaka era vakaturi tiko ena iwase oqo, me veivuke ena vakalevutaki ni nomu rawa ni vakatulewataka na lomaocaoca.
Dromodromo kata	Kevaka o Vakila ni o … Oca (na yagomu kei na lomamu) Luvuci Tauvimate (me kena ivakaraitaki, mosi ni kete) Cudru vakarawarawa Yalolailai vakalevu Dredre ni vakila na Yalo	Na cava me caka E sega ni dua e taleitaka me tiko ena ivakatagedegede molibota ni lomaocaoca, ia oqo e sega ni dodonu me dede. Vakaitavi ena itaviqaravi veivakacegui ka vakananuma na veika vinaka sa sotavi oti. Kevaka o tiko ena ivakatagedegede ni molibota me sivia e vica na siga se o luvuci, kere veivuke.
Damudamu	Kevaka o Vakila ni o … Sa dau ulabaleti tu ga Vakatikitikitaki mai vei ira na tani Sega na inuinui E dau dredre na kana se moce Sega ni rawa ni toso tale E vaka ni sa biuti iko na Kalou	Na cava me caka Kevaka o tiko ena ivakatagedegede oqo, kere veivuke. Kevaka o rawa ni cakava, navuca mo cegu vakalekaleka se cakava e dua na ka e vukea na lomamu me yacova ni o rawa ni sota kei na dua na kenadau ni veiqaravi ena tabana ni bula.

iKalawa 2: Vakasamataka na gauna a yaco kina na nomu itagede ni lomaocaoca ena ivakatagedegede drokadroka. Na cava a vukei iko mo vakila me vaka o ya?

iKalawa 3: Vakailawalawa, veivosakitaka na nomu isaunitaro mai na ikalawa 2.

Wilika:

O ira era kunea ni dredre me ra bulataka na bula ni veisiga e rawa ni tiko na leqa ena nodra bula. Na leqa tubukoso ena rawa ni vakavuna mo toki vakasauri ki na dua na ivakatagedegede ni lomaocaoca roka dromodromo kata se damudamu. Sa dodonu me ra vakasaqara vakatotolo na tamata na veivuke vei ira na kenadau kevaka era sega ni rawa ni sotava se ra sa vakayagataka tiko na wainimate gaga. O ira era vakasamataka tiko na kukuna e dodonu me ra lako ki na rumu ni leqa tubukoso voleka duadua e valenibula ka dolele yani ki na matavuvale, dua na itokani, se nodra bisopi se iliuliu ni Lotu tale eso. Raica na suicide.ChurchofJesusChrist.org tale baleta na talevoni kei na ivurevure ni veivuke.

Mai na Vualiku kei Amerika ena rawa ni qiriti na Laini Raraba ni iTatarovi ni Kukuna ena 1-800-273-8255.

3. Mo Tiko Malua me Vakalailaitaki kina na Lomaocaoca

Wilika:

Na lomaocaoca kei na ivakarau ni vakanananu sega ni dodonu e rawa ni lewa ka vakatanitaka na nomu vakanananu. Na nomu vakanamata e rawa ni veiladeyaki, se rawa ni toki me vakanamata ki na dua tale na ka ka sega ki na veika e yaco wavoliti iko tu.

Na tiko malua e dua na kila maqosa ka na vukei iko me bulabula cake na lomamu. Sai koya na nomu raica vakamalua na veika e tukuna tiko vei iko na yagomu ena sara gauna sara ga oqo. E rawa ni vukea na kena vakalailaitaki na lomaocaoca kei na nuiqawaqawa ka vakalevutaka na nomu tiko vinaka kei na yalodei. Na tiko malua e vukei iko talega mo kakua ni dau ririko vakasivia se luvuci ena veika e yaco wavoliti iko tu.

Veitalanoataka:

Na cava e vukei iko mo vakanamata, ena gauna mada ga o lomaocaoca tiko kina?

Vakananuma:

Ena dua na ivakarau mai na 1 ki na 10, e vakacava beka na noqu lomaocaoca ena gauna oqo?

ITAVIQARAVI (5 na miniti)

iTukutuku nei Dauveivakarautaki: Me vaka na itaviqaravi taucoko, kakua ni veisautaka se vakavinakataka cake na itaviqaravi oqo. Wilika ga na veikalawa ni itaviqaravi oqo ena domo malumu ka vakamalua me rawa ni ra kila vakavinaka na lewe ni ilawalawa na ka e wiliki.

