“3: Vulica,” Kunea na Kaukauwa ena Turaga: Vaqaqacotaki ni Lomada (2020)
“3: Vulica,” Kunea na Kaukauwa ena Turaga: Vaqaqacotaki ni Lomada
Vulica—Levu ni Gauna: 60 na miniti
1. Na Yagoda sa iSolisoli mai vua na Kalou
Wilika:
Sa vakarautaka vei iko na Tamada Vakalomalagi dauloloma na isolisoli ni yago mo vakavaletaka kina na yalomu (raica na Vunau kei na Veiyalayalati 88:15; Eparaama 5:7). E dua na yago bulabula e bibi me bulabula kina na lomada. Ni o qarauna vakavinaka na nomu bula vakayago, ena vinaka cake talega na bulabula ni lomamu, ka veibasai. Eso na sala e rawa ni o qarauna vakavinaka cake kina na yago sa solia vei iko na Tamada Vakalomalagi e oka kina na vakaukauwa yago e veigauna, levu na gauna ni vakacegu, tiko bulabula yadua, kei na kana kakana bulabula.
2. Vakaukauwa yago e Veigauna
Wilika:
Na dau vakaukauwa yago vakawasoma ena rawa ni yaga vakalevu sara ki na bulabula ni yalomu. Na yavalati ni yagoda e vakayavalata na nomu mona ka vakadrodroya eso na wainimate ka veivuke ki lomamu kei na nomu rawa ni raica vakamatata na ituvaki eso. Na nomu taura na gauna mo yavavala ena rawa ni o marau cake kina, yalo vakacegu, ka sega soti ni nuiqawaqawa. Na yavalati ni yagoda e rawa talega ni dua na madigi me vakayagataki kina na yagomu mo sema vata kei na matavuvale kei ira na itokani ena dua na ituvaki lasa, ni veimaliwai.
Wilika:
Kevaka o sega ni se vakauwakauwa yago ena dua na gauna balavu; ena vuku ni tiko na leqa vakayago me vaka na mate ni uto, matenisuka, se mosi ni isema ni yago; se so tale na kauwai, raica e dua na kenadau vakavuniwai ni bera ni tekivutaki e dua na ituvatuva vou ni vakaukauwa yago.
3. Moce kei na Vakacegu
Wilika:
Sa dau guilecavi wasoma na gadrevi ni moce kei na vakacegu. O Elder Jeffrey R. Holland e kaya, “Na vakacauoca sa ikoya na meca levu vei keda—toso vakamalua, vakacegu, ka vakatawana tale. Era yalataka vei keda na vuniwai ni kevaka eda sega ni taura na gauna meda tiko bulabula, eda sa tekivu taura sara tikoga na gauna meda na tauvimate kina maimuri” (“Vaka na Bilo sa Kavoro,” Liaona, Nov. 2013, 41). Na moce vakavinaka e rawa ni vukea na taqomaki ni nomu bula ni vakasama, bulabula ni yago, itagede ni bula, kei na veitaqomaki. Ni o sa oca, o na kunea beka ni dredre mo vakatulewa, walia na leqa, qarauna na ituvaki ni lomamu kei na nomu itovo, ka veisotavi ki na veisau.
Wilika:
Na vakacegu e uasivi cake mai na moce vakarauta. E vakatavulica na iVola i Momani, “Ni sa sega ni kilikili vua na tamata me cici vakatotolo cake mai na kaukauwa sa tu vua” (Mosaia 4:27). E rairai o vakila na veivakasaurarataki mo toso vata kei na totolo ni vuravura. O na rairai tiko beka ena dua na iwase ni bula e veirawai beka, me vaka na susugi ni gonelalai se na qaravi ni dua na daulomani e tauvimate. E rawa talega ni o vakacacani ena veibolebole vakayalo ka vakavuna mo vakila na oca ka via moce balavu cake mai na kena e gadrevi. Na nomu davo tu vakabalavu sa na rawa ni veivakamavoataki ki na bulabula ni nomu vakasama kei na lomamu. E lomani kemuni na Turaga ka kila na nomuni ituvaki duatani. E rawa ni dusimaki iko o Koya ki na veivakasama kei na ivurevure eso ena veivuke ki na nomu ituvaki.
Veitalanoataka:
Ena vakayaco-ka vakacava na oca ki na noda tiko vinaka vakayalo, vakayago, vakaveimaliwai, kei na lomada?
