Pagbarog sa Kinaugalingong Paningkamot
Pagkat-on

“10: Pagkat-on,” Pagkaplag og Kalig-on diha sa Ginoo: Emosyonal nga Kalig-on (2020)

“10: Pagkat-on,” Pagkaplag og Kalig-on diha sa Ginoo: Emosyonal nga Kalig-on

Pagkat-on—Labing Dugay nga Oras: 60 Minutos

1. Pag-ila sa Atong Pag-uswag

Basaha:

Diha sa kalig-on sa Ginoo ug pinaagi sa Iyang grasya, kita mapanalanginan sa pagbuhat, paglahutay, ug sa pagbuntog sa tanang mga butang. Sa milabay nga pila ka semana, kita nakakaplag og kalig-on diha sa Ginoo ug nakakat-on og daghang kahanas sa pagpalambo sa atong emosyonal nga kalig-on.

Hisgoti:

Kauban sa grupo, ipakigbahin ang pipila sa mga hunahuna nga inyong gisulat diha sa kalihokan sa ibabaw. Unsay maayo nga nahitabo?

Unsa nga mga hagit ang inyong giatubang sa inyong mga paningkamot sa pag-usab, ug giunsa ninyo sa pag-uswag lapas niadto nga mga hagit?

2. Pagkat-on gikan sa Atong mga Kapakyasan

Basaha:

Ang mga kapakyasan normal nga kabahin sa kinabuhi ug usa ka gipaabot nga bahin sa bisan unsa nga mga paningkamot sa pag-usab. Ang inyong mga kapakyasan makatudlo kaninyo og mga paagi sa pagpadayon sa inyong pag-uswag. Kon kamo mag-atubang og mga kapakyasan, kini makatabang sa pagpunting sa kalamboan ug dili sa kahingpitan. Si Elder Kim B. Clark mitudlo: “Walay bisan usa kanato ang hingpit. Usahay kita wala mag-uswag. Kita mabalda o mawad-an sa paglaom. Kita masayop. Apan kon kita mohunahuna kang Jesukristo uban sa mahinulsulon nga kasingkasing, Siya mobayaw kanato, molimpyo kanato gikan sa sala, mopasaylo nato, ug moayo sa atong mga kasingkasing. Siya mapailubon ug mabination; ang Iyang matubsanong gugma dili matapos ug dili gayod mapakyas” (“Tan-aw ngadto ni Jesukristo,” Liahona, Mayo 2019, 56).

Ang mga kasulatan nagtudlo, “Daghan ang mga kagol-anan sa matarong: apan ang Ginoo magaluwas kaniya gikan kanilang tanan” (Salmo 34:19).

Pinaagi sa pagduol ngadto sa Manluluwas kon kamo nagsinati og mga kapakyasan, makapalambo kamo og panan-awon sa kauswagan kay sa kahingpitan. Usa ka paagi sa pag-atubang og mga kapakyasan mao ang pagtandi niini ngadto sa pagbiyahe. Sama pananglitan, hunahunaa nga kamo nagbiyahe ngadto sa usa ka duol nga lungsod. Sa inyong pagpadulong, nasinati ninyo ang pagbuto sa ligid. Mobalik ba kamo sa inyong pagbiyahe gikan sa sinugdanan sa pag-ayo sa ligid? Dili. Kamo mangita og usa ka paagi sa pag-ayo niini kon hain kamo dapit ug mopadayon sa inyong biyahe. Sa samang paagi, kon kamo nagsinati og kapakyasan mahimo ninyong bation nga ang tanan ninyong paglambo napapas ug kinahanglan kamong mosugod og balik, apan kana dili tinuod. Makakaplag kamo og mga paagi sa pag-ayo sa problema kon hain kamo dapit ug molihok sa pagpadayon sa unahan. Sa pagdugang, ang mga kapakyasan makapakita gani kaninyo og mga dapit nga kamo nagkinahanglan nga molambo.

Hisgoti:

Unsay inyong nakat-onan gikan sa inyong kaugalingong mga kapakyasan?

3. Paglahotay sa Atong mga Hagit og Maayo

Basaha:

Sa mortalidad kinahanglan gayod kitang magkat-on sa pagpuyo uban sa mga hagit ug mga kasakit. Mahimong hugot ang atong tinguha nga malingkawas gikan sa emosyonal nga mga hagit ug maninguha alang sa kahingpitan, apan bisan sa atong labing maayo nga mga paningkamot, ang mga simtomas sa emosyonal nga mga hagit magpabilin. Apan dili kita kinahanglan nga mobiya. Kinahanglan gayod nga kita magkat-on sa pagpuyo uban nini nga mga hagit samtang kita nagpadayon sa unahan uban ang hugot nga pagtuo. Ang pagbuhat sa mao motabang kanato sa pagbati og kalinaw ug mahimong mas malig-on.