Ena vakatovotovo ni tiko malua oqo, o na vakatovotovotaka kina na vakanomodi. Na itaviqaravi oqo e dua ga na ivakaraitaki. Ena wilika o dauveivakarautaki na veikalawa e ra ni ra vakamuria tiko na lewe ni kalasi.

iKalawa 1: Dabe ena dua na vanua logalogavinaka ka rawa ni o tiko kina vakanomodi me vica na miniti. (Ni caka oqo e vale, e rawa ni o dabe se davo sobu.) Me bobo na matamu.

iKalawa 2: Tekivu ena nomu taura e vica na icegu balavu, cegu vakamalua, cegu cake e ucumu ka cegu sobu vakavinaka e gusumu. Vakatara na nomu icegu mo kunea na kena itautau matau. Raica na ka o vakila ena kena veitubuyaki na nomu yatevuso ni o cegu cake ka cegu sobu. Kevaka e veiladeyaki na nomu vakanananu ki na veika tale eso, kakua ni leqa; oqori ena yaco. Kevaka o vagolei tani, mo raica ga na mataqali vakanananu, na ka o vakila, kei na veika e tara na yagomu ka vagolei iko tani. Vakaraici ira ka kakua ni saga mo lewai ira se vakalewai ira, ka qai vagolea lesu mai na nomu vakasama ki na nomu icegu. Na nomu icegu e vakarautaka e dua na ikelekele mo na rawa ni lesu tale kina e veigauna.

iKalawa 3: Vakatovotovotaka mo tiko malua ena vakayagataki ni icegu. Vakadua tale, kevaka e veiladeyaki na nomu vakasama, raica na vakanananu, na veika o vakila, kei na nanuma e dau vagolei iko tani ka vakatara me ra ciri siviti iko me vaka na o ni lomalagi. Cegu vata kei na itovo ni rai oqo me dua na miniti.

iKalawa 4: Ni sa vakarau cava na vakaukauwa yago oqo, vakatara vakamalua me rabailevu na ka o vakila, ka raica na yagomu kei na rumu e vakavolivoliti iko. Ni o sa vakarau tu, dolava na matamu ka lesu tale mai mo kila vinaka na veika e vakavolivoliti iko tu. Nanuma tiko ni cegu e dua na iyaya ka na rawa ni vukei iko mo yalovakacegu ka tiko ena gauna sara oqo ena dua ga na gauna.

iKalawa 5: Ena dua na ivakarau mai na 1 ki na 10, e vakacava beka na noqu lomaocaoca ena gauna oqo.

Veitalanoataka:

A veivuke beka na vakatovotovo ni tiko malua me vakalailaitaka na nomu itagede ni lomaocaoca?

iDusi:

E rawa ni o cakava ga vakataki iko na vakatovotovo ni tiko malua ena nomu gauna vakataki iko. Vakasamataka mo vulica eso tale na ka me baleta na tiko malua kei na iwalewale tale eso ni vakamalumutaki yago ena vakayagataki ni ivurevure ena mua ni wase oqo.

4. Rawati ni Kaukauwa Vakalou

Sarava:

“Reach Up to Him in Faith,” sa vakarautaki tu ena https://churchofjesuschrist.org/study/video/self-reliance-videos [3:54].

Wilika:

E vakatavulica o Peresitedi Dallin H. Oaks na nona rawata na Karisito me vaqaqacotaki keda ena ituvaki cava ga eda sotava: “O koya gona sa kila tu o Koya na noda dredre, mosi ni lomada, noda temaki, kei na noda rarawa, ni sa sotava kece o Koya ena lomasoli me vaka ni tiki bibi ni Nona Veisorovaki. Ia ena vuku ni ka oqo, sa rawa kina Vua mai na Nona Veisorovaki me vakaukauwataki keda—me solia vei keda na kaukauwa me da vosota rawa na ka kecega. …

“… Na nona Veisorovaki na noda iVakabula e sega walega ni vakadeitaka vei keda na bula tawamate rawa ena tucaketale raraba ka vakarautaka vei keda na madigi me da savai mai na ivalavala ca ena veivutuni kei na papitaiso. Sa solia talega vei keda na Nona Veisorovaki na madigi me da masuti Koya ka sa sotava oti na noda veimalumalumu kece sara ni bula oqo me vakabulai keda ka solia vei keda na kaukauwa me da sotava rawa na icolacola ni bula oqo. E kila o Koya na noda yaluma, ka sa tuvakarau ena vukuda. Me vaka na kai Samaria dauloloma ni kunei keda ena tutu ni sala, ena vadretitaka na noda mavoa ka qaravi keda (raica na Luke 10:34). Na kaukauwa veivakabulai kei na veivaqaqacotaki i Jisu Karisito kei na Nona Veisorovaki sa baleti keda kece eda na kerekere” (“Vaqaqacotaki ena Veisorovaki i Jisu Karisito,” Liaona, Nove. 2015, 62, 64).