Wilika:
Kevaka o dau moce vakasivia se sa rui lailai, navuca mo vaqara na veivuke mai vua e dua na vuniwai.
4. Na Tiko Bulabula Vakayadua
Wilika:
Eda vakaraitaka na noda doka na yagoda ni da qarauna ka veivosakitaka na kedra vinaka. Ni da vakaliuca na veika lalai me vaka na savata na ligada, sili e veigauna, masia na batida, ka vakasavasavataka tiko na noda isulu ena vakavinakataka na noda bula ka rawa ni vukei keda meda logaloga vinaka cake me baleti keda.
Veitalanoataka:
Na veisau cava soti o raica vei iko ni o vakatovotovotaka na tiko bulabula ni tamata yadua?
5. Kana Kakana Bulabula
Wilika:
Na iVakabula a vakavulica na Parofita o Josefa Simici me baleta na tiko bulabula ena 1833 ena dua na ivakatakila ka yaco me vakatokai me Vosa ni Vuku (raica na Vunau kei na Veiyalayalati 89). Na ivakatakila oqo e vakarautaka na idusidusi me baleta na veika meda kania ka gunuva kei na veika me da levea. Sa yalataka na Turaga na bulabula vinaka, igu, veitaqomaki, kila-ka, kei na vuku vei ira era talairawarawa ki na Vosa ni Vuku.
Ena dua na iotioti ni nona vosa ena koniferedi raraba, a kaya kina o Peresitedi Thomas S. Monson: “Me da qarauna na yagoda kei na noda vakasama ena noda muria na ivakavuvuli e virikotori ena Vosa ni Vuku, e dua na ituvatuva vakarautaki vakalou. Mai vuniyaloqu kei na lomaqu, au vakadinadinataka na veivakalougatataki lagilagi sa waraki keda tu ni da vakayacora” (“Principles and Promises,” Liaona, Nove. 2016, 79).
Veitalanoataka:
Na cava eso na sala e rawa ni da qarauna vakavinaka cake kina na yago sa solia vei keda na Tamada Vakalomalagi?
Wilika:
Qarauna mo gunuva e levu na wai savasava ena siga taucoko. Kania vakarauta na kakana donu me kaukauwa kina na yagomu me tiko kina vei iko na igu o gadreva mo cakava rawa kina na nomu itavi e veisiga. Vakararaba, vakasamataka mo kania e levu na kakana draudrau, vuanikau, sila, lequmi, kei na sorenikau. Navuca talega mo vakalailaitaka na suka sa vakasavasavataki, masima, ivakalomavinaka kamikamica, kei na uro ca.
O na via vosa talega vua e dua o kila me baleta na nomu itovo ni kana. Veivosakitaka eso na sala e rawa ni o vakaukauwataka vakavinaka cake kina na yagomu. Ni ko cakacaka mo bulataka e dua na bula e bulabula cake, o na sega beka ni raica na vatukana ena gauna vata o ya. Ia e rawa ni o kila ni o sa cakava tiko na nomu vinaka duadua mo karona na yago sa solia vei iko na Kalou.
Wilika:
E dua na ivakatakilakila ni mate ni kana o ya mo vakanamata ki na kakana kei na vakaukauwa yago me ycova ni o sa sega ni rawa ni vakanamata tale ki na veitiki tale eso ni nomu bula.
Kevaka o raica ni yalana na nomu itovo ni kana na nomu itaviqaravi se vakacacana na nomu bula, yalovinaka vakasaqara na veivuke vakavuniwai.
6. Kila vinaka na Lomada
Wilika:
Na yagomu e vakila na ituvaki kaukauwa ni lomamu. Na kena yaco me bulabula na lomamu e gadrevi kina mo vakadinadinataka, ciqoma, ka sotava na lomamu ena sala bulabula. Na veika eda vakila e lomada e sa tiki tu ga ni veika eda na sotava ena bula oqo. Ena so na gauna ena kaukauwa beka na veika o vakila e lomamu, ka rawa ni veibolei na kena sotavi. Ni o vakatara na lomamu me vakatulewataka na nomu itovo, o soli iko ki na lomamu ka sega ni o vakayagataka na nomu galala ni digidigi mo sotava kina na lomamu.
Veitalanoataka:
Ena vukei keda vakacava na sasagataki ni vakatulewataki ni lomada meda vakataki Karisito vakalevu cake?
