Noqu Yavu: Na Yagoda e Sa iSolisoli mai vua na Kalou—Levu ni Gauna: 20 na Miniti

Vakananuma vakatitobu:

Na veivakalougatataki cava soti o sa ciqoma ena kena soli edua na yagomu?

Sarava:

“God’s Greatest Creation,” tiko ena https://churchofjesuschrist.org/study/video/self-reliance-videos [2:51]. (Sega na vidio? Wilika na vosavolai ni “God’s Greatest Creation.”)

iBulibuli Cecere Duadua ni Kalou

Kevaka o sega ni sarava rawa na vidio, wilika na vosavolai oqo.

Presitedi Russell M. Nelson:

rau davo tu e rua na goneyalewa ka raica cake tu na lomalagi

Ni dua e vakadikeva na cakacaka ni yago ni tamata ena raica vakaidina na “lagilagi kei na kaukauwa ni Kalou.” [Vunau kei na Veiyalayalati 88:47].

Na mata yadua e tiko na kena iloilo me rai kina vakataki koya. Era lewai rau na mata na nave kei na masela me dua ga na ka erau vakanamata kina. Na daliga yadua e semati ki na iyaya ka rawa ni vukica na biau ni rorogo me rogoci rawa.

Na nomu uto e dua na ipamu kaukauwa. E va na kena paipo caka vakamatau ka dau tadola ka tasogo voleka ni sivia e 100,000 na gauna ena dua na siga. Vakasamataka mada na ivakarau ni itataqomaki ni yago. E vakila na mosi. E buli ira na sotia ni yago. Ena vakavouya na yago na veitikina sa sega na kena yaga ka vakatulewataka na ivakarau ni veitikina bula.

Na levu ni veika vakasakiti ni ituvaki ni yagomu e vakadinadinataka na nomu “ituvaki vakalou.” [2 Pita 1:4]. E vakamacalataka na iApositolo o Paula ni sa “vale ni Kalou” [1 Koronica 3:16]. E rawa vakacava oqo? Baleta na yagomu na valetabu ni yalomu. Kei na ivakarau o vakayagataka kina na yagomu ena vakayaco ka ki yalomu. Na Tama ni yaloda na Kalou. Eda sa tiki ni Nona inaki vakalou. Ia ena gauna a buli keda kina vakayago, eda a buli meda veiucui kei na Kalou.

Na vakatorocaketaki ni yalo e tiko na kena isau tawamudu. Ni da sa kila vakaidina na keda ituvaki vakalou, eda na qai vakatulewataka vakavinaka na gagadre vakayago. Na matada ena raica matua na irairai eso, na daligada na irorogo, kei na noda vakasama na veivakanananu ka ra sa yaga ki na noda buli vakayago meda valetabu nei Tamada mai Lomalagi. Ena vuku ni veisolisoli vakayago oqo, me vakavinavinakataki ga kina na Kalou!

Veitalanoataka:

Ena vukei keda vakacava ni tiko na yagoda me vakarautaki keda me da yaco me vakataki Koya na Tamada Vakalomalagi?

Wilika:

Na veimalanivosa oqo mai vei ira na iliuliu ni Lotu:

“Me vaka ni yago vakatamata sa uto tiko ni ituvatuva ni marau ni Tamada kei na noda tubu vakayalo, sa dau segata o Lusefa me vakacacana na noda toso ena nona dau temaki keda meda vakayagataka vakatawadodonu na yagoda” (David A. Bednar, “Qarauna mo ni Daumasu Tikoga,” Liaona, Nove. 2019, 34).

“Na tataqomaki vakayalo ena bula oqo e vakatau e na noda sega ni taura na imatai ni kalawa ki na vanua e sega ni dodonu mo lako kina kei na cakava na ka e sega ni dodonu mo cakava. … [Ni da tamata e tu vei keda na gagadre vakayago eda gadreva meda bula kina.] Na veigagadre oqo e gadrevi vakabibi me rawa kina na vakatubu kawa. Ia, na cava sa qai cakava na vunica? … E sagai keda ena noda gagadre. E temaki keda o koya meda kania na ka e tabu me da kania, gunuva na veika e sega ni dodonu meda gunuva, ka lomana na ka e sega ni dodonu meda lomana!” (Russell M. Nelson, ena “Advice from the Prophet of the Church to Millennials Living in a Hectic World,” Fepe. 18, 2018, newsroom.ChurchofJesusChrist.org).

Veitalanoataka:

Ena rawa vakacava ni vakacacana na vaqaqacotaki ni lomada na noda vakasabusabutaka na yagoda?

ITAVIQARAVI (5 na miniti)

Wilika: E a vakavulica na iApositolo ko Paula, “E vakaevei? dou sa sega beka ni kila ni sa vale ni Yalo Tabu na yagomudou o koya sa curumi kemudou, o koya dou sa rawata mai vua na Kalou, ia dou sa sega ni nomudou? Ni dou sa voli ena ivoli: o koya oqo mo dou qai vakarokorokotaka na Kalou, ena yagomudou, kei na yalomudou, ni sa nona na Kalou” (1 Koronica 6:19–20).

iKalawa 1: Vata kei na dua na itokani, vakasamataka na valetabu o sa raica se sikova. Navuca mo vakananuma na veika o raica, vakila, boica, ka tara ena valetabu kei na rara ni valetabu.

iKalawa 2: Me veivosakitaki vata eso na veivakatauvatani ena veivale tabu oqo kei na sala eda rawa ni vakayagataka se raica kina na yagoda me valetabu. Vakacavara na ivolakabi e ra.

Tara Valetabu	Na Yagoqu me Valetabu
Tara Valetabu iVakaraitaki Era savasava na veivaletabu.	Na Yagoqu me Valetabu Na noqu isulusulu kei na kequ irairai e rawa ni savasava ka rakorako.
Tara Valetabu	Na Yagoqu me Valetabu
Tara Valetabu	Na Yagoqu me Valetabu
Tara Valetabu	Na Yagoqu me Valetabu

iKalawa 3: Veivosakitaka vakailawalawa eso na nomu isaunitaro.

Wilika:

Na malanivosa ni ivolanikalou:

Ena qai vakalesui tale na yalo ki na yago, kei na yago ki na yalo; io, ena semati vata na liga kei na yava kei na veisema ni yago kecega; io, ena sega ni yali kina e dua mada ga na drauniulu; ia ena vakalesui tale na veika kece ki na kedra itutu dina” (Alama 40:23).

“Ia ena lako yani ko [Jisu Karisito], ena vakila na mosi kei na veivakararawataki kei na veivakatovolei kecega; ia sa yaco na veika oqo me vakayacori kina na vosa sa tukuni ni na colata ko Koya na nodra mosi kei na nodra tauvimate na nona tamata. … Ia sa ciqoma ko koya na nodra malumalumu, me vakasinaiti na lomana ena loloma cecere, me vaka na veika vakayago, me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu” (Alama 7:11–12).

Veitalanoataka:

E rawa vakacava ni vaqaqacotaki keda o Jisu Karisito meda vosota vakavinaka se ulabaleta sara mada ga na yalani ni ituvaki vakayago cava ga e tu vei keda?

Yalataka:

Au na digitaka e dua na sala au na qarava vakavinaka cake kina na yagoqu me vaka e dua na valetabu.