“4: Akong Pundasyon: Gamita ang Panahon sa Maalamon nga Paagi,” Pagkaplag og Kalig-on diha sa Ginoo: Emosyonal nga Kalig-on (2020)
“4: Akong Pundasyon: Gamita ang Panahon sa Maalamon nga Paagi,” Pagkaplag og Kalig-on diha sa Ginoo: Emosyonal nga Kalig-on
Akong Pundasyon: Gamita ang Panahon sa Maalamon nga Paagi—Labing Dugay nga Oras: 20 Minutos
Palandonga:
Ngano nga ang panahon usa sa labing mahinungdanong mga gasa sa Dios?
Tan-awa:
“The Gift of Time,” anaa sa https://churchofjesuschrist.org/study/video/self-reliance-videos [2:27]. (Walay bidyo? Basaha ang transcript alang sa “The Gift of Time.”)
The Gift of Time
Kon kamo dili makatan-aw sa video, pagpili og mga tahas ug basaha kini nga script.
Kofi: Hello, Sister Benkosi. Kumusta ka?
Sister Benkosi:: Okay ka ra, Kofi?
Kofi: Oh, Sister Benkosi. Nagkapuliki kaayo ko. Kinahanglan akong motrabaho ug moserbisyo ug motabang sa akong pamilya … ug unya ang akong football usab. Wala akoy panahon!
Sister B.: Kofi, anaa kanimo ang tanang panahon nga anaa.
Kofi Unsa?
Sister B.: Dong, ang Dios naghatag kanato og dakong gasa—ang atong panahon. Kinahanglan gayod atong gamiton kini sa unsay labing importante.
Kofi Pero unsaon, Sister Benkosi? Ikaw kanunay adunay daghan kaayong nahimo. Nagmalampuson ka sa imong pamilya, sa imong negosyo. Nakaserbisyo ug nakapanalangin ka og daghan, sama kanako. Wala ko kahibalo kon giunsa nimo kini paghimo.
Sister B.: Gusto ba gyod ka nga mahibalo? Kon molingkod kag tarong ug maminaw, sultihan ko ikaw sa akong sekreto.
Kada buntag mobangon ako sa dili pa mosidlak ang adlaw. Mag-ilis ko ug manghilam-os ug manghugas sa kamot.
Magbasa ko sa mga kasulatan. Dayon maghimo ko og lista kon unsay akong kinahanglang buhaton nianang adlawa.
Maghunahuna ako kon kinsa kaha ang akong serbisyohan. Mag-ampo ako aron mahibalo sa kabubut-on sa Dios. Ug ako maminaw.
Usahay ang mga ngalan o mga nawong sa mga tawo mosantop sa hunahuna. Akong idugang sila sa akong lista.
Kofi:: Kana ba ang paagi nga ikaw kanunay nga nakahibalo kon kinsa ang nanginahanglan sa imong serbisyo?
Sister B.: Oo, Kofi. Ug mag-ampo ako alang sa kalig-on ug kaalam. Mag-ampo ako nga ang Dios “mopahinungod sa [akong] binuhatan.” Nag-ingon kini diha sa 2 Nephi 32.
Nagpasalamat ako Kaniya. Nagsaad ako nga buhaton ang akong labing maayo. Naghangyo ako nga Iyang buhaton ang unsay dili nako mabuhat.
Dayon akong tan-awon ang akong lista. Akong butangan og 1 ang labing importante nga butang, dayon 2.
Kofi: Giunsa nimo pagkahibalo ang mga prayoridad?
Sister B.: Ako maminaw kon mag-ampo ako! Dayon ako motrabaho. Akong tan-awon ang numero 1 ug mosulay sa pagbuhat niini og una, dayon ang numero 2.
Usahay ang mga butang mausab. Ang Espiritu Santo mosulti kanako sa pagbuhat og laing butang. Maayo kana.
Nagtrabaho ako og maayo, pero ako adunay kalinaw. Nahibalo ako nga ang Dios motabang kanako.
Busa, uban sa akong lista ug sa Espiritu, akong buhaton ang unsay importante, Kofi.
Kofi: Kana morag yano nga paminawon ug malisod sa samang higayon.
SisterB.: Husto ka! Kon ako sa kataposan mangandam na aron mohigda, mag-ampo ako. Nagreport ako sa Langitnong Amahan. Sultihan ko Siya kon unsay nahimo nianang adlawa. Ako mangutana. Mangutana ako kon unsay mas maayo nakong mabuhat. Maminaw ko. Kasagaran nakong mabati ang Iyang gugma. Nahibalo ako nga Siya nagpanindot sa unsay akong gipaninguha nga buhaton. Dayon ako adunay kalinaw, Kofi, ug ako matulog.
Kofi: Maayo kana, Mamma Benkosi. Gusto ko niini nga kalinaw. Gusto kong gamiton ang akong panahon. Gusto kong motrabaho ug moserbisyo og mas maayo.
Hisgoti:
Unsa ang inyong nakat-onan gikan ni Sister Benkosi diha sa video?
Basaha:
Ang mosunod nga tudling sa kasulatan ug mga pamahayag sa mga lider sa Simbahan:
“Kay tan-awa, kini nga kinabuhi mao ang panahon alang sa mga tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw alang sa mga tawo sa paghimo sa ilang mga buluhaton” (Alma 34:32).
“Ang panahon mao ang tanang puhonan nga ania sa yuta. … Kon gamiton sa hustong paagi, magdala kini nianang unsay modugang sa inyong kahamugaway, kaharuhay, ug katagbawan. Atong hunahunaon kini, ug dili kay maglingkod lamang nga magkyugpos, nag-usik sa panahon” (Brigham Young, sa Discourses of Brigham Young, sel. John A. Widstoe [1954], 214).
“Dali ra kitang mabuntog sa naandang buluhaton ug ordinaryong mga butang sa mortalidad. Ang pagkatulog, pagkaon, pagsinina, pagtrabaho, pagdula, pag-ehersisyo, ug daghan pang naandan nga mga kalihokan gikinahanglan ug importante. Apan sa kataposan, kon unsa kita nga mamahimo maoy resulta sa atong kahibalo ug pagkaandam nga makat-on gikan sa Amahan, sa Anak, ug sa Espiritu Santo; dili lamang kini ang sumada sa atong inadlaw nga mga kalihokan sa tibuok kinabuhi” (David A. Bednar, “Bililhon ug Dagko Uyamot nga mga Saad,” Liahona, Nob. 2017, 93).
Pasalig:
Bansayon ko kini nga mga lakang kada adlaw aron mas maalamon nakong magamit ang akong panahon, ug moreport ngadto sa Langitnong Amahan matag gabii diha sa akong mga pag-ampo.