Bula Rawati Koya
Vulica

“9: Vulica,” Kunea na Kaukauwa mai vua na Turaga: Vakaqaqacotaki ni Lomada (2020)

“9: Vulica,” Kunea na Kaukauwa mai vua na Turaga: Vakaqaqacotaki ni Lomada

Vulica—Levu ni Gauna: 60 na Miniti

1. Veiqaravi vakataka na iVakabula

Wilika:

Sa kerei keda na Turaga meda qaravi ira era tiko voliti keda. E veivakavulici na kedrau italanoa o Alama kei Amuleki. A qai kila o Alama ni sa sotava tiko na rarawa o Amuleki, ka tauri koya sara ga ”ki na nona vale, a sa qaravi koya ena nona rarawa ka vakaukauwataki koya ena vuku ni Turaga” (Alama 15:18).

Vakananuma:

Era sa vukei iko vakacava na tamata mo “vakaqaqacotaki vua na Turaga”?

Veitalanoataka:

Na sala cava soti eda rawa ni vaqaqacotaki ira kina na tani vua na Turaga?

2. Italanoa lasu me baleta na Nodra Vukei na Tani

Wilika:

E tiko e vica vata na italanoa lasu logavinaka o rawa ni vakabauta me baleta na nodra vukei na tani. Ni o wilika na nanuma lasu oqo, vakadikeva se o sa bau vakila na veisala eso oqo.

Lasu #1:

E 100% na noqu itavi ena Nodra Vakarautaki na Tani ena Veivuke Era Gadreva.

Na Ka Dina:

Na iVakabula duadua ga e dau vakabula na yalo, ia e rawa ni o tiki ni dua na itikotiko ni veivakabulai me vakalougatataki ira na tani. O na yaco mo tiki ni itikotiko ni veivakabulai oqo ena nomu solia na nomu kaukauwa kei na rai matalia ka solia ena gauna o rawata rawa kina.

Lasu #2:

E Dodonu Meu Kenadau ena Wali ni Nodra Leqa na Tani.

Na Ka Dina:

O ira sara mada ga na daunivakasala dokai era vakabauta ni nodra itavi sai koya me vukea ga e dua na tamata me cakava ga vakai koya na nona veisau ka sega ni vakarautaka e dua na ivolavakarau ni veidusimaki. Sa nomu itavi mo lomana ka qaravi ira na tamata, ka na cakava na iVakabula na veivakabulai.

Lasu #3:

E Totolo na Kena Vakavinakataki na Leqa ni Bula.

Na Ka Dina:

Na noda itovo e dua vei ira na veivakalomavinakataki totolo, ka yalataki na kena iwali totolo me voleka ni dua na ka. Ia e sega ni dau vakatotolotaki na vakavinakataki ni leqa ni bula. Na cakacakataki ni veisau e dua na iwalewale ka voleka ni dau balavu cake mai na kena o nanuma ni na yaco. Na veisau dina sa ikoya e dua na iwalewale veivakasavasavataki e dodonu mo lako curuma se o ira na nomu daulomani.

Lasu #4:

Au sega ni Kila na Ka Dodonu meu kaya, Sa vinaka cake meu Kua ni Tukuna e Dua na ka.

Na Ka Dina:

Na itukutuku vinaka sai koya ni sega soti ni dodonu mo dau cavuta vakalevu. Na isolisoli cecere duadua o rawa ni solia vei ira na tani sai koya mo vakaraitaka na nomu taleitaki ira, taroga na taro, vakarorogo ena loloma, ka vukei ira me ra vakila ni taqomaki na nodra veiwasei vata kei iko.

Lasu #5:

Kevaka au na Veivuke, era na Dau Vakararavi tu ga vei au.

Na Ka Dina:

Ni ko sa veiqaravi, sa rawa mo tuvanaka na iyalayala bulabula mo vakadeitaka kina ni ko sa qaravi iko tiko kei na nomu matavuvale. E rawa ni tuberi iko na Turaga me rawa ni o veiqaravi ena sala eso e vaqaqacotaka na nona bula rawati koya e dua tale. Kakua ni beca na kaukauwa e rawa ni tu ena nodra bula na tamata na cakacaka lalai ka rawarawa ni loloma, ka kakua ni rerevaka na gauna o solia kei na loloma vua e dua.

Veitalanoataka:

Veitalanoataka vata kei na dua na itokani e dua vei ira na italanoa lasu e dredre tiko vei iko kei na sala o rawa ni ulabaleta kina.

