Noqu Yavu: Bulataka e Dua na Bula Veiraurau—Gauna Levu Duadua: 20 na miniti

Vakananuma:

Meu na maroroya vakacava na veika dredre ni bula ena veisiga?

Sarava na:

“Me Baleta na Veivutuni kei na Kena iWali,” e tiko ena https://churchofjesuschrist.org/study/video/self-reliance-videos [1:25]. (Sega na vidio? Wilika na ilavelave ni “Veivutuni kei na Kena iWali.”)

Veivutuni kei na Kena iWali

Kevaka o sega ni sarava rawa na vidio, wilika na itukutuku.

Peresitedi Dieter F. Uchtdorf

Peresitedi Dieter F. Uchtdorf

E sega li ni dina na noda sa dau osooso tu ga? Ka ni rarawa dina meda tukuna, ni da dau dokadokataka na noda bula osooso, me vaka e dua na rawa-ka se ivakaraitaki ni noda bulataka tiko e dua na bula cecere sara.

E dina beka oya?

Au nanuma na noda Turaga ka iVakaraitaki, o Jisu Karisito, kei na Nona bula lekaleka ena kedra maliwa na tamata mai Kalili kei Jerusalemi. Au tovolea meu raitayaloyalotaki Koya ni vakusakusa tiko ki na soqoni se veitavi eso me qaravi me rawati kina e dua na ituvatuva ni veika bibi me vakacavari vakavinaka.

Au sega mada ni raica rawa.

Me kena isosomi, au raica na yalololoma kei na veikauwaitaki ni Luve ni Kalou ena bula vakainaki ni veisiga yadua. Ena Nona veimaliwai vata kei ira era tu wavoliti Koya, era vakila nodra vakabibitaki ka lomani. A kila o Koya na kedra yaga vakalou o ira na tamata a sotavi ira. A vakalougatataki ira, veiqaravi vei ira. A laveti ira cake ka vakabulai ira. A solia vei ira na isolisoli vakamareqeti ni Nona gauna.

(“Me Baleta na Veivutuni kei na Kena iWali,” Liaona, Nove. 2012, 22)

Veitalanoataka:

Na cava eda rawa ni vulica mai na bula ni iVakabula me vukei keda meda rawata e dua na bula veiraurau?

Wilika na:

Na malanivosa ni ivolanikalou eso oqo kei na nodra itukutuku na iliuliu ni Lotu:

“Ka mo ni raica me ra vakayacori vakayalomatua ena kena ivakarau dodonu na veika kece oqo, ni sa sega ni kilikili vua na tamata me cici vakatotolo cake mai na kaukauwa sa tu vua” (Mosaia 4:27).

“Kakua ni ko rere niu sa tiko vata kei iko: kakua ni ko taqaya niu sa nomu Kalou: kau na vakaukauwataki iko; io kau na vukei iko” (Aisea 41:10).

“Cakava ga na ka vinaka duadua o rawata ena veisiga yadua. Cakava na veika taumada ka, ni se bera ni o kila, ena vakasinaiti na nomu bula ena kila vakayalo ka na vakadeitaka vei iko ni lomani iko na Tamamu Vakalomalagi. Ni sa kila e dua na tamata na ka oqo, sa na qai sinai na bula ena inaki kei na kena ibalebale, ka vakarawarawataka na kena maroroi” (M. Russell Ballard, “Me Vakatautauvatataki Tiko na Nomu Bula,” Liahona, Sepi. 2012, 50).

“Na ivakarau levu sai koya na noda kila na veika e rawa ni veisautaki, biuti ira ena kena ivakarau dodonu, ka kila na veika ena sega ni veisau” (James E. Faust, “Na Gadrevi ni Kena Vakatautauvatataki na Noda Bula,” Ensign, Mar. 2000, 5).

Veitalanoataka:

Na veika cava e rawa ni vakarawarawataki se tagutuvi mai na noda bula me rawa ni da vakila vakalevu cake na reki?

iTaviqaravi

iKalawa 1: E vakavuvulitaka o Peresitedi Dallin H. Oaks: “Na iwiliwili ni veika vinaka e rawa ni da vakayacora e uabaleta na gauna sa tu me da vakayacora kina.” Eso na ka e vinaka cake mai na vinaka, sai ira oqo na ka e dodonu me vakabibitaka cake na ivakarau ni noda bula” (“Vinaka, Vinaka cake, Vinaka sara,” Liahona, Nove. 2007, 104).

iKalawa 2: Vakataki iko, vakasamataka na ivakarau o bulataka kina na nomu bula ena veimacawa. Mo raitayalotaka mada ni o sa yabaki 25 ka o se bula tiko ga ena sala vata ga. Vakacavara na itukutuku e rua e ra me baleta na nomu bula:

Au se bera ga ni vakayagataka na gauna

Sa rui levu na gauna au vakayagataka

iKalawa 3: Me levei na veivutuni mai muri, vola e dua se rua na ka o rawa ni cakava mo vakatautauvatataka kina nomu bula.

Yalataka:

Au na cakacakataka na noqu vakasama me veirauti kei na noqu bula.