Noqu Yavu: Cakacakataka na Vakabauti Jisu Karisito—Levu ni Gauna: 20 na Miniti

Vakananuma vakatitobu:

Tarogi iko mada, “Ena vukei au vakacava na noqu vakabauti Jisu Karisito meu sotava kina na veigauna dredre?”

Sarava:

“Exercise Faith in Jesus Christ,” tiko ena https://churchofjesuschrist.org/study/video/self-reliance-videos [1:43]. (Sega na vidio? Wilika na vosavolai ni “Cakacakataka na Vakabauti Jisu Karisito.”)

Cakacakataka na Vakabauti Jisu Karisito

Kevaka o sega ni sarava rawa na vidio, wilika na vosavolai oqo.

na tamata e colata tiko na kato ni veiyalayalati

Elder David A. Bednar:

Na cakacaka sa ikoya na cakacakataki ni vakabauta. Era laveta tiko na kato ni veiyalayalati na Isireli. Era sa yaco mai ki na Uciwai na Joritani. Na yalayala sai koya ni ra na takoso ena vanua mamaca. Ena gauna cava e qai tawase kina na wai? Ni sa suasua na yavadra. Era taubale yani ki loma ni uciwai—cakacaka. E muria mai na kaukauwa—e tawase na wai.

Ena levu na gauna eda vakabauta, “Au na kila deivaki rawa mada e liu, kau na qai veisautaka kina na veika meu cakava.” Au vakatura ni sa rauta na veika e tiko me da tekivu kina. E tiko vei keda na wakilakila ni idusidusi donu. Na vakabauta sa ivakavuvuli—na ivakavuvuli—ni cakacaka kei na kaukauwa. Na vakabauta dina sai koya na raica matua tikoga na Turaga o Jisu Karisito ka na dau veimuataki ga kina cakacaka.

(Raica na “Seek Learning by Faith” [vosa vei ira na qasenivuli vakalotu ena iVakarau ni Vuli, Fepe. 3, 2006], ChurchofJesusChrist.org/media-library.)

Wilika:

Na malanivosa ni ivolanikalou oqo kei na nodra itukutuku na iliuliu ni Lotu:

“Ka a sega tale ga ni dua na gauna me a vakayacori kina e dua, na veicakacaka mana me yacova ni ra sa vakabauta; o koya era sa vakabauta taumada kina na Luve ni Kalou” (Ica 12:18).

“Na vakabauta na Kalou e oka kina na vakabauta na Nona inaki vakakina ena Nona gauna ga. Ena sega ni rawa meda ciqomi Koya vakataucoko ni da besetaka tiko na Nona ituvatuva” (Neal A. Maxwell, That Ye May Believe [Salt Lake City: Bookcraft, 1992], 84).

“Na vakabauti Karisito ena tosoi keda me da cakava na veika eda sega ni dau cakava. Na vakabauta e dau uqeti keda ki na cakacaka eda na rawata kina vakalevu na Nona mana. Eda na vakalevutaka cake talega na mana ni iVakabula ena noda bula ni da cakava na veiyalayalati tabu ka maroroya vakamatailalai na veiyalayalati oqori. Na noda veiyalayalati e vauci keda Vua ka solia vei keda na kaukauwa vakalou” (Russell M. Nelson, “Vagoleya Mai na Mana nei Jisu Karisito ki na Noda Bula,” Liaona, Me 2017, 41).

“E rawa ni da vakila na reki ni da sotava tiko e dua na siga ca, macawa ca, se dua sara mada ga na yabaki ca!

“Kemuni na taciqu kei na ganequ, na reki eda vakila e vakatau vakalailai sara ena ituvaki ni noda dui bula ia sa baleta vakatabakidua na veika e vakanamata kina na noda bula.

“Ni vakanamata noda bula ki na ituvatuva ni veivakabulai ni Kalou … vei Jisu Karisito kei na Nona kosipeli, e rawa ni da vakila na reki veitalia na cava e yaco—se sega ni yaco—ena noda bula. Na reki e lako mai Vua vakakina ena Vukuna. Sai Koya na ivurevure ni reki kecega” (“Reki kei na Bulabula Vakayalo,” Liaona, Nove. 2016, 82).

Veitalanoataka:

Na cava e gadrevi kina na vakabauta me vaqaqacotaki keda kina na Kalou vakayago, vakaloma ka vakayalo talega?

iTaviqaravi

iKalawa 1: Vakailawalawa, wilika na vosacavuti e ra.

iKalawa 2: Veivosakitaka na sala e rawa ni vukei iko kina na nomu cakacakataka na veika vakaliuci vakaparofita oqo me levu cake na nomu vakabauti Jisu Karisito.

Na Veika e Vakaliuci Vakaparofita kei na Yalayala

“Na levu ga ni noda kila me baleta na nona veiqaravi kei na nona ilesilesi na iVakabula—na levu ni noda kila na Nona ivunau kei na veika sa cakava vei keda—na levu ni noda kila ni rawa vei Koya me vakarautaka na kaukauwa eda gadreva ena noda bula” (Russell M. Nelson, “Vagoleya Mai na Mana nei Jisu Karisito ki na Noda Bula,” Liaona, Epe. 2017, 39).

“Na nomuni vakabauta ena sega ni tubu vakacalaka ia ena digidigi walega. … Na cava na iotioti ni gauna o wilika kina na iVola i Momani mai na kena itekivu kina iotioti ni tabana? Wilika tale. Ena vakatubura na nomu vakabauta” (Neil L. Andersen, “Na Vakabauta e Sega ni Ka Vakacala Ka, Ia Sa Ka ni Digidigi,” Liaona, Nove. 2015, 66–67).

O ira na cakacaka vakalotu ka ciqomi ena bula kilikili ka dau vakananumi ena dau dolava tikoga na sala ni veitaratara vakalomalagi ka rawa ni drodro mai kina na kaukauwa ni bula vakalou ki na noda bula. … Na Siga ni Vakacecegu kei na valetabu savasava e rua na ivurevure matata ni veivuke vakalou a tekivuna na Kalou me vukei keda ena noda tubu cake tiko mai ena ivakatagedegede kei na veika ca vakavuravura” (David A. Bednar, “Vosa ni Yalayala e Levu Sara ka Talei,” Liaona, Nove. 2017, 91–92).

Yalataka:

Au na digitaka e dua na ka meu cakava ena macawa oqo me vaqaqacotaka na noqu vakabauti Jisu Karisito.