3. Vosa Vei Ira Na Tani e Ganita

Wilika:

Se cava ga na nomu inaki vinaka duadua, e rawarawa me da tukuna na veika e sega soti ni veivuke sara vakalevu ni da tovolea me da vukea e dua ena veigauna dredre. Ia oqo me kakua ni vakarerei iko tani mai na nomu tovolea tikoga mo veivuke. E vinakata na Kalou mo lomana ka vukei ira na Luvena. Dau kauwaitaka na nodra nanuma o ira o tovolea tiko mo vukea, ka qarauna mo kakua ni cavuta se cakava e dua na ka e vakamalumalumutaka na nodra mosi kei na dredre.

Veitalanoataka:

Na cava eso tale na malanivosa o sa rogoca e veivuke se sega ni veivuke?

4. Vakadonui Ira na Tani

Wilika :

E vakatavulica o Sisita Reyna I. Aburto, “Kevaka sara mada ga eda sega ni kila na sala meda veiwekani kina kei na veika era sotava tiko na tani, na kena vakabauti ni nodra mosi sa rawa ni dua na ikalawa bibi me kunei kina na kila vinaka kei na veivakabulai” (“Ena O kei na Rarama, Noqu Turaga, Mo ni Mai Tiko Ga kei Au!” Liaona, Nove. 2019, 58). Me vakamatatataki na lomadra na tamata e kena ibalebale me ra ciqoma taumada na veika era vakila ka qai kilai ira vakavinaka.

E koto oqo e ra eso na ikalawa me vukei iko mo vakadeitaka e dua e sotava tiko e dua na bolebole:

  1. Vakarorogo. Mo tiko ka vakarorogo matua ki na veika e tukuna tiko vei iko na tamata oya. Kakua ni sasabai kevaka o sa cau ki na nona leqa na tamata o ya.

  2. Tovolea mo kila vakavinaka cake. O na gadreva beka mo taroga na taro yalololoma me kilai vakavinaka cake kina na veika e vakila tiko na tamata oqo. Cakava na nomu vinaka duadua mo kila na vanua e lako mai kina na tamata oya.

  3. Ciqoma na veika e vakila na tamata o ya. Kakua ni saga mo veisautaka na tamata oya se kaya ni cala o koya ni vakila na ka oqo. Ni o vakayacora oqo, qarauna mo kakua ni vakauqeta na ivakarau ni vakasama tawakilikili se veivakacacani.

  4. Vakaraitaka na yalololoma. Vakaraitaka ni o kauwaitaka na veika e vakila tiko na tamata oya. Kevaka sara mada ga o sega ni rawa ni sema ki na ituvaki se na vu ni yalo oqo, sa rawa ni o vaqaqacotaka na nona nanuma ni tamata oya ena nomu kaya na veika me vaka “O vakila ni o sega ni rokovi [se nuiqawaqawa, sega na inuinui, sega na kemu yaga, cudrucudru, kei na so tale]. E dredre me da vakila na veika oya.”

  5. Vakaraitaka na loloma. Tukuna vua na tamata oqo ni o kauwaitaki ira ka nuidei tu ena nona rawa ni walia se ulabaleta na leqa.

Wilika:

Oqo e dua na ivakaraitaki ni sala e rawa ni o vakadeitaka kina e dua ni sotava tiko e dua na gauna dredre:

O Jill e dua na tina sega ni vakawati ka se qai mate wale toka ga na luvena tagane mai na gunuva vakasivia na waigaga. E bula duadua voli o koya ka sega ni tiko voleka e dua na matavuvale. A lako mai o Maria me mai vosa vua ka taroga se sa vakacava tiko. A temaki o Maria me takosovi Jill, ia a sega. A vakarorogo ga. Ena gauna e nanuma kina ni ganita, a taroga o koya me vaka “E vakacava tu na veika o vakila ena gauna oqo?” kei “Na cava na ka dredre duadua vei iko?” E rawa ni tukuna ni, “Sa vinaka madaga ni sa tiko vatakei na Kalou ena gauna oqo,” e kila o koya ni se qai calata ga o Jill na luvena tagane. Sa qai nanuma o Maria me vakaraitaka, “Au rawa ni raica ni ko sa nanumi koya vakalevu, ka sa yaluma sara na yaloqu vei iko.” A qai vakaraitaka na loloma ena nona dabe ka tagi vata kei koya.

iVakasala:

Na mataveilawa ni Lotu me baleta na veiqaravi e oka kina e levu cake na vakasama ka rawa ni vukei iko mo kila vakavinaka na ivakarau mo vakaraitaka kina na yalololoma. Raica na ministering.ChurchofJesusChrist.org.