Veitalanoataka:

Ena vukei iko vakacava na nomu dau nanuma na iVakabula mo vakatulewataka vakavinaka cake kina na lomaocaoca kei na lomaleqa?

ITAVIQARAVI (10 na miniti)

iKalawa 1: Wilika vakataki iko na sala eso oqo mo vakatulewataka kina na lomaocaoca kei na lomaleqa. Wirina na veivakasama o na via tovolea.

1. Veitalanoa vata kei na Kalou. Kila ni kila o Koya. Raitayaloyalotaki Koya ni dabe volekati iko tiko, vakarorogo ka veitokoni.

2. Vakananuma Vakatitobu. Vakasamataka na veigauna o vakila kina na veivakalougatataki ni Turaga ka raica na Ligana kei na loloma veivueti ena nomu bula. “Dou tiko lo, mo dou kila ni’u sa Kalou.” (Same 46:10).

3. Raica na veika o namaka tiko. Ena so na gauna na noda lomaleqa kei na lomaocaoca levu duadua e dau yaco mai ni sega ni yaco ena noda bula na veika eda nuitaka se tuvalaka. Eda rawa ni vuli mai na veika eda sotava nida lomaocaoca. “Ni veika kece oqori ko na yalomatua ka vinaka cake. … O koya, mo tudei tikoga kina ena nomu sala” (Vunau kei na Veiyalayalati 122:7, 9).

4. Taura e dua na cegu lekaleka. Cegu vakamalua, ka vakatitobu, vakadodo ka vakamalumutaka na yagomu. Ni sa malumu tale na yagomu kei na nomu vakasama, sa na qai rawa mo vakasama vakamatata cake. Taubale, kana se gunu, dabe ka vakanananu me vica na miniti.

5. Mo dau vakila na gauna o lomaocaoca kina. Ena so na gauna o na sega beka ni kila ni o lomaocaoca tiko. O na rairai sotava na dredre ni moce, cudru rawarawa, yalorarawa, se lailai na nomu igu. Dikevi iko mada vakadua ena dua na siga mo raica se o sa vakacava tiko.

6. Raimatua tiko ena vakavinavinaka. Raica na veika e tu wavoliti iko. Vakanamata me vica na miniti ena veika e dodonu, vinaka, ka daumaka me baleti iko kei na vuravura. Tekivuna e dua na nomu ivolaniveisiga ni vakavinavinaka, ka vola e lima na ka vakatabakidua o vakavinavinakataka ena veisiga yadua.

7. Mo bulabula. Sa soli vei keda e dua na yago kei na vuravura me da marautaka. Cakava e dua na ituvatuva mo vakayagataka kina na yagomu mo gade kina ka marautaka na isolisoli oqo. E vica mada ga na miniti ni taubale e rawa ni vukea me vakataudonutaka na yalomu ka vakalailaitaka na lomaocaoca.

8. Yalana na vakayagataki ni tekinolaji. Ni o vakayagataka na tabana ni veimaliwai raraba, kompiuta, kei na TV, vakabibi ena itekivu kei na icavacava ni siga, ena rawa ni vakalevutaka na yalo ni lomaleqa se lomaocaoca. Tovolea mo tekivuna ka tinia na nomu siga ka sega kina na talevoni se kompiuta. Lakova e dua na siga se macawa ka sega kina na tabana ni veimaliwai raraba se TV ka raica na veika o vakila.

9. Dau yalovinaka vei iko. Vosa vei iko` e`na vosa veivakacegui vata ga o na cavuta vua e dua na daulomani. Na vakasama ni tawayaga, na vakanuinuica, se veivakacacani e sega ni mai vua na Kalou ka vakavuna me levu cake na lomaocaoca kei na nuiqawaqawa.