Si Elder Dieter F. Uchtdorf mitudlo: “Adunay importante nga konsepto niini: ang pailob dili ang pagkawalay pagtagad, ni kini kapakyas sa pagbuhat tungod sa atong mga kahadlok. Ang pailob nagkahulogan og aktibong paghulat ug paglahutay. Nagkahulogan kini nga magpabilin uban sa usa ka butang ug sa pagbuhat sa tanan kutob sa atong mahimo—motrabaho, molaom, ug mogamit sa hugot nga pagtuo; paglahutay sa kalisod uban sa determinasyon, bisan kon ang mga tingoha sa atong mga kasingkasing nalangan. Ang pailob dili lamang ang paglahotay; kondili paglahotay og maayo!” (“Ipadayon ang Pagpailob,” Liahona, Mayo 2010, 57).

Tan-awa:

“Come What May, and Love It,” anaa sa https://churchofjesuschrist.org/study/video/self-reliance-videos [3:31].

3:34

Hisgoti:

Unsa nga tambag gikan niini nga video kamo makagamit nganha sa inyong kinabuhi?

4. Pagtakda og Personal nga Kausaban sa mga Tumong

Basaha:

Sa tibuok niini nga kurso inyong nakat-onan ang mga kahanas nga nagtabang kaninyo sa paghimo og mga kausaban sa inyong kinabuhi. Kamo nakatakda, nakatrabaho, ug nakareport sa mga tumong sa pagpraktis niini nga mga kahanas. Si Presidente M. Russell Ballard mitudlo: “Paghimo og mubo og tagal nga mga tumong nga mahimo ninyong kab-uton. Paghimo og mga tumong nga maayo ang pagkabalanse—dili manobra ang kadaghan o diyutay ra kaayo, ug dili kaayo taas o mubo. Isulat ang makab-ot ra ninyo nga mga tumong ug lihoka sigon sa importansiya niini. Pag-ampo alang sa balaang giya sa inyong paghan-ay og tumong” (“Pagbalanse sa Inyong Kinabuhi,” Liahona, Sept. 2012, 48).

Si Presidente Heber J. Grant kasagarang miingon, “Kanang atong pursigihan sa pagbuhat sa kadugayan mamahimong mas sayon natong buhaton; dili tungod kay ang kinaiya sa butang nausab, apan ang atong gahom sa pagbuhat miusbaw” (tagsulat ug tinubdan wala mahibaloi).

Basaha:

“Ang atong tinguhaon nga makab-ot niini nga kinabuhi dili ang mahimong mas maayo kay sa uban apan ang pagpaningkamot nga mas molambo pa ang atong mga kaugalingon. Ang pagpalambo sa atong kaugalingon, ang mas mapanindot nato ang atong karon kay sa kaniadto, ang pagdala sa atong mga pagsulay og mas maayo kay sa atong nahunahuna nga kita makahimo, ang paghatag ingon nga kita wala gayod sukad makahatag, ang pagbuhat sa atong trabaho nga mas makusganon ug mahimong maanindot sukad masukad––kini mao ang tinuod nga katuyoan” (Thomas S. Monson, “The Lighthouse of the Lord: A Message to the Youth of the Church,” Ensign, Peb. 2001, 5).

Hisgoti:

Sa unsang paagi ang pagtakda og tumong usa ka bahin sa plano sa Dios alang kanato?

5. Mangayo og Tabang pinaagi sa Manluluwas

Basaha:

Si Brother Tad R. Callister mitudlo sa mosunod mahitungod sa Ginoo:

“Ang Pag-ula sa Manluluwas naghatag nato og kinabuhi alang sa kamatayon, ‘bulak puli sa abo,’ kaayohan alang sa kasakit, ug kahingpitan alang sa kahuyang. Mao kini ang solusyon sa langit sa mga babag ug mga pakigbisog niini nga kalibotan.

“Sa kataposang semana sa pagka-mortal sa Manluluwas, Siya miingon, ‘Dinhi sa kalibotan aduna kamoy kagol-anan: apan sumalig kamo; gidaog ko na ang kalibotan’ [Juan 16:33]. Tungod kay ang Manluluwas mipahigayon sa Iyang Pag-ula, walay gahom sa gawas o hitabo o tawo—walay sala o kamatayon o diborsyo—nga makapugong nato sa pagkab-ot sa kahimayaan, kon kita motuman lang sa mga sugo sa Dios. Uban niana nga kahibalo, kita makapadayon uban ang kamaya ug sigurado nga kahibalo nga ang Dios nag-uban nato niining langitnong paningkamot” (“Ang Pag-ula ni Jesukristo,” Liahona, Mayo 2019, 87).

Ang Ginoo gusto nga mohupay ug mosuporta kanato. Siya misaad, “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (Doktrina ug mga Pakigsaad 112:10). Ang mosunod mao ang pipila ka paagi nga kamo makapangayo og balaang tabang:

  • Pasayloa ang imong kaugalingon ug ang uban.

  • Pag-ampo uban ang hugot nga pagtuo, pagpaubos, ug pagpasalamat.

  • Pagbusog diha sa mga kasulatan ug mga pagtulon-an sa buhing mga propeta.

