“2: Akong Pundasyon: Ang Atong Balaanong Pagkatawo ug Katuyoan,” Pagkaplag og Kalig-on diha sa Ginoo: Emosyonal nga Kalig-on (2020)
“2: Akong Pundasyon: Ang Atong Balaanong Pagkatawo ug Katuyoan,” Pagkaplag og Kalig-on diha sa Ginoo: Emosyonal nga Kalig-on
Akong Pundasyon: Ang Atong Balaanong Pagkatawo ug Katuyoan ug Katuyoan––Labing Dugay nga Oras: 20 Minutos
Palandonga:
Unsay bili sa akong kalag ngadto sa Dios?
Basaha:
“Hinumdomi ang bili sa mga kalag mahinungdanon sa panan-aw sa Dios; kay, tan-awa, ang Ginoo nga imong Manunubos nag-antos sa kamatayon diha sa unod; busa siya nag-antos sa kasakit sa tanan nga mga tawo, nga unta ang tanan nga mga tawo maghinulsol ug moduol ngadto kaniya” (Doktrina ug mga Pakigsaad 18:10–11).
Tan-awa:
“Our True Identity,” anaa sa https://churchofjesuschrist.org/study/video/self-reliance-videos [3:39]. (Walay bidyo? Basaha ang transcript alang sa “Our True Identity.”)
Our True Identity
Kon kamo dili makatan-aw sa bidyo, basaha kini nga script.
Presidente Dieter F. Uchtdorf:
Kadaghanan sa kalibog nga atong masinati niini nga kinabuhi nagagikan sa yanong dili pagsabot kon kinsa kita.
Usa sa labing gimahal nga mga tig-istorya sa tanang panahon mao ang Danish nga manunulat nga si Hans Christian Andersen. Diha sa usa sa iyang mga istorya, “The Ugly Duckling,” usa ka inahang itik nakadiskobre nga usa sa iyang bag-ong napiso talagsaon ang pagkadako ug ngil-ad kaayo. Ang ubang mga itik dili makabiya sa ngil-ad nga gamay nga itik nga mag-inusara. Sila nagkastigo niya nga walay kalooy.
Ang ngil-ad nga itik naghukom nga kini mas maayo alang sa tanan kon siya mobiya sa iyang pamilya, ug busa milayas siya. Unya usa ka adlaw iyang nakita nga naglupad sa ibabaw ang usa ka panon nga nindot nga mga langgam. Milupad siya ug misunod kanila ngadto sa usa ka matahom nga linaw. Nagtan-aw ang ngil-ad nga itik ngadto sa tubig ug nakakita og aninag sa usa ka nindot kaayong gangsa. Nakaamgo ang ngil-ad nga itik nga ang aninag mao ang iyang kaugalingon! Iyang nadiskobrehan kon kinsa gayod siya.
Paghunahuna kon diin ikaw gikan. Kamo anak nga mga lalaki ug mga babaye sa labing gamhanan, labing mahimayaon nga tawo sa uniberso. Siya nahigugma kaninyo sa walay kinutobang paghigugma. Gusto Niya ang labing maayo alang kaninyo. Kini nga kahibalo nag-usab sa tanan. Nag-usab kini sa inyong karon. Makausab kini sa inyong umaabot. Ug makausab kini sa kalibotan.
Kon ato pa lamang nga nasabtan kon kinsa kita ug unsa ang giandam alang kanato, ang atong mga kasingkasing moawas uban sa ingon nga pasalamat ug kalipay nga kini molamdag bisan sa labing grabe nga mga kaguol uban sa kahayag ug gugma sa Dios.
Sa tinuod anaa kanunay ang mga tingog nga nagsulti kaninyo nga kamo buang nga magtuo nga kamo mga gangsa, nagpugos nga kamo ngil-ad nga mga itik ug nga kamo dili magdahom nga mahimong bisan unsa pa. Apan kamo mas nakahibalo. Dili kamo ordinaryo nga mga tawo. Kamo mahimayaon ug mahangturon.
Nangamuyo ako nganha kaninyo––tan-aw lamang ngadto sa tubig ug tan-awa ang inyong tinuod nga aninag! Mao kini ang akong pag-ampo ug panalangin nga kon kamo motan-aw sa inyong kaugalingon nga aninag, makakita kamo lapas sa mga pagkadili hingpit ug mga pagduha-duha sa kaugalingon ug makaila kon kinsa gayod kamo sa tinuod: mahimayaon nga anak nga mga lalaki ug mga babaye sa Makagagahum nga Dios. Diha sa sagradong ngalan ni Jesukristo, amen.
Basaha:
Ang mosunod nga mga pamahayag sa mga lider sa Simbahan:
“Ikaw anak sa Dios. Siya ang Amahan sa imong espiritu. Sa espirituhanong paagi, ikaw gipakatawo nga madungganon, anak sa Hari sa Langit. Ibutang kana nga kamatuoran sa imong hunahuna ug hupot niini” (Elder Brian K. Taylor, “Ako Ba Anak sa Dios?,” Liahona, Mayo 2018, 12).
“Pagmatngon kon giunsa ninyo paghulagway ang inyong kaugalingon. Ayaw ihulagway o ipasabot ang inyong kaugalingon pinaagi sa temporaryo nga kalidad. Ang mao lamang nga nag-inusarang kalidad nga kinahanglang mohulagway kanato mao nga kita anak nga lalaki o babaye sa Dios. Kana nga kamatuoran molabaw sa tanang uban nga mga kinaiya, lakip sa kaliwat, trabaho, pisikal nga mga kinaiya, mga pasidunggog, o bisan sa relihiyosong pagkasakop” (Dallin H. Oaks, “How to Define Yourself”,” New Era, Hunyo 2013, 48).
“Talagsaon kamo. Walay sama, gihimo sa mahangturong salabotan nga makaangkon og kinabuhing dayon.
“Kinahanglan dili na kamo magduha-duha bahin sa inyong bili isip usa ka indibidwal. Ang tibuok tuyo sa plano sa ebanghelyo mao ang paghatag og oportunidad sa matag usa ninyo nga makaabot sa inyong hingpit nga potensyal, nga mao ang mahangturong kauswagan ug sa posibilidad sa pagkadios” (Joy D. Jones, “Bili nga Dili Masukod,” Liahona, Nob. 2017, 14).
Hisgoti:
Ngano nga ang paghinumdom sa atong tinuod nga pagkatawo ug potensyal importante kaayo?
Basaha:
Dili nato masukod ang bili sa laing kalag labaw pa kay sa atong pagsukod sa gilapdon sa kalibotan. Ang matag tawo nga atong mahimamat usa ka VIP [bililhon kaayo] ngadto sa atong Langitnong Amahan. Sa higayon nga ato kanang masabtan, makasugod kita sa pagsabot kon unsaon nato sa pagtratar ang atong isig-katawo (Dieter F. Uchtdorf, “Kamo ang Akong Mga Kamot,” Liahona, Mayo 2010, 69).
Hisgoti:
Nganong importante nga tan-awon ang uban sama sa pagtan-aw sa Dios kanila? Unsaon nga kita makapalambo niini nga espirituhanon nga gasa?
Pasalig:
Moila ako og usa ka paagi sa paghinumdom sa akong balaang pagkatawo niini nga semana.