Akong Pundasyon: Gamit og Hugot nga Pagtuo diha ni Jesukristo—Labing Dugay nga Oras: 20 Minutos

Palandonga:

Pangutan-a ang imong kaugalingon, “Giunsa sa akong hugot nga pagtuo diha ni Jesukristo pagtabang kanako sa pagdumala sa malisod nga mga panahon?”

Tan-awa:

“Exercise Faith in Jesus Christ,” anaa sa https://churchofjesuschrist.org/study/video/self-reliance-videos [1:43]. (Walay bidyo? Basaha ang transcript alang sa “Gamit og Hugot nga Pagtuo diha ni Jesukristo.”)

Gamit og Hugot nga Pagtuo diha ni Jesukristo

Kon kamo dili makatan-aw sa bidyo, basaha kini nga script.

Elder David A. Bednar:

Ang paglihok mao ang paggamit sa hugot nga pagtuo. Ang mga anak sa Israel nagpas-an sa arka sa pakigsaad. Nangabot sila sa Suba sa Jordan. Ang saad mao nga motabok sila sa uga nga yuta. Kanus-a nabahin ang tubig? Sa dihang nabasa ang ilang mga tiil. Mitaak sila ngadto sa suba—lihok. Misunod ang gahom—nabahin ang tubig.

Sa kasagaran nagtuo kita, “Magbaton ako niining hingpit nga panabot, ug dayon bag-ohon ko kana ngadto sa unsay akong buhaton.” Mosugyot ako nga kita adunay igo aron sa pagsugod. Aduna kitay pagsabot sa hustong direksyon. Ang hugot nga pagtuo usa ka baroganan—ang baroganan—sa paglihok ug sa gahom. Ang tinuod nga hugot nga pagtuo nagpunting diha ug ni Ginoong Jesukristo ug kanunay nga mosangpot ngadto sa paglihok.

(Tan-awa sa “Seek Learning by Faith” [pakigpulong ngadto sa mga religious educator sa Church Educational System, Peb. 3, 2006], Church of JesusChrist.org/media-library.)

Basaha:

Ang mosunod nga tudling sa kasulatan ug mga pamahayag sa mga lider sa Simbahan:

“Ug ni sa bisan unsa nga panahon adunay nakahimo og mga milagro hangtod human sa ilang hugot nga pagtuo; busa sila mituo una diha sa Anak sa Dios” (Ether 12:18).

“Ang hugot nga pagtuo diha sa Dios naglakip sa pagtuo sa Iyang mga katuyoan ingon man sa Iyang panahon. Dili kita hingpit nga makadawat Kaniya samtang nagdumili sa Iyang takda nga panahon” (Neal A. Maxwell, That Ye May Believe [Salt Lake City: Bookcraft, 1992], 84).

“Ang hugot nga pagtuo diha ni Jesukristo moduso kanato sa pagbuhat sa mga butang nga dili unta nato buhaton. Ang hugot nga pagtuo nga nagdasig kanato sa paglihok naghatag kanato og dugang access ngadto sa Iyang gahom. Madugangan usab nato ang gahom sa Manluluwas diha sa atong mga kinabuhi kon mohimo kita og sagradong mga pakigsaad ug tukma nga motuman niana nga mga pakigsaad. Ang atong mga pakigsaad mobugkos kanato ngadto Kaniya ug mohatag kanato og diosnong gahom” (Russell M. Nelson, “Pagdawat sa Gahom ni Jesukristo diha sa Atong mga Kinabuhi,” Liahona, Mayo 2017, 41).

Mahimo kitang mobati og kalipay bisan og bati ang atong adlaw, bati ang semana, o bisan bati ang tuig!

“Mga kaigsoonan, ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.

“Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong mga kinabuhi. Ang kalipay moabot gikan ug tungod Kaniya. Siya ang tinubdan sa tanang kalipay” (Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 82).

Hisgoti:

Nganong gikinahanglan ang hugot nga pagtuo aron motabang ang Dios kanato sa temporal ug espirituhanong paagi?

Kalihokan

Lakang 1: Isip usa ka grupo, basaha ang mga kutlo sa ubos.

Lakang 2: Hisgoti kon unsaon nga ang paglihok niining propetikanhong mga prayoridad makatabang kaninyo sa pagbaton og dugang pa nga hugot nga pagtuo diha ni Jesukristo.

Propetikanhong mga Prayoridad ug mga Saad

“Kon mas masayod kita sa pangalagad ug misyon sa Manluluwas—kon mas masabtan nato ang Iyang doktrina ug unsay Iyang gibuhat alang kanato—mas masayod kita nga Siya makahatag og gahom nga atong gikinahanglan sa atong mga kinabuhi” (Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo. 2017, 39).

“Ang inyong pagtuo molambo dili pinaagi sa sulagma, apan pinaagi sa pagpili. … Kanus-a ang kataposang higayon nga gibasa ninyo ang Basahon ni Mormon gikan sa sinugdanan hangtud sa kataposan? Basaha kini pag-usab. Mopalambo kini sa inyong pagtuo” (Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,” Liahona, Nob. 2015, 66–67).

“Ang mga ordinansa nga takos nga gidawat ug kanunay nga gihinumdoman moabli sa langitnong mga agianan diin ang gahom sa pagkadiosnon modagayday sa atong kinabuhi. … Ang adlaw nga Igpapahulay ug ang balaan nga templo mao ang duha ka piho nga mga tinubdan sa balaanong tabang nga giestablisar sa Dios aron sa pagtabang kanato nga mopatigbabaw sa lebel ug pagkadunot sa kalibotan” (David A. Bednar, “Bililhon ug Dagko Uyamot nga mga Saad,” Liahona, Nob. 2017, 91–92).

Pasalig:

Mopili ako og usa ka butang nga buhaton niini nga semana aron sa paglig-on sa akong hugot nga pagtuo diha ni Jesukristo.