  • Tambong sa templo.

  • Hinumdomi ang adlaw nga igpapahulay, ug sa pagbalaan niini.

  • Ambit sa sakramento, ug sa kanunay hinumdomi ang Manluluwas.

  • Pag-amgo nga ang pagbaton ug ang pagpangutana usa ka importanting bahin sa pagdawat og pagpadayag.

  • Hinumdomi nga ang Manluluwas gusto nga motabang kaninyo sa inyong mga tumong.

Hisgoti:

Giunsa kamo sa paglig-on diha sa Ginoo atol niini nga kurso?

6. Pangayo og Tabang gikan sa Uban

Basaha:

Ang Dios dili gusto kanato nga moagi og mga pagsulay nga mag-inusara. Kini sa kasagaran ipaagi sa ubang tawo nga Siya motabang sa atong mga panginahanglan. Ang Dios nagbutang ug mobutang og mga tawo nganha sa atong mga kinabuhi sa pagtabang kanato ug pagsuporta kanato sa atong mga pagsulay. Mga dapit nga kita makaadto alang sa tabang naglakip sa:

  • Pamilya ug kasaligang mga higala.

  • Mga lider sa Simbahan ug tigpangalagad nga mga sister o mga brother.

  • Mga kapanguhaan sa komunidad.

  • Propesyonal nga tabang.

Hisgoti:

Giunsa sa uban pagtabang kaninyo atol nini nga kurso?

Pagpangayo og Propesyonal nga Tabang

Basaha:

Kini malisod nga mahibaloan kon mangayo o dili og propesyonal nga tabang. Ang mosunod nga mga sitwasyon mga pasidaan nga mga timaan nga mahimong nagpaila og panginahanglan alang sa propesyonal nga tabang.

  • Kamo nag-antos gikan sa nagpadayong mga pagbati sa hilabihang kasuko, kaguol, kahadlok, emosyonal nga sakit, o sa pagkawalay paglaom. Walay pagsapayan sa unsay inyong buhaton, kini nga mga pagbati magpabilin ug sa kasagaran makaluya sa mental ug pisikal nga paagi.

  • Bisan pa sa mga pagbati nga usahay moabot ug mobiya, ang mga isyu magpadayon sulod sa daghang mga bulan.

  • Bation ninyo nga walay mahimo sa pisikal nga paagi, ug ang inyong gana ug sundanan sa pagkatulog nausab.

  • Kamo adunay dili mapugngan nga pagbati sa kaguol ug kabalaka.

  • Naghunahuna kamo sa pagpasakit sa inyong kaugalingon o sa uban.

  • Ang inyong abilidad sa paglihok sa inadlaw nga paagi maapektohan, nagminos sa inyong pagkamabungahon.

Kon kamo nagsinati og pipila niining pasidaan nga mga timaan ug naguol mahitungod sa inyong panglawas, pakigsulti ngadto sa usa ka propesyonal sa pag-atiman sa panglawas o sa usa ka tawo nga inyong kasaligan.

Mubo nga Sulat: Dugang nga impormasyon sa pagpili og husto nga propesyonal sa pag-atiman sa panglawas alang kaninyo makaplagan diha sa mga “Kapanguhaan” nga seksiyon sa kataposan nini nga kapitulo.

7. Panapos

Basaha:

Pahalipay sa paghuman niini nga kurso! Daghan sa butang nga atong gihisgotan dili matuman sulod sa 10 ka semana. Hinoon, mahimong kamo nagpalambo og pipila ka batasan nga makatabang kaninyo sa pag-uswag ngadto sa mas dako nga emosyonal nga kalig-on. Rebyoha kanunay ang mga kapitulo niini nga workbook sa paghinumdom ug sa pagpraktis niini nga mga baroganan ug mga kahanas.

Hisgoti:

Isip usa ka grupo, boluntaryo sa pagpakigbahin sa inyong mga kasinatian gikan niini nga kurso. Hunahunaa ang pagpakigbahin sa labing makatabang nga mga kahanas nga inyong nakat-unan, espirituhanong mga kasinatian nga kamo aduna, mga paagi nga kamo nausab, o giunsa sa Ginoo pagpanalangin kaninyo atol nini nga kurso.

Basaha:

Human matapos kini nga kurso, ang pipila ka grupo nagpili nga dili na kaayo mag-uban og miting sa kanunay. Ang pipila nakakaplag og bili sa kanunay nga pagkat-on nga mag-uban, nagsuporta sa usag usa, ug sa pagtrabaho sa pagbuntog sa mga hagit. Ang uban naggamit sa mga mensahe sa text o social media aron pagtanyag kanunay og pagdasig ug pagpakigbahin og makapabayaw nga mga artikulo, mga video ug ubang mga impormasyon.

Hisgoti:

Isip usa ka grupo, paghisgot kon kamo gusto ba nga magpabiling magkakontak sa usag usa. Kon mao, unsaon ninyo sa pagbuhat niini?