5. Rokova na Nodra Galala na Tani

Wilika na:

Sa solia na Tamada Vakalomalagi vei ira kece na isolisoli ni galala ni digidigi, ka sa nodra itavi na tamata yadua na nodra digidigi se cava ga na veivuke o solia. Ni o dodoliga yani vei ira na tani, mo nanuma tiko ni sega ni nomu itavi mo walia na nodra leqa se qarauna na digidigi era cakava. Sa ka bibi mo biuta na nomu iyalayala bulabula ni ko vukei ira na tani.

E vinakata na iVakabula mo rokova na nodra galala ni digidigi na nomu daulomani, ia oqori e sega ni kena ibalebale ni da tu vakawelewele. Vakasaqara na Yalo me vukei iko mo kila vinaka na ivakarau mo qaravi ira kina na tani ena sala e rokovi kina na nodra galala ni digidigi ka ra sega ni vakila na tani na lecaika.

Oqo eso na vakasama me baleta na veika o rawa ni cakava me ikuri ni veivakadeitaki ni yalo kei na vakarorogo:

  • Lolo ka masulaki ira.

  • Vakatabuya na nomu gauna ena valetabu ena vukudra.

  • Vakasaqara na veivuke kei na ivakasala vaka-kenadau.

  • Vakadikeva na bulabula ni lomada.

  • Vakauta na itukutuku ni veivakayaloqaqataki, se wasea na itukutuku lasa eso me rawa ni ra matadredredre kina.

  • Vakasaqara na veivakalougatataki kei na ivakasala ni matabete.

  • Lewena e dua na ilawalawa veitokoni ni matavuvale kei na itokani.

  • Vagalalataki iko vei ira ka maroroya tiko na iyalayala e rokovi.

  • Qaravi ira ena sala era kerea se vakadonuia kina—na sala eso e sega ni voroka kina na nodra galala ni digidigi se me ra vakila ni ra sega ni kila.

Veitalanoataka:

Wasea e dua na gauna veilaveti o a sotava ena nomu vaqaqacotaki tiko se ena nomu solia na kaukauwa vei ira tale eso.

6. Vosota Vakamalua vata kei ira na Tani

Wilika na:

Na nodra kauwaitaki na noda daulomani e rawa ni dredre ka veivakadrukai. Ni ko saga mo vukei ira na vakaleqai tu, tovolea mo kila vinaka ka levea na vakatulewa ni veilewai. E rawa ni o taura na ivakasala mai na ivolanikalou ka “masuta na Tamada ena yalomudou taucoko me vakasinaiti [kemudou] ena loloma oqo,” sai koya na loloma, se na loloma i Karisito (Moronai 7:48).

Kevaka e tiko e dua na nomu daulomani ka sotava na leqa ni ituvaki ni bula vakayalo, o na rairai vakanamata beka mo qarauna na tamata o ya ka guilecava mo qaravi iko kina. E tu na veivuke me baleti iko. Na ilawalawa veitokoni e rawa ni vukei ira na lewe ni matavuvale me ra vulica na leqa ni tiko bulabula, na sala me ra veivuke, kei na iwalewale ni kena lavetaki na ivakatakilakila. Dolele yani vei ira na itokani nuitaki kei ira na kenadau ni veiqaravi ena bula oqo mo vukei iko kei ira na nomu daulomani. Na veitokoni ni matavuvale kei na itokani e rawa ni vakayaco ka vinaka ena qaravi ni leqa bibi ni bula veimaliwai kei na vakasama.

E vakasalataka o Elder Jeffery R. Holland: “Vei kemuni na dauveiqaravi, ena nomu sasaga mo veivukea e dua ena nona ituvaki ni bula, kakua ni vakacacana na nomu bula vakai iko. Ena veika kece oqo, mo yalomatua kina. Kakua ni cici vakatotolo cake mai na kaukauwa sa tu vei iko [Mosaia 4:27]. Se cava tale o na rawa ni vakarautaka se sega, sa rawa ni o cabora na nomu masu ka solia na ‘loloma e sega ni veivakaisini’ [Vunau kei na Veiyalayalati121:41]” (“Vaka na Bilo Kavoro,” Liaona, Nove. 2013, 41).

Veitalanoataka:

Na cava sa vukei iko me veiraurau kina na nomu qaravi ira na tani kei iko?

Tabaka