10. Vukea tale e dua. Vagolea na nomu igu ena nomu veiqaravi vua e dua tale. Sa noda inaki cecere meda lomani ira na tani me vakataki Karisito, ena gauna mada ga eda sotava tiko kina na dredre. E solia vei keda na Karisito e dua na ivakaraitaki ni loloma oqo ena Nona vosoti ira na vakararawataki Koya ka vakadeitaka me na qaravi o tinana ena gauna sara ga a kune rarawa toka kina o Koya ena kauveilatai. E dina ni dredre, ia e rawa ni da raica vakavinaka cake na noda bula ni da tu vakadua ka nanumi ira na tani ka vakasaqara na sala me da veivuke kina.

11. Tovolea e dua na itaviqaravi veivakacegui. Na tamata kece e duidui na sala ni nodra vakamalumutaka na yagodra. E rairai beka o taleitaka na droini, vakarogorogo ki na sereivakatagi, wilika e dua na ivola, se tiko e tautuba. Ni o lomaocaoca se nuiqawaqawa, taura na gauna mo vakananuma kina na veika e kauta mai vei iko na reki kei na vakacegu. Solia na gauna mo cakava na veika oqori, kevaka sara mada ga o nanuma ni o sa rui osooso.

12. Sema tikoga vei ira na itokani kei na matavuvale. Na nomu tiko vata kei ira era lomani ka tokoni iko sa rawa ni veivuke ena kena vakalailaitaki na lomaocaoca. O a caka mo sema. E sega ni dua na ka me maduataki ena wasei ni veika o sotava tiko. Vukei ira na nomu itokani kei na matavuvale me ra kila na veika o sotava tiko.

13. Cavu i kalawa vakayadudua ena dua na gauna. Sa rawa mo tarogi iko, “Na cava na ka bibi duadua au rawa ni cakava tiko ena gauna oqo?” Na nomu isaunitaro e rawa ni dua na ka me vaka na “Na ka ga au gadreva meu cakava ena gauna oqo sai koya meu waraka na noqu basi” se “Na ka ga meu cakava ena gauna oqo sai koya meu savata na veleti.” Vakatulewataka na cava me caka ena gauna oqo kei na cava e rawa ni wawa mada. Vulica mo kakua ni beitaki iko ni o “vakasega” ki na dua na ka e rawa ni wawa.

14. Vakatovotovotaka na tiko malua. Vakayagataka na vakatovotovo ena itaviqaravi kei na mua ni wase oqo mo vakatovotovotaka kina na vakanomodi. Vaqara na sala mo vakananumi iko kina mo na tiko vakanomodi vakalevu cake ena siga taucoko.

iKalawa 2: Ena teveli e ra, vola yadudua e vica na vakasama me vakalailaitaka kina na lomaocaoca kei na nuiqawaqawa o via tovolea. Cakava e dua na ituvatuva ni gauna kei na sala o na vakayagataka kina na iwalewale.

Sala ni Kena Vakalailaitaki na Lomaocaoca kei na Nuiqawaqawa	Gauna kei na Kena Sala
Sala ni Kena Vakalailaitaki na Lomaocaoca kei na Nuiqawaqawa iVakaraitaki Taura e dua na cegu lekaleka.	Gauna kei na Kena Sala Au na tuva e dua na ivakananumi ena noqu talevoni meu taura e lima na miniti meu vakasigalevu ka ni bera niu lesu ki vale mai na cakacaka.
Sala ni Kena Vakalailaitaki na Lomaocaoca kei na Nuiqawaqawa	Gauna kei na Kena Sala
Sala ni Kena Vakalailaitaki na Lomaocaoca kei na Nuiqawaqawa	Gauna kei na Kena Sala
Sala ni Kena Vakalailaitaki na Lomaocaoca kei na Nuiqawaqawa	Gauna kei na Kena Sala

5. Vakataucokotaki

Wilika:

Na vakataucokotaki sai koya na vakabauta ni kevaka eda sega ni vinaka sara ena ka kecega, eda sa tamata druka ka sega ni vinaka sara vua na Kalou se vua e dua tale na tamata. Ia, eda kila ni sa solia vei keda na Turaga na malumalumu me vukei keda meda yalomalumalumu tikoga ka vakavulici rawarawa (raica na Ica 12:27).

