Noqu Yavu: Ciqoma na Cakacaka Vakalotu ni Valetabu—Levu ni Gauna: 20 na Miniti

Vakananuma vakatitobu:

Na cava eso na ka e bibi vei iko?

Sarava:

“Doing What Matters Most,” e tiko ena https://churchofjesuschrist.org/study/video/self-reliance-videos. (Sega na vidio? Wilika na vosavolai ni “Doing What Matters Most.”)

Na Cakava Na Ka e Bibi Duadua

Kevaka o sega ni sarava rawa na vidio, wilika na vosavolai oqo.

Dieter F. Uchtdorf

Dauwiliwili:

E a voca e dua na waqavuka ena dua na bogi buto ni Tiseba e Florida. Sivia e 100 na tamata era mate kina. E a tiko mai na vanua taqomaki ena rauta ga na 20 na maile.

President Dieter F. Uchtdorf:

Ni oti na vakacalaka, era saga me kila na dauvakadidike na vu ni leqa. Na iroro e mua e liu a vakarau tu vakavinaka. A taucoko tu na ituvaki vakagacagaca ni waqavuka. A cakacaka vakavinaka tu na ka kece—vakavo ga e dua na ka: e dua na matanicina lailai sa kama. Na matanicina lailai oqo—e kena isau e 20 na sede—a vakavuna na semati ni leqa me ra laki mate vakaciriloloma sara kina e 100 na tamata.

E dina, na matani cina sa boko tu oya a sega ni vakavuna na vakacalaka; a yaco baleta ni ra sa laki vakatabakidua na kaimua kina ka lailai sara ena gauna oya ka ra guilecava na ka e bibi duadua.

Na ivakarau ni noda dau raica ga na veika tawayaga ka tagutuvi kina na veika bibi e sega ni yaco ga vei ira na pailate ia kivei keda taucoko. Eda rawa ni vakaleqai kece kina. …

E vakatabakidua tiko beka na nomu vakasama kei na yalomu ki na veika lalai e yaga ga vakalekaleka, se ki na veika bibi duadua?

(Raica na “We Are Doing a Great Work and Cannot Come Down,” Liahona, Me 2009, 59, 60.)

Veitalanoataka:

Na cava e so na ka sega ni yaga e rawa ni vakaleqa na noda toso ki liu? Ena vukei keda vakacava na cakacaka vakalotu ni kosipeli eso?

Wilika:

Na malanivosa ni ivolanikalou oqo kei na nodra itukutuku na iliuliu ni Lotu:

“Ia ena vakatakilai mai na kaukauwa ni bula vakalou ena kena veicakacaka vakalotu” (Vunau kei na Veiyalayalati 84:20).

“Ena vinaka vei keda meda vulica na ika 109 ni iwase ni Vunau kei na Veiyalayalati ka muria na ivakasala nei Peresitedi [Howard W.] Hunter ‘meda raica na valetabu ni Turaga vakaivakatakilakila cecere duadua ni [noda] lewena na lotu.” (Quentin L. Cook, “Raici iKo ena Valetabu,” Liaona, Me 2016, 99).

“Na icavacava eda sa sasaga yadua tiko kina meda laki vakaedaumeni ena kaukauwa ena dua na vale ni Turaga, vauci vakamatavuvale, dinata na veiyalayalati vakayacori e valetabu meda rawata kina na isolisoli cecere duadua ni Kalou—sai koya na bula tawamudu. Na cakacaka vakalotu ni valetabu kei na veiyalayalati o sa cakava sa idola ni kena vaqaqacotaki na nomu bula, nomu bula vakawati kei na matavuvale, kei na nomu rawa ni vorata rawa na nona ravuravu na meca. Na nomu sokalou e valetabu kei na nomu veiqaravi kina baleti ira nomu qase e liu ena vakalougatataki iko me vakalevutaka na nomu ivakatakila kei na vakacegu ka na vaqaqacotaka na nomu yalayala mo tiko ga ena salatu” (Russell M. Nelson, “Ni Da Lako Vata Yani Ki Liu,” Liaona, Epe. 2018, 7).

Veitalanoataka:

Ena rawa vakacava ki na sokalou ena valetabu kei na cakacaka ni tuva kawa me vakalevutaka na vaqaqacotaki ni lomada?

iTaviqaravi (5 na miniti)

iKalawa 1: Wilika vata kei na dua na itokani na vosacavuti nei Peresitedi Boyd K. Packer kei na malanivosa ni ivolanikalou e ra mai na masu ni vakatabui ni Valetabu e Kirtland. Toqa na veivakalougatataki yalataki vei ira era sokalou ena valetabu.

“Na Turaga ena vakalougatataki keda ni da cakava na cakacaka tabu ni valetabu. Na veivakalougatataki e kea ena sega walega ni yalani ki na noda veiqaravi e valetabu. Eda na vakalougatataki ena noda veika kece sara” (Boyd K. Packer, The Holy Temple (1980), 182).

“Ka me ra tubu cake vei kemuni, ka ciqoma na taucoko ni Yalo Tabu, ka cokonaki me vaka na nomuni lawa, ka vakarautaki me ra rawata na veika kece e dui ganiti ira” (Vunau kei na Veiyalayalati 109:15).

“Ia ni ra sa talaidredre na nomuni tamata, se ko cei ga vei ira, me na veivutuni sara vakatotolo ka lesu yani vei kemuni, ka me kune loloma e matamuni, io me rawata tale kina na veivakalougatataki ko ni sa solia vei koya sa vakarokorokotaki kemuni ena nomuni vale” (Vunau kei na Veiyalayalati 109:21).

“Keimami sa kerei kemuni, na Tamai keimami Yalosavasava, mera na lako yani na nomuni tamata mai na vale oqo ka vakaiyaragi tu ena nomuni kaukauwa, ka me tiko vata kei ira na yacamuni, ka vakavolivoliti ira na nomuni lagilagi, ka vakatawai ira na nomuni agilosi” (Vunau kei na Veiyalayalati 109: 22).

“Keimami sa kerei kemuni, na Tamai keimami Yalosavasava, … Ia me tawayaga na iyaragi kecega sa caka me yaviti ira” (Vunau kei na Veiyalayalati 109:24–25).

Kalawa 2: Vakasamataka vakatitobu vakataki iko, “Na cava meu veisautaka ena noqu bula meu vakaitavi wasoma ena cakacaka vakalotu ni valetabu?”

Yalataka:

Au na lokuca e dua na tikinisiga meu lako kina ki na valetabu kevaka e tiko na noqu ivolatara ni valetabu. Kevaka e sega na noqu ivolatara ni valetabu, au na lokuca meu sota vata kei noqu bisopi se peresitedi ni tabana meu vakavoutaka na noqu ivolatara se veivosakitaka na sala au rawa ni vakavakarau kina meu ciqoma na noqu cakacaka vakalotu ni valetabu.