Wilika:
Na imatai ni kalawa ni kena vakatulewataki na lomada sai koya meda vakakilai ira. E dua na iyaya ni cakacaka e rawa ni veivuke sai koya e dua na ivolaniveisiga ni lomada, na ivola ka rawa ni o vola kina na ituvaki o vakila e lomamu. Ena dua na ivolaniveisiga ni lomamu, o vola na veika o vakila, na ituvaki o a tiko kina, kei na ivalavala o a cakava baleta na ivakarau ni lomamu. Vakasamataka vakatitobu na veika o vakila kei na ituvaki oqo ka qai vola na nomu vakanananu. Ni o taleva lesu na ituvaki ni lomamu, vakaraica na ivakarau kei na vanua e mua tiko kina. Nanuma mo dau volavola ena ivolaniveisiga ni lomamu e veisiga. Muria na ivakaraitaki e ra.
|
Lomamu |
iTuvaki |
Ka a Vakayacori ena Vuku ni iTuvaki ni Lomamu |
Vakananuma Vakatitobu |
|---|---|---|---|
Lomamu iVakaraitaki Ni kua au a cudru ka mavoa. | iTuvaki Keirau a veiba vakaukauwa sara kei tamaqu. | Ka a Vakayacori ena Vuku ni iTuvaki ni Lomamu Au a cudru sara ka kailavaki koya ka cudruvi ira na noqu itokani. E a leqa sara ga kina na lomaqu. | Vakananuma Vakatitobu E dodonu meu vosa vei tamaqu me baleta na veika au vakila ka sega ni cudruvi koya. |
Lomamu iVakaraitaki Ni kua au a vakila na marau kei na loloma. | iTuvaki Au a rogoca e dua na masu mai na vu ni yalo ka tarai au. | Ka a Vakayacori ena Vuku ni iTuvaki ni Lomamu Au a vakavinavinaka vua na Tamada Vakalomalagi ena Nona loloma, kau vakasamataka na ivakarau ni noqu masu. | Vakananuma Vakatitobu Au vinakata meu vakila tale na sala oqo ena noqu tovolea meu semati vakavinaka cake vei Tamada Vakalomalagi ena masu. |
Wilika:
E vakatavulica o Elder Richard G. Scott, “Noda soli keda ki na yalo ni cudru se mavoa se vakaiulubale ena vagolea tani na Yalo Tabu” (“How to Obtain Revelation and Inspiration for Your Personal Life,” Liahona, May 2012, 45). E dina sara, eda na vakila kece na cudru kei na mosi ena so na gauna. Ena so na gauna eda sa vakadonui keda sara ga meda vakila na ituvaki ni lomada vakaoqo. Ia, sa ka bibi vei keda meda walia na veika e vakilai oqo kevaka eda vinakata meda sema vakavinaka cake vua na Turaga ka vakila na Yalotabu.
E vakatura talega o Elder Scott e dua na sala e rawa ni vukei keda kina na lomada meda vakila na Yalo ka yaco me bulabula vakalevu cake: “E dua na yalo vinaka ni veiwali ena vukea na ivakatakila. … Na veiwali vinaka sa rawa me dua na sala ni kena takali tani kina na lomaocaoca ni bula oqo” (“How to Obtain Revelation,” 46).
Veitalanoataka:
Ena vukei iko vakacava na vulici ni vakatulewataki ni lomamu me vukei iko mo vakila vakarawarawa na Yalotabu?
7. Qaravi Iko Vakai iko
Wilika:
Ni o sotava na bolebole, o na gadreva mo cakava na veika kece o rawata mo qaravi iko kina. Na nomu cakava na veika kece o rawata e kena ibalebale mo vakayagataka na ivurevure e tiko vei iko ena nomu bula me tokoni iko ena bolebole cava ga o sotava tiko. Sa koto e ra e dua na lisi ni veivakasama eso me baleta na qarauni keda vakai keda.
-
Moce vakalekaleka
-
Sikova e dua na itokani
-
Cakacaka vakalailai
-
Sisili se toni
-
Vakaukauwa yago
-
Wilika e dua nai vola
-
Vakarorogo ki na ivakatagi
-
Bulia e dua na ka
-
Masu
-
Taubale mada
-
Cakava e dua na lisi ni veika o vakavinavinakataka
-
Marautaka e dua na kakana vinaka
-
Meke
-
Lagata
-
Vakayagataka na iwalewale ni tiko vinaka (raica na itaviqaravi ena ika 3 ni ka ena iwasewase ni “Vulica” ena wase e 4 kei na iwasewase ni “iVurevure” ena wase e 4)