Ena vuku ni vakataucokotaki, e vakavulica o Elder Jeffrey R. Holland:

“Na noda inuinui duadua ga meda vakataucokotaki dina sai koya na noda ciqoma me vaka e dua na isolisoli mai lomalagi—eda na sega ni rawa ni ‘cakacakataka’. Ia, na loloma soli wale i Karisito e vakarautaka vei keda sega walega na veivakabulai mai na rarawa kei na ivalavala ca kei na mate ia na veivakabulai talega mai na noda dau vakalewai keda vakai keda. …

“Taciqu kei na ganequ, o keda yadudua eda sa sasaga meda va-Karisito vakalevu cake mai na noda rawa ni rawaka ena bula. Kevaka eda vakadinata ya ena yalodina ka saga voli meda vinaka cake, eda sa sega ni dauveivakaisini; eda sa tamata ga. … Kevaka eda vosota, ena qai dua na vanua ena tawamudu ena vakaotivi ka taucoko kina na noda vakasavasavataki—sai koya na ibalebale ni vinaka sara ena Veiyalayalati Vou” (“O Koya Mo Dou Qai Vinaka Sara—Vakaoti,” Liaona, Nove. 2017, 41–42).

Wilika:

Oqo e va na ivakavuvuli ni kena vakalevutaki na nomu yalololoma vei iko kei na vakalailaitaki ni vakataucokotaki:

1. Meda kila vakavinaka na vakasama ni vakataucokotaki ena noda vakanananu, veika eda vakila, kei na noda ivalavala.

2. Bolei ira na veivakanananu o ya, na veika e vakilai, kei na ivalavala.

3. Ciqoma na noda cala me tiki ni bula, ka kakua ni rerevaka mo cakava e dua na cala.

4. Vakatorocaketaka na nomu yalololoma vei iko; mo ciqomi iko ka lomani iko, oka kina na nomu malumalumu.

Sarava:

“Perfectionism: Will I Ever Be Good Enough?” tiko ena https://churchofjesuschrist.org/study/video/self-reliance-videos [3:54].

Veitalanoataka:

Ena vidio, a yaco vakacava o Olivia me dau yalololoma vakalevu cake vei koya ka bolea na nona vakasama ni vakataucokotaki?

Vakadidike vakailawalawa (10 na miniti)

Eda sa mai sota tiko vakailawalawa ena loma ni va na macawa sa oti. Vakai iko, sauma na veitaro yadua oqo me baleta na veika o sa sotava mai.

Na Cava Au Vakila Me Baleta na Veika Sotavi Oqo?	Sega vakadua	Eso na gauna	Vakawasoma	Veigauna
Na Cava Au Vakila Me Baleta na Veika Sotavi Oqo? 1. Na lewe ni ilawalawa yadua me ripotetaka na nona yalayala.	Sega vakadua	Eso na gauna	Vakawasoma	Veigauna
Na Cava Au Vakila Me Baleta na Veika Sotavi Oqo? 2. Me tekivu ka cava na noda ilawalawa ena kena gauna.	Sega vakadua	Eso na gauna	Vakawasoma	Veigauna
Na Cava Au Vakila Me Baleta na Veika Sotavi Oqo? 3. Era vakaitavi kece na lewe ni ilawalawa.	Sega vakadua	Eso na gauna	Vakawasoma	Veigauna
Na Cava Au Vakila Me Baleta na Veika Sotavi Oqo? 4. Au dau vakila na Yalotabu ena neitou soqoni vakailawalawa.	Sega vakadua	Eso na gauna	Vakawasoma	Veigauna
Na Cava Au Vakila Me Baleta na Veika Sotavi Oqo? 5. Au sega ni dau vosa vakalevu ena veivosaki vakailawalawa.	Sega vakadua	Eso na gauna	Vakawasoma	Veigauna
Na Cava Au Vakila Me Baleta na Veika Sotavi Oqo? 6. Au vakila e dua na ivau vata kei ira na noqu lewe ni ilawalawa.	Sega vakadua	Eso na gauna	Vakawasoma	Veigauna
Na Cava Au Vakila Me Baleta na Veika Sotavi Oqo? 7. Au vakila ni sa yaco tiko me vaqaqacotaki na lomaqu.	Sega vakadua	Eso na gauna	Vakawasoma	Veigauna
Na Cava Au Vakila Me Baleta na Veika Sotavi Oqo? 8. Au vakila niu ciqomi mai vei ira na noqu lewe ni ilawalawa.	Sega vakadua	Eso na gauna	Vakawasoma	Veigauna

Veitalanoataka:

Na cava e rawa ni da cakava me vakatorocaketaki kina na veika e sotava na ilawalawa?

iDusidusi