iVurevure

Kunei ni Veivuke Vaka-Kenadau Donu

Ni o vakayacora na digidigi mo vakasaqara na veivuke vei ira na kenadau, mo kila ni o na ciqoma tiko na veiqaravi ka tu vei iko na dodonu mo taroga eso na taro. Navuca mo vaqara e dua na kenadau ka sotava na ivakarau oqo:

• Kila vinaka ka rokova na nomu yavunibula. Ni o digitaka mo vakasaqara na veivuke, o na rawa ni veivuke ena kena vakadeitaki na vatuka e gadrevi. Raica e dua na kenadau ka rokova na sasaga ni bula vakaikoya, se na nomu rawa ni digitaka na veika o vinakata mo rawata mai na veiqaravi, se iwalewale tale eso ni veivuke.

• E rawa ni vakamacalataka na nona vuli kei na nona kila vakacakacaka kei na sala e semati kina ki na nomu gagadre. Eso na kenadau vakaivola era oka kina na vuniwai vakalaiseni ni vakamau kei na matavuvale, liganicakacaka ni bula veimaliwai vakalaiseni, kenadau ni vakasama, kenadau ni itovo, daunivakasala saumi kei na so tale.

• E tiko nodra gauna ni veiqaravi e donu vei iko. Vakasamataka na balavu, isau, kei na wasoma ni gauna ni veiqaravi yadua kei na veika tale eso ni o vakatulewataka na veika e ganita na nomu gagadre.

• E lomasoli me veivakasalataki vata kei nomu iliuliu ni Lotu ena nomu toso ki liu, ke o gadreva. Oqo e oka kina na soli ni vakatutu ena sala e rawa ni rau cakacaka vata kina kei na nomu iliuliu me vukei iko.

Takete, Yaga, kei na Ririko

Ena rawa ni o rawata vakalevu cake na nomu takete ni o kila na ituvaki kei na iyalayala ni veivakasalataki. Na veivakasalataki e nakiti me vukei iko mo vulica na sala mo kila vinaka ka vakayarayarataka kina na nomu vakasama, veika o vakila, kei na itovo. E vuqa na tamata era vakila na vinaka se walia nodra kauwai ena veivakasalataki. Me kena ilutua, na tauyavutaki ni dua na veimaliwai ni veivakabauti ena ka bibi sara me vakayacori kina na toso ki liu ena veiqaravi. Vakarogoca vinaka na veika o vakila taumada e lomamu ni o veivosaki kei na kenadau. Nuitaki iko kei na nomu vakatulewa ni ko vakasaqara e dua ka na veirauti vinaka ki na nomu gagadre kei na kemu ituvaki. Kevaka o sega ni logavinaka, vakararai tikoga. E dina ni sega ni rawa ni vakadeitaki na veika ena rawati mai na veivakasalataki, na nomu yalodina ki na veika ena vakayacori ena vakayarayarataka vakalevu sara na kena yaga vei iko.